ޓެކްސް ދައްކާ ފަރާތްތަކަށް ލުއިފަސޭހަ ޚިދުމަތްތަކެއް ފޯރުކޮށްދިނުމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ކުރަމުންދާ މަސައްކަތްތަކުގެ ތެރެއިން، "މޯލްޑިވްސް ގެސްޓް އިންފޮމޭޝަން ސިސްޓަމް" (އެމް.ޖީ.އައި.އެސް) ރަސްމީކޮށް އިފުތިތާޙުކޮށްފިއެވެ. މި ސިސްޓަމް އިފުތިތާޙުކޮށްދެއްވީ މިކަމަށްޓަކައި މިއަދު ބޭއްވި ޚާއްޞަ ރަސްމިއްޔާތެއްގައި، މިނިސްޓަރ އޮފް ފިނޭންސް އެންޑް ޕަބްލިކް އެންޓަރޕްރައިސެސް، އަލްފާޟިލް ޙަސަން ޒަރީރެވެ.
މި ސިސްޓަމް ތަޢާރަފުކުރުމާއެކު، ގްރީން ޓެކުހަށް ރަޖިސްޓަރީކޮށްފައިވާ ހުރިހާ ފަރާތްތަކަށް ވެސް ޓޫރިސްޓް އެސްޓެބްލިޝްމަންޓްތަކަށް އަންނަ ފަތުރުވެރިންގެ މަޢުލޫމާތު މި ސިސްޓަމް މެދުވެރިކޮށް ހުށަހެޅޭނެއެވެ. އަދި މި ސިސްޓަމުން މަޢުލޫމާތު ހުށަހެޅުމުން، މިނިސްޓްރީ އޮފް ޓޫރިޒަމަށް ހުށަހަޅަންޖެހެ މަޢުލޫމާތު އެ މިނިސްޓްރީއަށް ވެސް ހުށަހެޅުނީ ކަމުގައި ބެލެވޭނެއެވެ. މީރާއިން ހާމަކުރާގޮތުގައި، މި އައު އިންތިޒާމުގެ ސަބަބުން ޓޫރިސްޓް އެސްޓެބްލިޝްމަންޓްތަކުން މަޢުލޫމާތު ހުށަހެޅުމުގެ އިލްތިޒާމު ފުރިހަމަކުރުމަށް ވަރަށް ބޮޑު ލުއިފަސޭހަކަމެއް ލިބިގެންދާނެއެވެ. އަދި މި ސިސްޓަމް ޓޫރިސްޓް އެސްޓެބްލިޝްމަންޓްތަކުގެ ސިސްޓަމާ އިންޓަގްރޭޓްކުރުމުން، މަޢުލޫމާތު ހުށަހެޅުމަށް މެނުއަލްކޮށް ކުރަންޖެހޭ މަސައްކަތް ނިމުމަކަށް އަންނާނެއެވެ.
މި ސިސްޓަމަކީ ހުރިހާ ފަރާތްތަކަށް ހުޅުވާލެވިފައިވާ ސިސްޓަމެއް ކަމުގައި ވިޔަސް، ޓެކްސްދައްކާ ފަރާތްތައް އޮންބޯޑް ކުރުމުގައި މީރާއިން އިސްކަންދޭނީ ޓެކްސް ދައްކާ ފަރާތްތައް ދެބަޔަކަށް ބަހާލައިގެން ކަމަށް މިީރާއިން މަޢުލޫމާތު ދެއްވައެވެ. އެގޮތުން ރިސޯޓްތަކާއި، ހޮޓާތަކާއި، އަދި 50 އެނދަށްވުރެ މަތީގެ ގެސްޓްހައުސްތަކުން، 1 ނޮވެމްބަރ 2026 އިން ފެށިގެން މި ސިސްޓަމް މެދުވެރިކޮށް ރިޕޯޓް ކުރަން ފަށަން ޖެހޭއިރު، ގްރީން ޓެކުހަށް ރަޖިސްޓަރީކޮށްފައިވާ އެހެނިހެން ފަރާތްތަކުން، 1 ޖެނުއަރީ 2027 އިން ފެށިގެން ހިނގާ މުއްދަތުތަކުގެ މަޢުލޫމާތު މި ސިސްޓަމް މެދުވެރިކޮށް ރިޕޯޓްކުރަން ޖެހޭނެ ކަމަށް މީރާއިން އަންގައެވެ.
މި އައު ސިސްޓަމް ތަޢާރަފުކުރި ނަމަވެސް، ގްރީން ޓެކްސް ބަޔާން ހުށަހެޅުމަށާއި ފައިސާ ދެއްކުމަށް ކަނޑައެޅިފައިވާ ސުންގަޑިތަކަށް އެއްވެސް ބަދަލެއް ނާންނާނެއެވެ. އަދި ކުރިއެކޭ އެއްފަދައިން ގްރީން ޓެކްސް ރިޓާން ހުށަހެޅުމާއި ފައިސާ ދެއްކުން ކުރިއަށް ދާނީ "މީރާކަނެކްޓް" މެދުވެރިކޮށެވެ. ނަމަވެސް، މި ސިސްޓަމަށް މަޢުލޫމާތު ރިޕޯޓް ކުރުމުން، އެ މުއްދަތުގެ ގްރީން ޓެކްސް ބަޔާނާއެކު އިތުރު އިންފޮމޭޝަން ޝީޓެއް އަޕްލޯޑްކުރާކަށް ނުޖެހޭނެއެވެ. އޭގެ ބަދަލުގައި ބަޔާން ހުށަހަޅާއިރު އެ މަޢުލޫމާތު ގްރީން ޓެކްސް ބަޔާނަށް ޕްރީފިލް ކޮށްދޭނެ ކަމަށްވެސް މީރާއިން މަޢުލޫމާތު ދެއްވައެވެ.