1. ތަޢާރުފާއި ނަން

(ހ) މިއީ ޤާނޫނު ނަންބަރު 10/2011 (މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނު) ގެ ދަށުން މޯލްޑިވްސް އިންލަންޑް ރެވެނިއު އޮތޯރިޓީއަށް ލިބިދޭ އިޚުތިޔާރުގެ ދަށުން ހަދާފައިވާ ގަވާއިދެކެވެ.

(ށ) މި ގަވާއިދަށް ކިޔާނީ، "މުދަލާއި ޚިދުމަތުގެ އަގުން ޓެކްސް ނެގުމުގެ ގަވާއިދު" އެވެ.

2. މަޤްޞަދު

މި ގަވާއިދުގެ މަޤްޞަދަކީ، މުދަލާއި ޚިދުމަތުގެ އަގުން ޓެކްސް ނެގޭނެ އުސޫލުތަކާއި ހަމަތައް ކަނޑައެޅުމެވެ.

3. ރަޖިސްޓަރީކުރުމަށް އެދި ހުށަހެޅުން

(ހ) ޤާނޫނުގެ ދަށުން ޖީ.އެސް.ޓީ އަށް ރަޖިސްޓަރީކުރުމަށް އެދި ހުށަހަޅާ ފަރާތްތަކުން އެކަމަށް އެދި ހުށަހަޅަންވާނީ "ޖީ.އެސް.ޓީ ރެޖިސްޓްރޭޝަން" (MIRA105) ފޯމު ފުރިހަމަކުރުމަށްފަހު، އެ ފޯމުގައި ކަނޑައަޅައިފައިވާ އެންމެހައި މަޢުލޫމާތާއި ލިޔެކިޔުންތަކާ އެކުގައެވެ.

(ށ) އަލަށް ތަރައްޤީކޮށްފައިވާ ޓޫރިސްޓް ރިޒޯޓުތަކާއި، އިންޓަގްރޭޓެޑް ޓޫރިސްޓް ރިޒޯޓްތަކާއި، ރިޒޯޓް ހޮޓާތަކާއި، ހޮޓާތަކާއި، ޓޫރިސްޓް ހޮޓާތަކާއި، ޓޫރިސްޓް ގެސްޓްހައުސްތައް މި މާއްދާގެ (ހ) ގެ ދަށުން ރަޖިސްޓަރީކުރުމަށް އެދި ހުށަހެޅުމުގެ ކުރިން، ޓެކްސް ޤާނޫނުތަކާއި ގަވާއިދުތަކަށް އެ ތަންތަން ތަބާވުމަށް ތައްޔާރުވެފައިވާ މިންވަރު ބެލުމަށް އެދި މީރާއަށް ހުށަހަޅައި، އެ ފަދަ އިންސްޕެކްޝަނަކަށް މަގުފަހިކޮށްދޭންވާނެއެވެ. 

(ނ) އެއްވެސް ފަރާތަކުން ޓޫރިޒަމް ދާއިރާގައްޔާއި އެ ނޫން ދާއިރާތަކުގައި ޓެކްސް ނެގޭ ޙަރަކާތްތައް ހިންގާނަމަ، އެ ދެ ދާއިރާގައި ހިންގާ ޙަރަކާތްތައް މީރާގައި ރަޖިސްޓަރީކުރަންވާނީ ދެ ދާއިރާގައި ހިންގާ ޓެކްސް ނެގޭ ޙަރަކާތްތައް ވަކިންނެވެ.

(ރ) ރަޖިސްޓަރީކޮށްފައިވާ ފަރާތަކުން އައު ޓެކްސް ނެގޭ ހަރަކާތެއް ފަށާނަމަ، އެ ހަރަކާތެއް ފެށުމުގެ ކުރިން ޖީ.އެސް.ޓީ ރެޖިސްޓްރޭޝަން ފޯމު (MIRA 105) މީރާއަށް ހުށަހަޅައި، އެ ހަރަކާތް ފަށާ ތާރީޚުން ފެށިގެން މީރާގައި ޖީ.އެސް.ޓީ އަށް ރަޖިސްޓަރީކުރަންވާނެއެވެ. އަދި އެ ހަރަކާތުން ޖީ.އެސް.ޓީ ނަގަން ފަށާނީ އެ ހަރަކާތް ފަށާ ތާރީޚުން ފެށިގެންނެވެ.

4. ޓޫރިޒަމް ދާއިރާގައި ހިންގާ ޓެކްސް ނެގޭ ޙަރަކާތްތައް އަލުން ރަޖިސްޓަރީކުރަން ނުޖެހުން

ޤާނޫނަށް ޢަމަލުކުރަން ފަށާ ތާރީޚުގެ ނިޔަލަށް ޤާނޫނު ނަންބަރު 19/2010 (ޓޫރިސްޓް ޚިދުމަތްދޭ ތަންތަނުން ވިއްކާ ތަކެއްޗާއި ދޭ ޚިދުމަތުގެ އަގުން ޓެކްސް ނެގުމުގެ ޤާނޫނު) ގެ ދަށުން މީރާގައި ރަޖިސްޓަރީކޮށްފައިވާ ޓެކްސް ނެގޭ ޙަރަކާތްތައް އަލުން ރަޖިސްޓަރީކުރާކަށް ނުޖެހޭނެއެވެ.

5. ރަޖިސްޓަރީކުރަންޖެހޭ ފަރާތް

(ހ) ޤާނޫނުގެ 16 ވަނަ މާއްދާގައި ބަޔާންކޮށްފައިވާ ދާއިރާތަކުގެ މުދަލާއި ޚިދުމަތް ފޯރުވައިދޭ ތަންތަން މީރާގައި ރަޖިސްޓަރީކުރަންވާނީ، ޤާނޫނުގެ 56 ވަނަ މާއްދާގައިވާ ގޮތުގެމަތިން، އެފަދަ ތަންތަން ހިންގުމުގެ ހުއްދަ ސަރުކާރުގެ ކަމާބެހޭ އިދާރާއަކުން ދޫކޮށްފައިވާ ފަރާތްތަކުގެ ނަމުގައި ނުވަތަ، އެފަދަ ހުއްދައެއް ދޫކޮށްފައި ނުވާނަމަ، އެ ތަންތަން ހިންގާ ފަރާތްތަކުގެ ނަމުގައެވެ.

(ށ) ޤާނޫނުގެ 15 ވަނަ މާއްދާގައި ބަޔާންކޮށްފައިވާ ޓޫރިޒަމް ދާއިރާގެ މުދަލާއި ޚިދުމަތް ފޯރުވައިދޭ ތަންތަނުގެ ތެރެއިން ޓޫރިޒަމާބެހޭ މިނިސްޓްރީން ހުއްދަ ލިބިގެން ހިންގާ ތަންތަން މީރާގައި ރަޖިސްޓަރީކުރަންވާނީ، އެފަދަ ތަންތަން ހިންގުމުގެ ހުއްދަ ޓޫރިޒަމާބެހޭ މިނިސްޓްރީން ދޫކޮށްފައިވާ ފަރާތްތަކުގެ ނަމުގައެވެ.

(ނ) ޤާނޫނުގެ 15 ވަނަ މާއްދާގައި ބަޔާންކޮށްފައިވާ ޓޫރިޒަމް ދާއިރާގެ މުދަލާއި ޚިދުމަތް ފޯރުވައިދޭ ތަންތަނުގެ ތެރެއިން މި މާއްދާގެ (ށ) ގައި ބަޔާންކޮށްފައިވާ ތަންތަން ފިޔަވައި އެހެނިހެން ތަންތަން މީރާގައި ރަޖިސްޓަރީކުރަންވާނީ، އެފަދަ ތަންތަން ހިންގުމުގެ ހުއްދަ ސަރުކާރުގެ ކަމާބެހޭ އިދާރާއަކުން ދޫކޮށްފައިވާ ފަރާތްތަކުގެ ނަމުގައި ނުވަތަ، އެފަދަ ހުއްދައެއް ދޫކޮށްފައި ނުވާނަމަ، އެ ތަންތަން ހިންގާ ފަރާތްތަކުގެ ނަމުގައެވެ.

(ރ) މި މާއްދާގެ (ށ) އަދި (ނ) ގައި އެހެން ބަޔާންކޮށްފައި އޮތް ނަމަވެސް، ޓޫރިޒަމާބެހޭ މިނިސްޓްރީން ހުއްދަ ނަގައިގެން އެކޮމޮޑޭޝަން ޚިދުމަތް ފޯރުވައިދޭންޖެހޭ ތަންތަނުން ވިއްކާ މުދަލާއި ދޭ ޚިދުމަތް ހިމެނޭނީ ޤާނޫނުގެ 15 ވަނަ މާއްދާގެ (ހ) ގެ (1) ގެ ތެރޭގައެވެ.

(ބ) ބޭރުގެ ޓޫރިސްޓް އުޅަނދަށް، އެ އުޅަނދާ ހަވާލުވެ ހުންނަ އޭޖެންޓުގެ ނަމުގައި ޓޫރިޒަމާބެހޭ މިނިސްޓްރީން ދޫކުރާ ޗާޓަރ ލައިސަންސަކީ، ޓޫރިޒަމާބެހޭ މިނިސްޓްރީން، އެ އޭޖެންޓަށް ދޫކުރާ ހިންގުމުގެ ހުއްދައެއް ކަމުގައި، ޤާނޫނާއި މި ގަވާއިދުގެ ބޭނުމަށް ބެލެވޭނެއެވެ.

6. އެކުގައި ރަޖިސްޓަރީކުރުން

މި ގަވާއިދުގައި ކަނޑައެޅިގެން އެހެން ގޮތަކަށް ބަޔާންކޮށްފައި ނުވާނަމަ، ޤާނޫނުގެ ދަށުން މީރާގައި ރަޖިސްޓަރީކުރަންޖެހޭ، ޓެކްސް ނެގޭ ޙަރަކާތެއް ރަޖިސްޓަރީކުރަންވާނީ، އެ ޙަރަކާތުގެ ޤާނޫނީ ވެރިފަރާތުން ދިވެހިރާއްޖޭގައި ހިންގާ އެންމެހައި ޓެކްސް ނެގޭ ޙަރަކާތްތައް ހިމެނޭ ގޮތުންނެވެ.

7. ވަކިވަކިން ރަޖިސްޓަރީކުރުން

(ހ) މި ގަވާއިދުގެ 6 ވަނަ މާއްދާގައި އެހެން ބަޔާންކޮށްފައި އޮތްނަމަވެސް، ރަޖިސްޓަރީކުރަންޖެހޭ ފަރާތަކުން ހިންގާ ޓެކްސް ނެގޭ ޙަރަކާތެއްގެ ކިބައިގައި އަންނަނިވި ޝަރުޠުތައް ފުރިހަމަވާނަމަ، މި ގަވާއިދުގެ 3 ވަނަ މާއްދާގެ (ނ) އާއި ތައާރަޒުނުވާނޭ ގޮތުގެމަތިން، އެ ފަރާތުން ހިންގާ އެހެން ޓެކްސް ނެގޭ ޙަރަކާތްތަކާ ވަކިން އެ ޙަރަކާތް ރަޖިސްޓަރީކުރުމަށް އެދި ހުށަހެޅިދާނެއެވެ.

(1) އެ ފަރާތުން ހިންގާ އެހެން ޓެކްސް ނެގޭ ޙަރަކާތްތަކާ ވަކިން އެ ޙަރަކާތުގެ ހިސާބުތައް ބެލެހެއްޓުން؛ އަދި
(2) އެ ޙަރަކާތް ހިންގަނީ އެ ފަރާތުން ހިންގާ އެހެން ޓެކްސް ނެގޭ ޙަރަކާތްތައް ހިންގާ ރަށް ނޫން ރަށެއްގައި ކަމަށްވުން،  ނުވަތަ އެ ޙަރަކާތުގެ ބާވަތާއި ޒާތް، އެ ފަރާތުން ހިންގާ އެހެން ޓެކްސް ނެގޭ ޙަރަކާތްތަކުގެ ބާވަތާއި ޒާތާއި ތަފާތުވުން.

(ށ) މި މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، ޤާނޫނުގެ 15 ވަނަ މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ ތަނެއް ނުވަތަ އުޅަނދެއް ހިންގުމުގެ ހުއްދަ ސަރުކާރުގެ ކަމާބެހޭ އިދާރާއިން ދޫކޮށްފައިވާ ފަރާތަކުން އެއިން ކޮންމެ ތަނަކާއި އުޅަނދެއް ރަޖިސްޓަރީ ކުރަންވާނީ ވަކިންނެވެ. އަދި އެ ފަދަ ތަނެއްގައި ނުވަތަ އުޅަނދެއްގައި ހިންގާ، ޤާނޫނުގެ 15 ވަނަ މާއްދާގެ (ހ) ގެ (2) ވަނަ ނަންބަރުގައި ބަޔާންކޮށްފައިވާ ތަންތަން ރަޖިސްޓަރީ ކުރަންވާނީ، އެ ތަނެއް ހިންގަމުންދާ ތަނާ ނުވަތަ އުޅަނދާ އެކުގައެވެ.

(ނ) މި މާއްދާގައި އެހެން ގޮތަކަށް ބަޔާންކޮށްފައި އޮތް ނަމަވެސް، ޓޫރިޒަމް ދާއިރާގެ މުދަލާއި ޚިދުމަތް ފޯރުވައިދޭ ތަނެއްގެ ނުވަތަ އުޅަނދެއްގެ މުވައްޒަފުންނަށް ޚާއްޞަކުރެވިގެން އެއްވެސް ފަރާތަކުން އެ ތަނުގައި ނުވަތަ އެ އުޅަނދުގައި ހިންގާ ފިހާރައާއި ކެފޭ ރަޖިސްޓަރީކުރަންވާނީ އެ ފަރާތުން ހިންގާ ޓެކްސް ނެގޭ އެހެން ހަރަކާތްތަކާ ވަކިންނެވެ.

(ރ) މި މާއްދާގެ (ނ) ގައި އެހެން ބަޔާންކޮށްފައި އޮތް ނަމަވެސް، ޓޫރިޒަމް ދާއިރާގެ މުދަލާއި ޚިދުމަތް ފޯރުވައިދޭ ތަނުގައި، މި މާއްދާގެ (ނ) ގައި ބަޔާންކޮށްފައިވާ ފަދަ ފިހާރަތަކާއި ކެފޭތައް ހިންގާ ފަރާތަކީ އެއްފަރާތެއް ކަމުގައި ވާ ނަމަ، އެ ކެފޭތަކާއި ފިހާރަތައް ރަޖިސްޓަރީކުރަންވާނީ އެކުގައެވެ.

8. ބައެއް ބޭނުންތަކަށް މުދާ އިމްޕޯޓްކުރާ ފަރާތްތައް ރަޖިސްޓަރީކުރަން ނުޖެހުން

މި ގަވާއިދުގެ އެހެން މާއްދާއެއްގައި އެހެން ގޮތަކަށް ބަޔާންކޮށްފައި އޮތްނަމަވެސް، ޤާނޫނުގެ 51 ވަނަ މާއްދާގެ (ހ) ގެ (4) ގެ ބޭނުމަށް، ދިވެހިރާއްޖެއަށް މުދާ އިމްޕޯޓްކުރާ ފަރާތްތަކުގެ ތެރެއިން އަންނަނިވި ފަރާތްތައް ޤާނޫނުގެ ދަށުން މީރާގައި ރަޖިސްޓަރީކުރާކަށް ނުޖެހޭނެއެވެ.

(ހ) އުފެއްދުންތެރި މަސައްކަތަކަށް ފިޔަވައި އަމިއްލަ ބޭނުންތަކަށް މުދާ އިމްޕޯޓްކުރާ ފަރާތްތަކުގެ ތެރެއިން އިމްޕޯޓް މުދާ ވިއްކުމުގެ ހުއްދަ ނެތް ފަރާތްތައް؛

(ށ) މުދާ އިމްޕޯޓްކުރާ ދައުލަތުގެ މުއައްސަސާތައް.

9. ޓިން

(ހ) މި ގަވާއިދުގެ ދަށުން ރަޖިސްޓަރީކުރުމަށް އެދި ހުށަހަޅާ ކޮންމެ ފަރާތަކަށް ޓެކްސްޕެޔަރ އައިޑެންޓިފިކޭޝަން ނަންބަރެއް (ޓިން) ދޫކުރެވޭނެއެވެ. މިގޮތުން، މި ގަވާއިދުގެ 7 ވަނަ މާއްދާގެ ދަށުން ވަކިން ރަޖިސްޓަރީކުރުމަށް އެދި ހުށަހަޅާ ފަރާތްތަކުން ވަކިން ރަޖިސްޓަރީކުރާ ކޮންމެ ޓެކްސް ނެގޭ ޙަރަކާތަކަށް ދޫކުރެވޭނީ ވަކި ޓިން އެކެވެ.

(ށ) ރަޖިސްޓަރީކޮށްފައިވާ ފަރާތަކުން ތައްޔާރުކުރާ ޓެކްސް އިންވޮއިސްތަކުގައާއި، ރަސީދުތަކުގައާއި، ކްރެޑިޓް ނޯޓްތަކުގައާއި، ޑެބިޓް ނޯޓްތަކުގައާއި، މީރާއާއެކު ކުރާ ކޮންމެ މުޢާމަލާތެއްގައިވެސް އެ ފަރާތް ޖީ.އެސް.ޓީ އަށް ރަޖިސްޓަރީކުރުމުން ދޫކުރެވޭ ޓިން ބަޔާންކުރަންވާނެއެވެ.

10. ޖީ.އެސް.ޓީ ރެޖިސްޓްރޭޝަން ސެޓްފިކެޓް

(ހ) މި ގަވާއިދުގެ ދަށުން ރަޖިސްޓަރީކުރުމަށް އެދި ހުށަހަޅާ ފަރާތްތަކުން ޓެކްސް ނެގޭ ޙަރަކާތްތަކެއް ހިންގާ ކޮންމެ ތަނަކަށް ޖީ.އެސް.ޓީ ރެޖިސްޓްރޭޝަން ސެޓްފިކެޓެއް ދޫކުރެވޭނެއެވެ.

(ށ) ރަޖިސްޓަރީކޮށްފައިވާ ކޮންމެ ފަރާތަކުންމެ، އެ ފަރާތަކީ ޖީ.އެސް.ޓީ އަށް ރަޖިސްޓަރީކޮށްފައިވާ ފަރާތެއްކަން އެންގުމުގެ ބޭނުމަށް، އެ ފަރާތުން ޓެކްސް ނެގޭ ޙަރަކާތްތައް ހިންގާ ކޮންމެ ތަނެއްގައި، މީރާއިން ދޫކޮށްފައިވާ ޖީ.އެސް.ޓީ ރެޖިސްޓްރޭޝަން ސެޓްފިކެޓް ޢާންމުކޮށް ފެންނަން ހުންނާނެހެން ބަހައްޓަންވާނެއެވެ.

(ނ) ރަޖިސްޓަރީކޮށްފައިވާ ފަރާތްތަކުގެ ތެރެއިން އޮންލައިންކޮށް ވިޔަފާރި ހިންގާ ފަރާތްތަކުން، އެ ފަރާތަކީ ޖީ.އެސް.ޓީއަށް ރަޖިސްޓަރީކޮށްފައިވާ ފަރާތެއްކަން އެންގުމުގެ ބޭނުމަށް، އެ ފަރާތުގެ ވިޔަފާރި ހިންގަން ބޭނުންކުރާ އޮންލައިން ޕޯޓަލްގައި އެ ފަރާތުގެ ޓިން އަދި މީރާއިން ކަނޑައަޅާ ލޯގޯ އާންމުކޮށް ފެންނަން ހުންނާނެހެން ހިމަނަންވާނެއެވެ.

11. ރަޖިސްޓަރީކުރުމާގުޅޭ ތްރެޝޯލްޑް ބަލާނެ ގޮތް

(ހ) ޤާނޫނުގެ 15 ވަނަ މާއްދާގައި ބަޔާންކޮށްފައިވާ ޓޫރިޒަމް ދާއިރާގައި ޓެކްސް ނެގޭ ޙަރަކާތެއް ހިންގާ ފަރާތަކުން، ޤާނޫނުގެ 16 ވަނަ މާއްދާގައި ބަޔާންކޮށްފައިވާ ޓޫރިޒަމް ދާއިރާނޫން އެހެން ދާއިރާތަކުގައި ޓެކްސް ނެގޭ ޙަރަކާތެއް ހިންގާ ނަމަ، ޖީ.އެސް.ޓީ އަށް ރަޖިސްޓަރީކުރުމަށް ލާޒިމުވާ ކަމަށް ޤާނޫނުގެ 51 ވަނަ މާއްދާގައި ބަޔާންކޮށްފައިވާ -/1,000,000 (އެއް މިލިއަން) ރުފިޔާގެ ތްރެޝޯލްޑް، އެ ފަރާތަކަށް ރައްދެއްނުވާނެއެވެ. އެބަހީ، އެފަދަ ފަރާތެއްގެ ޓެކްސް ނެގޭ އާމްދަނީ -/1,000,000 (އެއް މިލިއަން) ރުފިޔާއަށްވުރެ އިތުރުނުވިޔަސް، އެ ޙަރަކާތެއް ނިސްބަތްވާ ދާއިރާއެއްގައި ރަޖިސްޓަރީކުރަންވާނެއެވެ.

(ށ) މުދަލާއި ޚިދުމަތުގެ އަގުން ޓެކްސް ނެގުމުގެ ގަވާއިދުގެ 21 ވަނަ އިޞްލާޙަށް ޢަމަލުކުރަން ފަށާ ތާރީޚުގައި، ޤާނޫނުގެ 56 ވަނަ މާއްދާގެ ދަށުން މީރާގައި ރަޖިސްޓަރީކޮށްފައިވާ ފަރާތަކަށް މި މާއްދާގެ (ހ) ރައްދުވާނަމަ، އެ ފަރާތަކުން 1 އޮކްޓޫބަރު 2017 ގެ ކުރިން މި މާއްދާގެ (ހ) ގައިވާ އިލްތިޒާމުތައް ފުރިހަމަ ކުރަންވާނެއެވެ.

12. ޖީ.އެސް.ޓީ ނަގަން ފަށަންޖެހޭ ތާރީޚު

(ހ) ޤާނޫނުގެ 51 ވަނަ މާއްދާގެ ދަށުން މީރާގައި ރަޖިސްޓަރީކުރުން ލާޒިމުވާ ފަރާތްތަކުންނާއި، ޤާނޫނުގެ 53 ވަނަ މާއްދާގެ ދަށުން އަމިއްލަ އިޚުތިޔާރުގައި ރަޖިސްޓަރީކުރުމަށް އެދި ހުށަހަޅާ ފަރާތްތަކުން، މުދަލާއި ޚިދުމަތް ލިބިގަންނަ ފަރާތްތަކުގެ އަތުން ޤާނޫނާއި މި ގަވާއިދުގައިވާ ގޮތުގެމަތިން ޖީ.އެސް.ޓީ ނަގަންވާނީ، މި ގަވާއިދުގެ 10 ވަނަ މާއްދާގެ (ހ) ގެ ދަށުން ދޫކުރާ ޖީ.އެސް.ޓީ ރެޖިސްޓްރޭޝަން ސެޓްފިކެޓްގައިވާ ތާރީޚުން ފެށިގެންނެވެ.

(ށ) ޤާނޫނުގެ 51 ވަނަ މާއްދާގެ ދަށުން މީރާގައި ރަޖިސްޓަރީކުރުން ލާޒިމުވާ ފަރާތަކުން، ނުވަތަ ޤާނޫނުގެ 53 ވަނަ މާއްދާގެ ދަށުން އަމިއްލަ އިޚުތިޔާރުގައި ރަޖިސްޓަރީކުރުމަށް އެދި ހުށަހަޅާ ފަރާތަކުން، އެ ފަރާތަށް ދޫކުރެވިފައިވާ ޖީ.އެސް.ޓީ ރެޖިސްޓްރޭޝަން ސެޓްފިކެޓްގައިވާ ތާރީޚުގެ ކުރިން ކޮށްފައިވާ މުޢާމަލާތެއްގެ މަޤްޞަދަކީ ޓެކްސް ދެއްކުމުން އެއްކިބާވުންކަމަށް މީރާއަށް ޤަބޫލުކުރެވޭނަމަ، މި ގަވާއިދުގެ 13 ވަނަ މާއްދާގެ (ނ) ގައިވާ ފޮމިއުލާ ބޭނުންކޮށްގެން އެ މުޢާމަލާތަކުން ހިސާބުކުރެވޭ ޖީ.އެސް.ޓީގެ އަދަދު މީރާއަށް ދެއްކުމަށް އެ ފަރާތަށް އެންގުމުގެ އިޚްތިޔާރު މީރާއަށް ލިބިގެންވެއެވެ.

(ނ) ޤާނޫނުގެ 51 ވަނަ މާއްދާގެ (ޅ) ގެ ބޭނުމަށް، ވިޔަފާރި ފަށާ ދުވަސް ކަމަށް ބުނެފައި އެވަނީ، އެ ވިޔަފާރި ހިންގުމުގެ ހުއްދަ ސަރުކާރުގެ ކަމާބެހޭ އިދާރާއިން އެ ފަރާތަކަށް ދޫކުރާ ދުވަސް ނުވަތަ، އެފަދަ ހުއްދައެއް ނަގަން ނުޖެހޭ ޙާލަތްތަކުގައި، ވިޔަފާރި ހިންގަން ފަށާ ދުވަހަށެވެ.

(ރ) (އުނިކުރެވިފައި)

(ބ) (އުނިކުރެވިފައި)

13. ރަޖިސްޓަރީ ނުކޮށް ޖީ.އެސް.ޓީ ނެގުން މަނާކުރުން

(ހ) އެއްވެސް ފަރާތަކުން، ޤާނޫނާއި މި ގަވާއިދުގައިވާ ގޮތުގެމަތިން މީރާގައި ރަޖިސްޓަރީނުކޮށް، ނުވަތަ ރަޖިސްޓަރީ ކުރިކަމުގައިވިޔަސް ޖީ.އެސް.ޓީ ރެޖިސްޓްރޭޝަން ސެޓްފިކެޓްގައިވާ ތާރީޚުގެ ކުރިން، ނުވަތަ ރަޖިސްޓަރީ ބާޠިލުކުރުމަށްފަހު، މުދަލާއި ޚިދުމަތް ލިބިގަންނަ ފަރާތްތަކުގެ އަތުން ޖީ.އެސް.ޓީ ނެގުމަކީ ކުށެކެވެ.

(ށ) ޤާނޫނުގެ 51 ވަނަ މާއްދާގެ ދަށުން މީރާގައި ރަޖިސްޓަރީކުރުން ލާޒިމުވާ ފަރާތެއް، އެ ފަރާތެއް މީރާގައި ރަޖިސްޓަރީކުރުމަށް ހުށަހެޅުމަށް ޤާނޫނުގައި ދީފައިވާ މުއްދަތުގެ ތެރޭގައި ރަޖިސްޓަރީކުރުމަށް ހުށަނޭޅިކަމުގައިވިޔަސް، އެ ފަރާތެއް މީރާގައި ރަޖިސްޓަރީކުރުމަށް ޤާނޫނުގައި ދީފައިވާ މުއްދަތު ހަމަވާ ދުވަހާ ޖެހިގެން އަންނަ ދުވަހުން ފެށިގެން ފޯރުވައިދޭ މުދަލާއި ޚިދުމަތުގެ އަގުގެ ތެރޭގައި ޤާނޫނުގައި ބަޔާންކޮށްފައިވާ މިންވަރަށް ޖީ.އެސް.ޓީ ހިމެނިފައިވާ ކަމުގައި ބަލައި، އެ ދުވަހުން ފެށިގެން ފޯރުވައިދޭ މުދަލާއި ޚިދުމަތުގެ ނިސްބަތުން ޤާނޫނުގައިވާ ގޮތުގެމަތިން މީރާއަށް ޖީ.އެސް.ޓީ ބަޔާން ހުށަހަޅައި ޖީ.އެސް.ޓީ ދައްކަންވާނެއެވެ.

(ނ) ޤާނޫނުގެ 51 ވަނަ މާއްދާގެ ދަށުން މީރާގައި ރަޖިސްޓަރީކުރުން ލާޒިމުވާ ފަރާތަކުން، ނުވަތަ ޤާނޫނުގެ 53 ވަނަ މާއްދާގެ ދަށުން އަމިއްލަ އިޚުތިޔާރުގައި މީރާގައި ރަޖިސްޓަރީކުރުމުގެ ސަބަބުން ޖީ.އެސް.ޓީ ނަގަންޖެހޭ ފަރާތަކުން، ޤާނޫނާއި މި ގަވާއިދުގެ ދަށުން ޖީ.އެސް.ޓީ ނަގަންޖެހޭ އެއްވެސް މުޢާމަލާތަކުން ޖީ.އެސް.ޓީ ނަގާފައި ނުވާނަމަ، އެ ފަރާތަކީ ރަޖިސްޓަރީކޮށްފައިވާ ފަރާތެއް ކަމުގައިވީނަމަވެސް ނުވަތަ ނުވީނަމަވެސް، އެ ފަރާތަކުން އެ މުޢާމަލާތަކާއި ގުޅިގެން މީރާއަށް ދައްކަންޖެހޭ ޖީ.އެސް.ޓީގެ އަދަދަކީ އަންނަނިވި ފޮމިއުލާ ބޭނުންކޮށްގެން ހިސާބުކުރުމުން އަންނަ އަދަދެވެ.

t / (1+t) × މުޢާމަލާތުގެ މުޤާބިލުގެ ގޮތުގައި ލިބުނު ޖުމުލަ އަދަދު 

t އަކީ ޤާނޫނުގެ 15 ވަނަ މާއްދާ ނުވަތަ 16 ވަނަ މާއްދާގެ ދަށުން އެ މުޢާމަލާތުން ނަގަންޖެހޭ ޖީ.އެސް.ޓީގެ މިންވަރު.

(ރ) ޤާނޫނާއި މި ގަވާއިދުގެ ދަށުން ޖީ.އެސް.ޓީ ނެގުން ހުއްދަ ނޫން ފަރާތަކުން ފޯރުވައިދޭ އެއްވެސް މުދަލަކަށް ނުވަތަ ޚިދުމަތަކަށް ޖީ.އެސް.ޓީ ނަގައިފިނަމަ، ނުވަތަ ރަޖިސްޓަރީކޮށްފައިވާ ފަރާތަކުން ފޯރުވައިދޭ މުދަލުގެ ނުވަތަ ޚިދުމަތްތަކުގެ ތެރެއިން ޖީ.އެސް.ޓީ ނަގަން ނުޖެހޭ މުދަލަކަށް ނުވަތަ ޚިދުމަތަކަށް ޖީ.އެސް.ޓީ ނަގައިފިނަމަ، ނުވަތަ ނަގަންޖެހޭ އަދަދަށްވުރެ އިތުރަށް ޖީ.އެސް.ޓީ ނަގައިފިނަމަ، އަދި އެ ފައިސާ ނެގުނު ޓެކްސް ނެގޭ މުއްދަތުގެ ނިޔަލަށް މުދާ ނުވަތަ ޚިދުމަތް ލިބިގަތް ފަރާތަށް އެ އަދަދު އަނބުރައި ދީފައި ނުވާނަމަ، އެ މުއްދަތުގެ ޖީ.އެސް.ޓީ ބަޔާނުގައި ހިމަނައި، އެ އަދަދު މީރާއަށް ދައްކަންޖެހޭނެއެވެ.

(ބ) މި މާއްދާގެ (ރ) ގައި ބަޔާންކޮށްފައިވާ ގޮތަށް އެ އަދަދު މީރާއަށް ދައްކައިފައި އޮތް ނަމަވެސް، މުދާ ނުވަތަ ޚިދުމަތް ލިބިގަތް ފަރާތަށް އެ އަދަދު އަނބުރައި ރައްދުކޮށްފިނަމަ، ޤާނޫނާއި މި ގަވާއިދާ އެއްގޮތްވާ ގޮތުގެ މަތީން ކްރެޑިޓް ނޯޓެއް ތައްޔާރުކޮށް، އެ މުޢާމަލާތް ޖީ.އެސް.ޓީ ބަޔާނުގައި ހިމަނައިގެން، އެ އަދަދު މީރާއިން އަނބުރައި ހޯދިދާނެއެވެ.

14. ޖީ.އެސް.ޓީ ލާޒިމުވާ ވަގުތު

މި ގަވާއިދުގައި ކަނޑައެޅިގެން އެހެން ގޮތަކަށް ބަޔާންކޮށްފައި ނުވާނަމަ، ފޯރުވައިދެވޭ މުދަލަކާ ނުވަތަ ޚިދުމަތަކާ ގުޅޭގޮތުން ޖީ.އެސް.ޓީ ލާޒިމުވާ ވަގުތު ކަމަށް ބަލާނީ، އެ މުދަލުގެ ނުވަތަ ޚިދުމަތުގެ އަގަށްވާ ޓެކްސް އިންވޮއިސް ނުވަތަ ރަސީދު ނުވަތަ ކްރެޑިޓް ނޯޓް ނުވަތަ ޑެބިޓް ނޯޓް ތައްޔާރުކުރާ ވަގުތާއި، އެ މުދަލުގެ ނުވަތަ ޚިދުމަތުގެ އަގު އެކުގައި ނުވަތަ އެއިން ބައެއް އަދާކުރާ ވަގުތާއި، މި ދެ ވަގުތުންކުރެ ކުރިން އަންނަ ވަގުތެވެ.

15. އެޑްވާންސް ޕޭމަންޓްތަކާއި އަނބުރާ ރައްދުނުކުރާ ޑިޕޮސިޓްތައް އަދި ރިޓެންޝަން ފައިސާ

(ހ) ފޯރުވައިދިން މުދަލަކަށް ނުވަތަ ޚިދުމަތަކަށް ޓެކްސް އިންވޮއިސް ދޫކުރުމުގެ ކުރިން އެ މުދަލުގެ ނުވަތަ ޚިދުމަތުގެ އަގު އެއްކޮށް ނުވަތަ އެއިން ބައެއް ލިބިއްޖެނަމަ، އެ މުދާ ނުވަތަ ޚިދުމަތް ފޯރުކޮށްދިން ފަރާތުން، އެ ފައިސާ ލިބުނު ދުވަހު، އެ ލިބުނު ފައިސާއަށްވާ ޖީ.އެސް.ޓީ ދައްކަންވާނެއެވެ.  

(ށ) ފޯރުވައިދިން މުދަލަކަށް ނުވަތަ ޚިދުމަތަކަށް ޓެކްސް އިންވޮއިސް ދޫކުރުމުގެ ކުރިން، އަނބުރާ ރައްދުނުކުރާ ގޮތަށް ޑިޕޮސިޓެއް ނަގައިފައިވާނަމަ، އެ ޑިޕޮސިޓްގެ އަދަދުން އެ މުދަލަށް ނުވަތަ ޚިދުމަތަށް ދައްކަންޖެހޭ މުޤާބިލުކަމަށް ނުވަތަ މުޤާބިލުގެ ބައެއްކަމަށް ކަނޑައަޅާ އަދަދުން، އެ މުދާ ނުވަތަ ޚިދުމަތް ފޯރުކޮށްދިން ފަރާތުން އެ ގޮތަށް ކަނޑައެޅި ދުވަހު ޖީ.އެސް.ޓީ ދައްކަންވާނެއެވެ. 

(ނ) އިމާރާތްކުރުމުގެ ޚިދުމަތެއް ފޯރުވައިދޭ ފަރާތަކުން އެ ޚިދުމަތުގެ ރިޓެންޝަން ފައިސާއަށްވާ ޖީ.އެސް.ޓީ ދައްކާނީ، ރިޓެންޝަން ފައިސާގެ ޓެކްސް އިންވޮއިސް ދޫކުރާ ވަގުތު ނުވަތަ ފައިސާ ލިބުނު ވަގުތު، މި ދެ ވަގުތުން ކުރެ ކުރިން އަންނަ ވަގުތެއްގައެވެ. މި އަކުރަށް ޢަމަލުކުރާނީ މި މާއްދާގެ (ހ) އާ ޚިލާފުނުވާނެ ގޮތުގެ މަތިންނެވެ.

16. އަނބުރައި ރައްދުކުރާ ޑިޕޮސިޓް

ރަޖިސްޓަރީކޮށްފައިވާ ފަރާތުގެ މުދަލަކަށް ލިބިދާނެ ގެއްލުމެއްގެ ބަދަލު ނެގުމުގެ ބޭނުމަށް، އަދި އެ މުދަލަށް ގެއްލުމެއް ނުލިބޭނަމަ މުދާ ލިބިގަތް ފަރާތަށް އަނބުރައި ރައްދުކުރާގޮތަށް ނެގޭ ޑިޕޮސިޓުން ޖީ.އެސް.ޓީ ނަގާކަށް ނުޖެހޭނެއެވެ.

17. ފައިސާ ދައްކާފައިވާ މުދަލެއް ނުވަތަ ޚިދުމަތެއް ބޭނުން ނުކުރެވުން

މުދަލެއް ނުވަތަ ޚިދުމަތެއް ލިބިގަތުމުގެ ބޭނުމުގައި އެޑްވާންސް ޕޭމަންޓެއް ނުވަތަ ޑިޕޮސިޓެއް ދައްކާފައިވާ ފަރާތަކުން އެ މުދަލެއް ނުވަތަ ޚިދުމަތެއް ބޭނުން ނުކޮށްފިނަމަ، އަދި އެ ފައިސާ ދެއްކި ފަރާތަށް އެ އެޑްވާންސް ޕޭމަންޓް ނުވަތަ ޑިޕޮސިޓް ނުވަތަ އެއިން ބައެއް ރީފަންޑުކޮށްދީފިނަމަ، އަދި އެގޮތުން ރީފަންޑުކޮށްދެވުނު އަދަދުން މީރާއަށް ޖީ.އެސް.ޓީ ދައްކާފައިވާނަމަ، ރީފަންޑުކޮށްދެވުނު ޓެކްސް ނެގޭ މުއްދަތުގެ އައުޓްޕުޓް ޓެކުހުން، ރީފަންޑުކޮށްދެވުނު އަދަދުން ދައްކާފައިވާ ޖީ.އެސް.ޓީގެ އަދަދު އުނިކުރެވިދާނެއެވެ.

18. ގުޅުންހުރި ފަރާތްތަކަށް ފޯރުވައިދޭ މުދަލާއި ޚިދުމަތާ ގުޅޭގޮތުން ޖީ.އެސް.ޓީ ލާޒިމުވާ ވަގުތު

ގުޅުންހުރި ފަރާތްތަކަށް ފޯރުވައިދޭ މުދަލާއި ޚިދުމަތާ ގުޅޭގޮތުން ޖީ.އެސް.ޓީ ލާޒިމުވާ ވަގުތަކީ:

(ހ) މުދާ ނުވަތަ ޚިދުމަތް ފޯރުވައިދެވެނީ ރަޖިސްޓަރީކޮށްފައިވާ ފަރާތުގެ އަމިއްލަ ބޭނުމަށް ކަމުގައިވާނަމަ، އަމިއްލަ ބޭނުމަށް މުދާ ނަގާ ވަގުތު ނުވަތަ ޚިދުމަތް ފޯރުވައިދީ ނިމޭ ވަގުތު؛

(ށ) މުދާ ނުވަތަ ޚިދުމަތް ފޯރުވައިދެވެނީ ރަޖިސްޓަރީކޮށްފައިވާ ފަރާތާ ގުޅުންހުރި ފަރާތަކަށް ކަމުގައިވާނަމަ، އެ ފަރާތުގެ ބޭނުމަށް އެ މުދާ ފޯރުވައިދޭ ވަގުތު ނުވަތަ ޚިދުމަތް ފޯރުވައިދީ ނިމޭ ވަގުތެވެ.

19. ފައިސާފޮއްޗެއް ނުވަތަ ޓޯކަނެއް ބޭނުންކުރާ މެޝިނަކުން ކުރެވޭ މުޢާމަލާތާ ގުޅޭގޮތުން ޖީ.އެސް.ޓީ ލާޒިމުވާ ވަގުތު

(ހ) ފައިސާފޮއްޗެއް ބޭނުންކޮށްގެން އޮޕަރޭޓްކުރާ މެޝިނަކުން ނުވަތަ މީޓަރަކުން ނުވަތަ އެނޫންވެސް ޑިވައިސްއެއް މެދުވެރިކޮށް މުޢާމަލާތުގެ އަގު ލިބޭ މުދަލާއި ޚިދުމަތާ ގުޅޭގޮތުން ޖީ.އެސް.ޓީ ލާޒިމުވާ ވަގުތަކީ، އެ މެޝިނުން ނުވަތަ މީޓަރުން ނުވަތަ ޑިވައިސްއިން ފައިސާފޮތި ނަގާ ވަގުތެވެ.

(ށ) ޓޯކަނެއް ބޭނުންކޮށްގެން އޮޕަރޭޓްކުރާ މެޝިނަކުން ނުވަތަ މީޓަރަކުން ނުވަތަ އެނޫންވެސް ޑިވައިސްއެއް މެދުވެރިކޮށް މުޢާމަލާތުގެ އަގު ލިބޭ މުދަލާއި ޚިދުމަތާ ގުޅޭގޮތުން ޖީ.އެސް.ޓީ ލާޒިމުވާ ވަގުތަކީ، ޓޯކަން ވިއްކައިގެން ފައިސާ ލިބޭ ވަގުތެވެ.

20. ވައުޗަރެއް ނުވަތަ އެފަދަ އެހެން އެއްޗެއް މެދުވެރިކޮށް ކުރެވޭ މުޢާމަލާތާ ގުޅޭގޮތުން ޖީ.އެސް.ޓީ ލާޒިމުވާ ވަގުތު

(ހ) ވައުޗަރެއް ނުވަތަ އެފަދަ އެހެން އެއްޗެއް ވިއްކުމަކީ ނުވަތަ ދޫކުރުމަކީ މުދަލެއް ނުވަތަ ޚިދުމަތެއް ފޯރުވައިދިނުން ކަމުގައި ބެލެވޭނެއެވެ.

(ށ) މުދަލެއް ނުވަތަ ޚިދުމަތެއް ފޯރުވައިދިނުމުގެ މުޤާބިލަކީ ވައުޗަރެއް ނުވަތަ އެފަދަ އެހެން އެއްޗެއް ރެޑީމްކުރުން ކަމުގައިވާނަމަ، އެ މުދާ ނުވަތަ ޚިދުމަތާ ގުޅޭގޮތުން ޖީ.އެސް.ޓީ ލާޒިމުވާ ވަގުތަކީ އެ ވައުޗަރު ނުވަތަ އެފަދަ އެހެން އެއްޗެއް ވިއްކި ނުވަތަ ދޫކުރި ވަގުތެވެ.

(ނ) މުދަލެއް ނުވަތަ ޚިދުމަތެއް ފޯރުވައިދިނުމުގެ މުޤާބިލުން ބަޔަކީ ވައުޗަރެއް ނުވަތަ އެފަދަ އެހެން އެއްޗެއް ރެޑީމްކުރުން ކަމުގައިވާނަމަ، އެ މުދާ ނުވަތަ ޚިދުމަތާ ގުޅޭގޮތުން ޖީ.އެސް.ޓީ ލާޒިމުވާ ވަގުތަކީ:

(1) މުޤާބިލުގެ ގޮތުގައި އެ ވައުޗަރު ނުވަތަ އެފަދަ އެހެން އެއްޗެއް ރެޑީމްކުރެވުނު މިންވަރަކަށް، މި މާއްދާގެ (ށ) ގައިވާ ގޮތުގެމަތިން ކަނޑައެޅޭ ވަގުތު؛ އަދި

(2) އެ ވައުޗަރު ނުވަތަ އެފަދަ އެހެން އެއްޗެއް ރެޑީމްކޮށްގެން ނޫން ގޮތަކަށް މުޤާބިލު ލިބޭ މިންވަރަކަށް، ޤާނޫނުގެ 17 ވަނަ މާއްދާގައިވާ ގޮތުގެމަތިން ކަނޑައެޅޭ ވަގުތެވެ.

21. ލޯޔަލްޓީ ސްކީމެއްގެ ދަށުން ދެވޭ ޕޮއިންޓް މެދުވެރިކޮށް ކުރެވޭ މުޢާމަލާތާ ގުޅޭގޮތުން ޖީ.އެސް.ޓީ ލާޒިމުވާ ވަގުތު

(ހ) މުދަލެއް ނުވަތަ ޚިދުމަތެއް ފޯރުވައިދިނުމުގެ މުޤާބިލަކީ ލޯޔަލްޓީ ސްކީމެއްގެ ބައިވެރިއަކަށް ލިބިފައިވާ ޕޮއިންޓް ރެޑީމްކުރުން ކަމުގައިވާނަމަ، އެ މުދާ ނުވަތަ ޚިދުމަތާ ގުޅޭގޮތުން ޖީ.އެސް.ޓީ ލާޒިމުވާ ވަގުތަކީ، އެ ޕޮއިންޓް ރެޑީމްކުރި ވަގުތެވެ.

(ށ) ލޯޔަލްޓީ ސްކީމް ހިންގާ ފަރާތަކީ، އެ މުދާ ނުވަތަ ޚިދުމަތް ފޯރުވައިދޭ ފަރާތް ކަމުގައިވީނަމަވެސް އަދި ނުވީކަމުގައިވީނަމަވެސް މި މާއްދާގެ (ހ) ރައްދުވާނެއެވެ.

22. ގުރުއަތު ލައިގެން ހަދިޔާ ދޭ ގޮތަށް ކުރެވޭ މުޢާމަލާތާ ގުޅޭގޮތުން ޖީ.އެސް.ޓީ ލާޒިމުވާ ވަގުތު

(ހ) ހަދިޔާއެއް ދޭ ގޮތަށް ހިންގޭ ގުރުއަތެއްގައި ބައިވެރިވުމުގެ މުޤާބިލެއްގެ ގޮތުގައި އެއްވެސް ފަރާތަކުން ފައިސާ ނުވަތަ އެނޫންވެސް އެއްޗެއް ދެއްކުމަކީ، އެ ގުރުއަތު ރާވާ ފަރާތުން ޚިދުމަތެއް ފޯރުވައިދިނުން ކަމުގައި ބެލެވޭނެއެވެ.

(ށ) މި މާއްދާގެ (ހ) ގައި ބަޔާންކޮށްފައިވާ ޚިދުމަތާ ގުޅޭގޮތުން ޖީ.އެސް.ޓީ ލާޒިމުވާ ވަގުތަކީ، އެ ގުރުއަތުގައި ބައިވެރިވުމަށްޓަކައި ދައްކަންޖެހޭ މުޤާބިލު އަދާކުރާ ވަގުތެވެ.

22-1. ފައިސާނޫން އެއްޗަކުން އަގު އަދާކުރާ މުޢާމަލާތާ ގުޅޭގޮތުން ޖީ.އެސް.ޓީ ލާޒިމުވާ ވަގުތު

(ހ) މި ގަވާއިދުގައި އެހެން ގޮތަކަށް ބަޔާންކޮށްފައިނުވާނަމަ، ފައިސާ ނޫން އެއްޗަކުން އަގު އަދާކުރާ މުޢާމަލާތާ ގުޅޭގޮތުން ޖީ.އެސް.ޓީ ލާޒިމުވާ ވަގުތަކީ، އަންނަނިވި ވަގުތުތަކުގެ ތެރެއިން ކުރިން އަންނަ ވަގުތެވެ.

(1) އެ މުދަލުގެ ނުވަތަ ޚިދުމަތުގެ އަގަށްވާ އިންވޮއިސް ތައްޔާރުކުރާ ވަގުތު؛

(2) އެ މުދަލުގެ ނުވަތަ ޚިދުމަތުގެ މުޤާބިލު އެކުގައި ނުވަތަ އެއިން ބައެއް އަދާކުރާ ވަގުތު.

(ށ) މި މާއްދާގެ (ހ) ރައްދުވާ މުޢާމަލާތެއްނަމަ، މުޢާމަލާތުގައި ހިމެނޭ ދެ ފަރާތުގެ ތެރެއިން ކޮންމެ ފަރާތަކުން ވެސް އަނެއް ފަރާތަށް މުދަލެއް ނުވަތަ ޚިދުމަތެއް ފޯރުވައިދިންކަމުގައި ބަލަންވާނެއެވެ. އަދި ކޮންމެ ފަރާތަކުން ވެސް، އެ ފަރާތަށް ލިބޭ މުދާ ނުވަތަ ޚިދުމަތަކީ، އެ ފަރާތުން ފޯރުވައިދިން މުދަލުގެ ނުވަތަ ޚިދުމަތުގެ މުޤާބިލު ކަމުގައި ބަލަންވާނެއެވެ.

(ނ) މި މާއްދާ ރައްދުވާ މުޢާމަލާތެއްގެ މުޤާބިލަކީ، ނުއުފުލޭ މުދަލެއް ނުވަތަ ނުއުފުލޭ މުދަލެއްގެ ބައެއް ބޭނުންކުރުމުގެ ޙައްޤު ދިނުންކަމަށްވާނަމަ، މުޤާބިލު އަދާކުރި ވަގުތުކަމަށް ބަލާނީ، އަންނަނިވި ވަގުތުތަކުގެ ތެރެއިން ކުރިން އަންނަ ވަގުތެވެ.

(1) އެ ނުއުފުލޭ މުދާ ނުވަތަ އެއިން ބައެއް، ބޭނުންކުރުމުގެ ޙައްޤު މުދާ ނުވަތަ ޚިދުމަތް ފޯރުވައިދިން ފަރާތަށް ލިބޭ ވަގުތު؛

(2) އެ ނުއުފުލޭ މުދާ ނުވަތަ އެއިން ބައެއް، މުދާ ނުވަތަ ޚިދުމަތް ފޯރުވައިދިން ފަރާތުން ބޭނުންކުރަން ފަށާ ވަގުތު.

23. ޓެކްސް އިންވޮއިސް ނުވަތަ ރަސީދު ތައްޔާރުކުރުން

(ހ) ރަޖިސްޓަރީކޮށްފައިވާ ފަރާތުން ފޯރުވައިދޭ ކޮންމެ މުދަލަކަށްވެސް، އަންނަނިވި ތާރީޚުން ފެށިގެން 3 (ތިނެއް) ދުވަހުގެ ތެރޭގައި ޓެކްސް އިންވޮއިސްއެއް ނުވަތަ ރަސީދެއް ތައްޔާރުކުރަންވާނެއެވެ.

(1) ފޯރުވައިދިން މުދަލަކީ އެ މުދާ ވިއްކާ ތަނުން ބޭރަށް ގެންދާ ޒާތުގެ މުދަލަކަށްވާނަމަ، އެ ތަނުން ބޭރަށް އެ މުދާ ގެންދާ ތާރީޚު؛

(2) ފޯރުވައިދިން މުދަލަކީ އެ މުދާ ވިއްކާ ތަނުން ބޭރަށް ގެންދާ ޒާތުގެ މުދަލަކަށް ނުވާނަމަ، މުދާ ގަންނަ ފަރާތުގެ ބޭނުމަށް އެ މުދާ ފޯރުވައިދޭ ތާރީޚު.

(ށ) ރަޖިސްޓަރީކޮށްފައިވާ ފަރާތުން ފޯރުވައިދޭ ކޮންމެ ޚިދުމަތަކަށްވެސް، އެ ޚިދުމަތް ފޯރުވައިދީ ނިމޭ ތާރީޚުން ފެށިގެން 3 (ތިނެއް) ދުވަހުގެ ތެރޭގައި ޓެކްސް އިންވޮއިސްއެއް ނުވަތަ ރަސީދެއް ތައްޔާރުކުރަންވާނެއެވެ.

(ނ) މި މާއްދާގެ (ހ) ގައި ނުވަތަ (ށ) ގައި ބަޔާންކޮށްފައިވާ މުއްދަތުގެ ތެރޭގައި ޓެކްސް އިންވޮއިސްއެއް ނުވަތަ ރަސީދެއް ތައްޔާރު ނުކުރި ކަމުގައި ވިޔަސް، ޤާނޫނުގެ 17 ވަނަ މާއްދާގައި ބަޔާންކޮށްފައިވާ ޖީ.އެސް.ޓީ ލާޒިމުވާ ވަގުތު ބެލުމުގެ ބޭނުމަށް، ޓެކްސް އިންވޮއިސްއެއް ނުވަތަ ރަސީދެއް އެ މުއްދަތު ނިމޭ ދުވަހު ތައްޔާރުކުރިކަމަށް ބަލަންވާނެއެވެ.

24. ކްރެޑިޓް ނޯޓް ނުވަތަ ޑެބިޓް ނޯޓް ތައްޔާރުކުރުން

(ހ) ރަޖިސްޓަރީކޮށްފައިވާ ފަރާތުން ފޯރުވައިދޭ މުދަލަކަށް ނުވަތަ ޚިދުމަތަކަށް ޓެކްސް އިންވޮއިސްއެއް ތައްޔާރުކޮށްފައިވަނިކޮށް، އެއްވެސް ސަބަބަކާހުރެ އެ މުދަލުގެ ނުވަތަ ޚިދުމަތުގެ އަގަށް ބަދަލު އަތުވެއްޖެނަމަ، އެ ބަދަލު އައިކަން އެނގުނު ތާރީޚުން ފެށިގެން 3 (ތިނެއް) ދުވަހުގެ ތެރޭގައި ކްރެޑިޓް ނޯޓެއް ނުވަތަ ޑެބިޓް ނޯޓެއް ތައްޔާރުކުރަންވާނެއެވެ.

(ށ) ރަޖިސްޓަރީކޮށްފައިވާ ފަރާތުން ފޯރުވައިދޭ މުދަލަކާއި ނުވަތަ ޚިދުމަތަކާ ގުޅޭގޮތުން މި މާއްދާގެ (ހ) ގައި ބަޔާންކޮށްފައިވާ މުއްދަތުގެ ތެރޭގައި ކްރެޑިޓް ނޯޓެއް ނުވަތަ ޑެބިޓް ނޯޓެއް ތައްޔާރު ނުކުރިކަމުގައިވިޔަސް، ޤާނޫނުގެ 17 ވަނަ މާއްދާގައި ބަޔާންކޮށްފައިވާ ޖީ.އެސް.ޓީ ލާޒިމުވާ ވަގުތު ނިސްބަތްވާ ޓެކްސް ނެގޭ މުއްދަތުގެ ޖީ.އެސް.ޓީ ބަޔާނުގައި އެ މުޢާމަލާތް ހިމަނަންވާނެއެވެ.

25. ގުޅުންހުރި ފަރާތްތަކަށް ފޯރުވައިދޭ މުދަލާއި ޚިދުމަތުގެ އަގު

(ހ) ގުޅުންހުރި ފަރާތްތަކަށް ނުވަތަ ރަޖިސްޓަރީކޮށްފައިވާ ފަރާތުގެ އަމިއްލަ ބޭނުމަށް ފޯރުވައިދޭ މުދަލާއި ޚިދުމަތުގެ އަގަކީ އެ މުދަލުގެ ނުވަތަ ޚިދުމަތުގެ ބާޒާރުގެ އަގުން ޖީ.އެސް.ޓީގެ އަދަދަށްވާ ފައިސާ ކެނޑުމުން އަންނަ އަދަދެވެ. 

(ށ) ޤާނޫނާއި މި ގަވާއިދުގެ ބޭނުމަށް، މުދަލެއްގެ ނުވަތަ ޚިދުމަތެއްގެ ބާޒާރުގެ އަގު ކަމަށް ބުނެފައި އެވަނީ، މުދަލެއް ނުވަތަ ޚިދުމަތެއް ފޯރުވައިދޭ ދުވަހު، ހަމަ އެފަދަ ހާލަތުތަކުގައި، ގުޅުންހުރި ފަރާތެއް ނޫން އެހެން ފަރާތަކަށް، އެއްވެސް ޝަރުޠެއް ނެތި، ދިވެހިރާއްޖޭގައި މުދަލެއް ނުވަތަ ޚިދުމަތެއް ފޯރުވައިދިނުމުން، އޭގެ މުޤާބިލުގެ ގޮތުގައި ފައިސާއިން ލިބޭނެކަމަށް އަންދާޒާކުރެވޭ އަދަދެވެ.

(ނ) ފޯރުވައިދޭ މުދާ ނުވަތަ ޚިދުމަތުގެ ބާޒާރުގެ އަގު މި މާއްދާގެ (ށ) ގެ ދަށުން ކަނޑައެޅެން ނެތްނަމަ، އެ މުދަލެއްގެ ނުވަތަ ޚިދުމަތެއްގެ ބާޒާރުގެ އަގު ކަމަށް ބަލާނީ، އެ ބާވަތުގެ އެހެން މުދަލެއް ނުވަތަ ޚިދުމަތެއް ފޯރުވައިދޭ ދުވަހު، ހަމަ އެފަދަ ހާލަތުތަކުގައި، ގުޅުންހުރި ފަރާތެއް ނޫން އެހެން ފަރާތަކަށް، އެއްވެސް ޝަރުޠެއް ނެތި، ދިވެހިރާއްޖޭގައި އެ މުދާ ނުވަތަ ޚިދުމަތް ފޯރުވައިދިނުމުން، އޭގެ މުޤާބިލުގެ ގޮތުގައި ފައިސާއިން ލިބޭނެކަމަށް އަންދާޒާކުރެވޭ އަދަދެވެ.

(ރ) ފޯރުވައިދޭ މުދާ ނުވަތަ ޚިދުމަތުގެ ބާޒާރުގެ އަގު މި މާއްދާގެ (ށ) ނުވަތަ (ނ) ގެ ދަށުން ކަނޑައެޅެން ނެތްނަމަ، އެ މުދަލެއްގެ ނުވަތަ ޚިދުމަތެއްގެ ބާޒާރުގެ އަގު ކަމަށް ބަލާނީ، އެ މުދަލުގެ ނުވަތަ ޚިދުމަތުގެ މުޤާބިލުގެ ގޮތުގައި ފައިސާއިން ލިބޭނެކަމަށް، މީރާއިން ހުއްދަކޮށްފައިވާ އުސޫލަކުން އަންދާޒާކުރެވޭ އަދަދެވެ.

(ބ) މި މާއްދާގެ (ނ) ގެ ބޭނުމަށް، އެ ބާވަތުގެ އެހެން މުދަލެއް ނުވަތަ ޚިދުމަތެއް ކަމަށް ބުނެފައި އެވަނީ، ސިފަތަކަށާއި، ފެންވަރަށާއި، ބޭނުމަށާއި، އަދަދަށާއި، ބައިތަކަށާއި، މެޓީރިއަލްއަށާއި، ރެޕިއުޓޭޝަންއަށް ބަލާއިރު، ފޯރުވައިދިން މުދާ ނުވަތަ ޚިދުމަތާ އެއްގޮތް ނުވަތަ ވަރަށް އެއްގޮތް ނުވަތަ ބޮޑުބައެއް އެއްގޮތް މުދަލަކަށް ނުވަތަ ޚިދުމަތަކަށެވެ.

(ޅ) މުދަލެއްގެ ނުވަތަ ޚިދުމަތެއްގެ ބާޒާރުގެ އަގުގެ ތެރޭގައި އެ މުދަލުގެ ނުވަތަ ޚިދުމަތުގެ އަގުން، ޤާނޫނުގެ ދަށުން ނެގޭ ޖީ.އެސް.ޓީ ހިމެނެއެވެ.

(ކ) ގުޅުންހުރި ފަރާތަކަށް ފޯރުވައިދޭ މުދަލާއި ޚިދުމަތުގެ މުޤާބިލުގައި، އަގު އަދާކުރަނީ ފައިސާ ނޫން އެއްޗަކުން ކަމުގައިވީނަމަވެސް، މި މާއްދާގެ (ހ) ރައްދުވާނެއެވެ.

25-1. ގުޅުންހުރި ފަރާތެއް މެދުވެރިކޮށް ފޯރުވައިދޭ މުދަލާއި ޚިދުމަތުގެ އަގު

(ހ) މުދަލެއް ނުވަތަ ޚިދުމަތެއް ފޯރުވައިދެނީ މުދާ ނުވަތަ ޚިދުމަތް ފޯރުވައިދޭ ފަރާތާ ގުޅުންހުރި ފަރާތެއް މެދުވެރިވެގެން، ނުސީދާކޮށް ކަމުގައިވާނަމަ، އެ މުޢާމަލާތުގެ މުޤާބިލުކަމަށް ބަލާނީ ޤާނޫނުގެ 19 ވަނަ މާއްދާގެ (ހ) އާއި (ށ) ގައި ބަޔާންކޮށްފައިވާ، އަންނަނިވި އަދަދުތަކުގެ ތެރެއިން ބޮޑު އަދަދެވެ.

(1) އެ މުދަލެއްގެ ނުވަތަ ޚިދުމަތެއްގެ މަންފާ ލިބޭ ފަރާތުން އެ މަންފާގެ ބަދަލުގެ ގޮތުގައި އެހެން އެއްވެސް ފަރާތަކަށް ދައްކާ އަދަދު؛ ނުވަތަ

(2) ފޯރުވައިދޭ މުދަލަށް ނުވަތަ ޚިދުމަތަށް އިންވޮއިސް ދޫކުރެވޭ ފަރާތުން އެ މުދަލުގެ ނުވަތަ ޚިދުމަތުގެ އަގުގެ ގޮތުގައި އަދާކުރާ އަދަދު.

(ށ) މި މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ މަންފާ ލިބޭ ފަރާތަކީ، މުދާ ނުވަތަ ޚިދުމަތް ފޯރުވައިދޭ ފަރާތާ ގުޅުންހުރި ފަރާތެއް ކަމުގައި ވުން ލާޒިމެއް ނޫނެވެ.

26. ފައިސާފޮއްޗެއް ނުވަތަ ޓޯކަނެއް ބޭނުންކުރާ މެޝިނަކުން ކުރެވޭ މުޢާމަލާތުގެ އަގު

ފައިސާފޮއްޗެއް ނުވަތަ ޓޯކަނެއް ބޭނުންކޮށްގެން އޮޕަރޭޓްކުރާ މެޝިނެއް ނުވަތަ މީޓަރެއް ނުވަތަ އެނޫންވެސް ޑިވައިސްއެއް މެދުވެރިކޮށް ފޯރުވައިދެވޭ މުދަލާއި ޚިދުމަތުގެ އަގަކީ، އެ ފައިސާފޮތީގެ ނުވަތަ ޓޯކަންގެ އަގުން ޖީ.އެސް.ޓީގެ އަދަދަށްވާ ފައިސާ ކެނޑުމުން އަންނަ އަދަދެވެ.

27. ވައުޗަރެއް ނުވަތަ އެފަދަ އެހެން އެއްޗެއް މެދުވެރިކޮށް ކުރެވޭ މުޢާމަލާތުގެ އަގު

މުދަލެއް ނުވަތަ ޚިދުމަތެއް ފޯރުވައިދިނުމުގެ މުޤާބިލަކީ ވައުޗަރެއް ނުވަތަ އެފަދަ އެހެން އެއްޗެއް ރެޑީމްކުރުން ކަމުގައިވާނަމަ، އެ މުދަލުގެ ނުވަތަ ޚިދުމަތުގެ އަގަކީ، އެ ވައުޗަރު ނުވަތަ އެފަދަ އެހެން އެއްޗެއްގެ އަގުން ޖީ.އެސް.ޓީގެ އަދަދަށްވާ ފައިސާ ކެނޑުމުން އަންނަ އަދަދެވެ.

28. ލޯޔަލްޓީ ސްކީމެއްގެ ދަށުން ދެވޭ ޕޮއިންޓް މެދުވެރިކޮށް ކުރެވޭ މުޢާމަލާތުގެ އަގު

(ހ) މުޢާމަލާތެއްގެ މުޤާބިލު ދެވެނީ ލިބިގަތް މުދަލުގެ ނުވަތަ ޚިދުމަތުގެ އަގު ދިނުމުގެ އިތުރުން ލޯޔަލްޓީ ސްކީމަކަށް ޕޮއިންޓް ހޯދުމަށް ކަމުގައިވާނަމަ، އެ މުޤާބިލު ރައްދުވާނީ ހަމައެކަނި ފޯރުވައިދެވުނު މުދާ ނުވަތަ ޚިދުމަތަށެވެ. އަދި މި ޙާލަތުގައި ލޯޔަލްޓީ ސްކީމަށް ލިބޭ ޕޮއިންޓަށް، އެ މުޤާބިލުން އެއްވެސް ބައެއް ރައްދެއް ނުވާނެއެވެ.

(ށ) ފޯރުވައިދެވުނު މުދަލުގެ ނުވަތަ ޚިދުމަތުގެ މުޤާބިލަކީ ނުވަތަ މުޤާބިލުން ބަޔަކީ ލޯޔަލްޓީ ސްކީމެއްގެ ދަށުން ލިބިފައިވާ ޕޮއިންޓް ރެޑީމްކުރުން ކަމުގައިވާނަމަ، އެ މުދަލުގެ ނުވަތަ ޚިދުމަތުގެ އަގަކީ ހަމައެކަނި ފައިސާއަށް ހަމަ އެ މުދާ ނުވަތަ ޚިދުމަތް ފޯރުވައިދިނުމުން ލިބޭނެ ބާޒާރުގެ އަގުން ޖީ.އެސް.ޓީގެ އަދަދަށްވާ ފައިސާ ކެނޑުމުން އަންނަ އަދަދެވެ.

29. ގުރުއަތު ލައިގެން ހަދިޔާ ދޭ ގޮތަށް ކުރެވޭ މުޢާމަލާތުގެ އަގު

ގުރުއަތު ލައިގެން ހަދިޔާ ދޭ ގޮތަށް ކުރެވޭ މުޢާމަލާތުގެ އަގަކީ، ގުރުއަތުގެ ހަދިޔާގެ ބާޒާރުގެ އަގާއި، އެ ގުރުއަތުގައި ބައިވެރިވުމުގެ މުޤާބިލުގެ ގޮތުގައި އެ ގުރުއަތުގެ ބައިވެރިން، ގުރުއަތު ރާވާ ފަރާތަށް ދައްކާފައިވާ އަދަދާއި، މި ދެ އަދަދުންކުރެ ބޮޑު އަދަދުން ޖީ.އެސް.ޓީގެ އަދަދަށްވާ ފައިސާ ކެނޑުމުން އަންނަ އަދަދެވެ.

30. (އުނިކޮށްފައި)

31. ކަރަންޓާއި ފެނާއި ނަރުދަމާ އަދި ޕޯސްޓުގެ ޚިދުމަތް

(ހ) ޤާނޫނުގެ 20 ވަނަ މާއްދާގެ (ހ) ގެ ބޭނުމަށް، ޖީ.އެސް.ޓީ ނެގުމުން އިސްތިސްނާވާ ކަރަންޓުގެ ޚިދުމަތްކަމަށް ބުނެފައި އެވަނީ، މޯލްޑިވްސް އެނަރޖީ އޮތޯރިޓީގައި ރަޖިސްޓަރީކޮށްގެން ހިންގާ އިންޖީނުގެތަކުން މީޓަރު މެދުވެރިކޮށް، ނުވަތަ ކަނޑައެޅޭ ވަކި އަގެއް ނަގާ ގޮތަށް، ފޯރުވައިދޭ ކަރަންޓުގެ ޚިދުމަތަށެވެ.

(ށ) ޤާނޫނުގެ 20 ވަނަ މާއްދާގެ (ށ) ގެ ބޭނުމަށް، ޖީ.އެސް.ޓީ ނެގުމުން އިސްތިސްނާވާ ފެނުގެ ޚިދުމަތްކަމަށް ބުނެފައި އެވަނީ، އެންވަޔަރަމެންޓަލް ޕްރޮޓެކްޝަން އޭޖެންސީއިން ދޫކުރާ ޑީސެލިނޭޝަން ޕްލާންޓް އޮޕަރޭޓްކުރުމުގެ ހުއްދަ ލިބިފައިވާ ފަރާތްތަކުން މީޓަރު މެދުވެރިކޮށް ފޯރުވައިދޭ ފެނުގެ ޚިދުމަތަށެވެ.

(ނ) ޤާނޫނުގެ 20 ވަނަ މާއްދާގެ (ނ) ގެ ބޭނުމަށް، ޖީ.އެސް.ޓީ ނެގުމުން އިސްތިސްނާވާ ޕޯސްޓުގެ ޚިދުމަތްކަމަށް ބުނެފައި އެވަނީ، ސަރުކާރުގެ ކަމާބެހޭ އިދާރާއެއްގައި ނުވަތަ ދައުލަތުގެ ކަމާބެހޭ މުއައްސަސާއެއްގައި ރަޖިސްޓަރީކޮށްގެން ޕޯސްޓުގެ ޚިދުމަތް ދޭ ތަނަކުން ދޭ، ކޫރިއަރ ޚިދުމަތުގެ ގޮތުގައި ނުހިމެނޭ، ޕޯސްޓުގެ ޚިދުމަތަށެވެ. 

(ރ) ޤާނޫނުގެ 20 ވަނަ މާއްދާގެ (ރ) ގެ ބޭނުމަށް، ޖީ.އެސް.ޓީ ނެގުމުން އިސްތިސްނާވާ ނަރުދަމާގެ ޚިދުމަތްކަމަށް ބުނެފައި އެވަނީ، އެންވަޔަރަމެންޓަލް ޕްރޮޓެކްޝަން އޭޖެންސީއިން ދޫކުރާ ކަމާބެހޭ ހުއްދަ ލިބިފައިވާ ފަރާތްތަކުން ފޯރުވައިދޭ ނަރުދަމާގެ ޚިދުމަތަށެވެ.

(ބ) ޤާނޫނުގެ 20 ވަނަ މާއްދާގެ (ކ) ގެ ބޭނުމަށް، މި މާއްދާގެ (ހ) އިން ފެށިގެން (ރ) ގެ ނިޔަލަށްހުރި އަކުރުތަކުގައި ބަޔާންކޮށްފައިވާ ފަރާތްތަކުން ފޯރުވައިދޭ ޚިދުމަތްތަކުގެ ތެރެއިން، އެ އަކުރުތަކުގައި ބަޔާންކޮށްފައިވާ ފަރާތްތައް ފިޔަވައި އެހެން ފަރާތްތަކުން ހުއްދަނެތި ފޯރުވައިދިނުން މަނާ ޚިދުމަތްތައް، އެ ޚިދުމަތްތައް ދިނުމުގައި ބޭނުންކުރާ މުދާވެސް ހިމެނޭގޮތުން، ޖީ.އެސް.ޓީ ނެގުމުން އިސްތިސްނާވާނެއެވެ.

32. ތަޢުލީމުގެ ޚިދުމަތް

ޤާނޫނުގެ 20 ވަނަ މާއްދާގެ (ބ) ގެ ބޭނުމަށް، ޖީ.އެސް.ޓީ ނެގުމުން އިސްތިސްނާވާ ތަޢުލީމުގެ ޚިދުމަތްކަމަށް ބުނެފައި އެވަނީ، އަންނަނިވި ޚިދުމަތްތަކަށެވެ.

(ހ) ސަރުކާރުން ހިންގާ ޕްރީސްކޫލްތަކާއި ސްކޫލްތަކާއި ވޮކޭޝަނަލް އިންސްޓިޓިއުޝަންތަކާއި ކޮލެޖްތަކާއި ޔުނިވަރސިޓީތަކުން ފޯރުވައިދޭ ތަޢުލީމުގެ ޚިދުމަތްތައް؛

(ށ) މި މާއްދާގެ (ހ) ގައި ބަޔާންކޮށްފައިވާ ތަންތަނުގެ އިތުރުން، ތަޢުލީމާބެހޭ މިނިސްޓްރީއިން ހުއްދަ ލިބިގެން ހިންގާ ޕްރީސްކޫލްތަކާއި ސްކޫލްތަކާއި ވޮކޭޝަނަލް އިންސްޓިޓިއުޝަންތަކާއި ކޮލެޖްތަކާއި ޔުނިވަރސިޓީތަކާއި ޓިއުޝަން ސެންޓަރުތަކުން ފޯރުވައިދޭ ތަޢުލީމުގެ ޚިދުމަތްތައް؛

(ނ) ޤާނޫނުގެ 20 ވަނަ މާއްދާގެ (ކ) ގެ ބޭނުމަށް، މި މާއްދާގެ (ހ) އާއި (ށ) ގައި ބަޔާންކޮށްފައިވާ ތަންތަން ހިންގާ ފަރާތްތަކުން އެ ތަންތަނުގެ އެތެރޭގައި ހިންގާ، ޢާންމުންނަށް ނުވަދެވޭގޮތަށް އިންތިޒާމުކުރެވިގެން ޚިދުމަތްދޭ، ކެންޓީނާއި ބުކްޝޮޕްފަދަ ދަރިވަރުންނަށް ބޭނުންތެރި ވިޔަފާރިތަކުން ފޯރުވައިދޭ ޚިދުމަތްތައް.

33. ޞިއްޙީ ޚިދުމަތް

ޤާނޫނުގެ 20 ވަނަ މާއްދާގެ (ޅ) ގެ ބޭނުމަށް، ޖީ.އެސް.ޓީ ނެގުމުން އިސްތިސްނާވާ ޞިއްޙީ ޚިދުމަތްކަމަށް ބުނެފައި އެވަނީ، އަންނަނިވި ޚިދުމަތްތަކަށެވެ.

(ހ) ސަރުކާރުން ހިންގާ ހޮސްޕިޓަލްތަކާއި ކްލިނިކްތަކާއި ޞިއްޙީ މަރުކަޒުތަކާއި ހެލްތު ޕޯސްޓުތަކާއި އަދި ސަރުކާރުން ހިންގާ ޞިއްޙީ ޚިދުމަތް ފޯރުވައިދޭ މިނޫންވެސް މިފަދަ ތަންތަނުން ފޯރުވައިދޭ ޞިއްޙީ ޚިދުމަތްތައް؛

(ށ) މި މާއްދާގެ (ހ) ގައި ބަޔާންކޮށްފައިވާ ތަންތަނުގެ އިތުރުން، ޞިއްޙަތާބެހޭ މިނިސްޓްރީއިން ހުއްދަ ލިބިގެން ހިންގާ ހޮސްޕިޓަލްތަކާއި ކްލިނިކްތަކުން ފޯރުވައިދޭ ޞިއްޙީ ޚިދުމަތްތައް؛

(ނ) ޤާނޫނުގެ 20 ވަނަ މާއްދާގެ (ކ) ގެ ބޭނުމަށް، މި މާއްދާގެ (ހ) އާއި (ށ) ގައި ބަޔާންކޮށްފައިވާ ތަންތަން ހިންގާ ފަރާތްތަކުން އެ ތަންތަނުގެ އެތެރޭގައި ހިންގާ، ޢާންމުންނަށް ނުވަދެވޭގޮތަށް އިންތިޒާމްކުރެވިގެން ބަލިމީހުންނަށް ޚިދުމަތްދޭ ވިޔަފާރިތަކުން ފޯރުވައިދޭ ޚިދުމަތްތައް.

34. ބޭހާއި މެޑިކަލް ޑިވައިސްތައް

(ހ) ޤާނޫނުގެ 20 ވަނަ މާއްދާގެ (އ) ގެ ބޭނުމަށް، ޖީ.އެސް.ޓީ ނެގުމުން އިސްތިސްނާވާ ބޭހުގެ ބާވަތްތަކާއި މެޑިކަލް ޑިވައިސްތައް ކަމަށް ބުނެފައި އެވަނީ، ޞިއްޙަތާބެހޭ މިނިސްޓްރީގައި ރަޖިސްޓަރީކޮށްގެން ހިންގާ ބޭސްފިހާރަތަކުން ވިއްކާ މޯލްޑިވްސް ފުޑް އެންޑް ޑްރަގް އޮތޯރިޓީއިން ހުއްދަކޮށްފައިވާ ބޭހުގެ ބާވަތްތަކާއި، އެފަދަ ތަންތަނުން ވިއްކާ މި މާއްދާގެ (ށ) ގައި ބަޔާންކޮށްފައިވާ މެޑިކަލް ޑިވައިސްތަކެވެ.

(ށ) ޤާނޫނުގެ 20 ވަނަ މާއްދާގެ (އ) ގެ ބޭނުމަށް، މެޑިކަލް ޑިވައިސްތައް ކަމަށް ބުނެފައި އެވަނީ، އެ އެއްޗެއް އޮޕަރޭޓްކުރުމަށް ބޭނުންވާ ސޮފްޓްވެއަރ ވެސް ހިމެނޭގޮތުން، އަދި އެހެން އެއްޗަކާ އެކުގައި ނުވަތަ ވަކިން ބޭނުންކުރިކަމުގައިވިޔަސް، އަންނަނިވި ބޭނުންތަކަށް އުފައްދާފައިވާ، ފާމަކޮލޮޖިކަލް ނުވަތަ އިމިއުނޮލޮޖިކަލް ނުވަތަ މެޓަބޮލިކް ކަމެއްގެ ޒަރީއާއިން އެ އެއްޗެއްގެ އަސާސީ މަޤްޞަދު ހާސިލުކުރާ ތަކެތީގެ ގޮތުގައި ނުހިމެނޭ، އެހެންނަމަވެސް އެފަދަ ކަމެއްގެ ޒަރީއާއިން އެ އެއްޗެއްގެ މަޤްޞަދު ހާސިލުކުރުމަށް އެހީތެރިވެދީފާނެ، އެންމެހައި އިންސްޓްރޫމަންޓްތަކަށާއި އެޕަރެޓަސްތަކަށާއި އެޕްލަޔަންސްތަކަށާއި މެޓީރިއަލްތަކަށާއި އެނޫންވެސް އެފަދަ ތަކެއްޗަށެވެ.  

(1) ބަލި ދެނެގަތުމަށް ނުވަތަ ބަލިން ރައްކާތެރިވުމަށް ނުވަތަ ބަލި މޮނިޓަރކުރުމަށް ނުވަތަ ބައްޔަށް ފަރުވާދިނުމަށް ނުވަތަ ބަލީގެ އަސަރު ކުޑަކުރުމަށް؛

(2) އަނިޔާއެއް ނުވަތަ ނުކުޅެދުންތެރިކަމެއް ދެނެގަތުމަށް ނުވަތަ މޮނިޓަރކުރުމަށް ނުވަތަ އެފަދަ ކަމަކަށް ފަރުވާދިނުމަށް ނުވަތަ އޭގެ އަސަރު ކުޑަކުރުމަށް ނުވަތަ ކޮމްޕެންސޭޓްކުރުމަށް؛

(3) ފިޒިއޮލޮޖިކަލް ޕްރޮސަސްއެއް ނުވަތަ ހަށިގަނޑުގެ ބައެއް ތަޙުލީލުކުރުމަށް ނުވަތަ ރިޕްލޭސްކުރުމަށް ނުވަތަ މޮޑިފައިކުރުމަށް؛

(4) ވިހެއުމުގެ ދޭތެރެ ދުރުކުރުމަށް.

35. މާލީ ޚިދުމަތްތައް

(ހ) ޤާނޫނުގެ 20 ވަނަ މާއްދާގެ (މ) ގެ ބޭނުމަށް، މާލީ ޚިދުމަތްތައް ކަމަށް ބުނެފައި އެ ވަނީ، ދައުލަތުގެ މުއައްސަސާއަކުން ފޯރުވައިދޭ، ނުވަތަ ދައުލަތުގެ ކަމާބެހޭ މުއައްސަސާގެ ހުއްދަ ލިބިގެން ފޯރުވައިދޭ، އަންނަނިވި ޚިދުމަތްތަކަށެވެ.

(1) ކަރަންޓް އެކައުންޓް ނުވަތަ ޑިޕޮސިޓް އެކައުންޓް ނުވަތަ ސޭވިންގްސް އެކައުންޓް ނުވަތަ އިންވެސްޓްމަންޓް އެކައުންޓްގެ ޚިދުމަތްދިނުން؛

(2) ނޫޓު ނުވަތަ ފައިސާފޮތި ބަދަލުކޮށްގެން، ނުވަތަ އެކައުންޓެއް ޑެބިޓް ނުވަތަ ކްރެޑިޓް ކޮށްގެން، ނުވަތަ އެ ނޫން ވެސް ގޮތަކުން ބޭރުފައިސާ ގަނެވިއްކުން؛

(3) ލެޓަރ އޮފް ކްރެޑިޓް ނުވަތަ ބިލް އޮފް އެކްސްޗޭންޖް ދޫކުރުމާއި ފައިސާ ދެއްކުމާއި ބަލައިގަތުމާއި އޭގެ މިލްކުވެރިކަން ބަދަލުކުރުން؛

(4) ޑެޓް ދޫކުރުމާއި އެލޮޓްކުރުމާއި ނެގުމާއި ބަލައިގަތުމާއި އެންޑޯޒްކުރުމާއި އައުކުރުމާއި އޭގެ މިލްކުވެރިކަން ބަދަލުކުރުމާއި، ސްޓޮކް އެކްސްޗޭންޖުގައި އެ ފަދަ ފައިނޭންޝަލް އިންސްޓްރޫމަންޓްސް ގަނެވިއްކުމާއި، ގަނެވިއްކުމުގެ ޚިދުމަތްދިނުން؛

(5) ހިއްސާ ދޫކުރުމާއި އެލޮޓްކުރުމާއި އައުކުރުމާއި އޭގެ މިލްކުވެރިކަން ބަދަލުކުރުމާއި، ސްޓޮކް އެކްސްޗޭންޖުގައި އެ ފަދަ ފައިނޭންޝަލް އިންސްޓްރޫމަންޓްސް ގަނެވިއްކުމާއި، ގަނެވިއްކުމުގެ ޚިދުމަތްދިނުން؛

(6) ޑެޓް ނުވަތަ ހިއްސާ ދޫކުރުން އަންޑަރައިޓްކުރުމާއި ސަބްއަންޑަރައިޓްކުރުން؛

(7) ލޯނު ނުވަތަ އެޑްވާންސް ނުވަތަ ކްރެޑިޓް ދޫކުރުން؛

(8) މި އަކުރުގެ (3) އިން ފެށިގެން (7) ގެ ނިޔަލަށްހުރި އަކުރުތަކުގެ ދަށުން ޚިދުމަތެއް ފޯރުވައިދިނުމުގެ އިލްތިޒާމްތަކާ ގުޅޭގޮތުން ގެރެންޓީ ނުވަތަ އިންޑެމްނިޓީ ނުވަތަ ސެކިއުރިޓީ ނުވަތަ ބޮންޑް ދޫކުރުމާއި ނެގުމާއި ދޫކޮށްލުން؛

(9) ހަޔަރ ޕަރޗޭސް އެރޭންޖްމަންޓަކަށް ކްރެޑިޓް ފައިނޭންސްކޮށްދިނުން؛

(10) އިންޝުއަރެންސް ކޮންޓްރެކްޓް ދޫކުރުމާއި އޭގެ މިލްކުވެރިކަން ބަދަލުކުރުން، ނުވަތަ އެ ފަދަ ކޮންޓްރެކްޓް ރީއިންޝުއަރކޮށްދިނުން؛

(11) ސުޕަރއެނުއޭޝަން ފަންޑެއްގެ ނުވަތަ ރިޓަޔަރމަންޓް ޕެންޝަން ފަންޑެއްގެ ނުވަތަ އެހެން އިންވެސްޓްމަންޓް ފަންޑެއްގެ މަޞްލަޙަތު ނުވަތަ ހިއްސާ ދޫކުރުމާއި އޭގެ މިލްކުވެރިކަން ބަދަލުކުރުން، ނުވަތަ އެ ފަދަ ފަންޑެއް މެނޭޖްކުރުން؛

(12) އަންނަނިވި ހާލަތުތަކުގައި، އާމްސްލެންތު މުޢާމަލާތެއްގައި ފިއުޗަރސް ކޮންޓްރެކްޓެއް ދޫކުރުމާއި އެސައިންކުރުން:

(ހ) ކޮންޓްރެކްޓްގެ ދަށުން ކޮމޯޑިޓީއެއް ފޯރުވައިދޭން ނުޖެހުން؛

(ށ) ކޮންޓްރެކްޓްގެ ދަށުން ކޮމޯޑިޓީއެއް ފޯރުވައިދޭން ޖެހޭނަމަ، އެ ކޮމޯޑިޓީ ފޯރުވައިދިނުމަކީ އިސްތިސްނާ ޚިދުމަތެއް ކަމުގައި ވުން؛

(ނ) ކޮންޓްރެކްޓްގެ ދަށުން ފައިސާ ފޯރުވައިދޭން ޖެހުން؛

(13) ފައިނޭންޝަލް އޮޕްޝަން ދޫކުރުން؛

(14) ޑެޓްއަކާ ނުވަތަ ހިއްސާއަކާ ނުވަތަ ކްރެޑިޓް އެރޭންޖްމަންޓަކާ ނުވަތަ އިންޝުއަރެންސް ކޮންޓްރެކްޓަކާ ނުވަތަ ސުޕަރއެނުއޭޝަން ފަންޑަކާ ނުވަތަ ރިޓަޔަރމަންޓް ޕެންޝަން ފަންޑަކާ ނުވަތަ އެހެން އިންވެސްޓްމަންޓް ފަންޑަކާ ނުވަތަ ފިއުޗަރސް ކޮންޓްރެކްޓަކާ ނުވަތަ ހެޖް ފަންޑަކާ ގުޅޭގޮތުން އެއްވެސް އިންޓްރެސްޓެއް ނުވަތަ ޕްރިންސިޕަލްއެއް ނުވަތަ ޑިވިޑެންޑެއް ނުވަތަ އެ ނޫން ވެސް އަދަދެއް ދެއްކުމާއި ބަލައިގަތުން؛

(15) ކޮންސަލްޓެންސީ ނުވަތަ ލަފާދިނުން ނުހިމެނޭގޮތުން، މި މާއްދާގައި ބަޔާންކޮށްފައިވާ ޚިދުމަތެއް ދިނުމަށް އެއްބަސްވުން ނުވަތަ ރޭވުން؛

(16) ދިވެހިރާއްޖޭގެ އެތެރޭގައި ނުވަތަ ދިވެހިރާއްޖެއިން ބޭރަށް ފައިސާ ޓްރާންސްފަރކުރުމުގެ ޚިދުމަތް ފޯރުވައިދިނުން؛

(17) މޮބައިލް ޓެލެކޮމިއުނިކޭޝަން ނެޓްވަރކް މެދުވެރިކޮށް، މޮބައިލް ޑިވައިސްއެއް ބޭނުންކޮށްގެން ފައިސާ ދެއްކުމާއި ފައިސާ ޓްރާންސްފަރކުރުމާއި އެ ނޫން ވެސް އެ ފަދަ ޚިދުމަތްތައް ފޯރުވައިދިނުން؛

(18) ޕްރީޕެއިޑް ކޭޝް ކާޑު ދޫކުރުމާއި ބަލައިގަތުން. މީގެ ތެރޭގައި ކާޑު އިޝޫކުރާ ފަރާތުގެ އޭޖެންޓުންނަށް ލިބޭ ކޮމިޝަން އަދި ރިބޭޓް ވެސް ހިމެނޭނެއެވެ.

(19) ކޭޝް ކާޑު ނުވަތަ ޑެބިޓް ކާޑު ނުވަތަ ކްރެޑިޓް ކާޑުގެ ޕޭމަންޓް ޕްރޮސެސް ކުރުމާއި އެނޫން ވެސް އެ ފަދަ ޚިދުމަތްތައް ފޯރުވައިދިނުން؛

(ށ) ޤާނޫނުގެ 20 ވަނަ މާއްދާގެ (މ) ގެ ބޭނުމަށް، އިސްލާމީ ޝަރީޢަތުގެ އަސާސްތަކުގެ މައްޗަށް ބިނާކޮށް ފޯރުވައިދޭ، މި މާއްދާގެ (ހ) ގައި ބަޔާންކޮށްފައިވާ ޚިދުމަތްތައް ބެލެވޭނީ މާލީ ޚިދުމަތުގެ ގޮތުގައެވެ. 

(ނ) މި މާއްދާގެ (ހ) ގެ (7) ގައި އެހެން ބަޔާންކޮށްފައި އޮތް ނަމަވެސް، ޤާނޫނުގެ 20 ވަނަ މާއްދާގެ (މ) ގެ ބޭނުމަށް، ދައުލަތުގެ ކަމާބެހޭ މުއައްސަސާގެ ހުއްދަ ނެތް ރަޖިސްޓަރީކޮށްފައިވާ ފަރާތަކުން ދޫކޮށްފައިވާ ލޯނަކަށް އިންޓްރެސްޓްގެ ގޮތުގައި އެއްވެސް އަދަދެއް ނެގުމަކީ ވެސް މާލީ ޚިދުމަތުގެ ގޮތުގައި ބެލެވޭނެއެވެ.  

36. ނުއުފުލޭ މުދަލުގެ ކުލި

ޤާނޫނުގެ 20 ވަނަ މާއްދާގެ (ފ) ގެ ބޭނުމަށް، ނުއުފުލޭ މުދާ ކުއްޔަށް ދޫކޮށްގެން ލިބޭ ކުލި ކަމަށް ބުނެފައި އެވަނީ، އަންނަނިވި ފައިސާއަށެވެ.

(ހ) ނުއުފުލޭ މުދަލުން ކުލީގެ ގޮތުގައި ލިބޭ އެންމެހައި ފައިސާ؛

(ށ) ސެކިއުރިޓީ ޑިޕޮސިޓް އަދި އެޑްވާންސަށް ދައްކާ ކުލި ނުވަތަ ނުއުފުލޭ މުދަލާ ގުޅިގެން އެނޫންވެސް ގޮތަކަށް ލިބޭ ފައިސާގެ ތެރެއިން މުދާ ކުއްޔަށް ދޫކުރާ ފަރާތަށް އެ ފައިސާގެ ބައެއް ނުވަތަ އެއްކޮށްވިޔަސް ބޭނުންކުރުމުގެ ޙައްޤު ލިބުނު މިންވަރު؛

(ނ) ކުއްޔަށް ދޫކުރުމަށް ވެވޭ އެއްބަސްވުމުގައި ކުއްޔަށް ހިފާ ފަރާތުގެ އިލްތިޒާމްތަކުގެ ތެރޭގައި ނުހިމެނޭ ކަމަކަށް، ކުއްޔަށް ދޫކުރެވޭ މުދަލާ ގުޅިގެން ލިބޭ އެންމެހައި ފައިސާ؛

(ރ) ނުއުފުލޭ މުދަލެއްގައި ހަރުކުރެވިފައިވާ އެއްޗަކާ ގުޅިގެން ލިބޭ ފައިސާ؛

(ބ) ކުލި ނުދެއްކުމުގެ ސަބަބުން ލިބޭ ގެއްލުން ފޫބެއްދުމަށް ނަގާފައިވާ އިންޝުއަރެންސް ޕޮލިސީއެއްގެ ދަށުން ލިބޭ އެންމެހައި ފައިސާ؛

(ޅ) ކުއްޔަށް ހިފާ ފަރާތުން، ކުއްޔަށް ދޫކުރުމަށް ވެވޭ އެއްބަސްވުމާ ޚިލާފުވުމުގެ ސަބަބުން ލިބޭ ފައިސާ.

37. ބައިނަލްއަޤްވާމީ ދަތުރުފަތުރުގެ ޚިދުމަތްތައް

(ހ) ޤާނޫނުގެ 20 ވަނަ މާއްދާގެ (ދ) ގެ ބޭނުމަށް، ބައިނަލްއަޤްވާމީ ދަތުރުފަތުރުގެ ޚިދުމަތްތަކުގެ ތެރޭގައި ހިމެނެނީ:

(1) ދިވެހިރާއްޖޭގައި ހުރި ތަނަކުން ދިވެހިރާއްޖެއިން ބޭރުގައި ހުރި ތަނަކަށް؛ ނުވަތަ

(2) ދިވެހިރާއްޖެއިން ބޭރުގައި ހުރި ތަނަކުން ދިވެހިރާއްޖޭގައި ހުރި ތަނަކަށް؛ ނުވަތަ

(3) ދިވެހިރާއްޖެއިން ބޭރުގައި ހުރި ތަނަކުން ދިވެހިރާއްޖެއިން ބޭރުގައި ހުރި އެހެން ތަނަކަށް؛

ފަސިންޖަރުން ނުވަތަ މުދާ އުފުލައިދިނުމަށެވެ. މީގެ ތެރޭގައި އަންނަނިވި ޚިދުމަތްތަކެއް ނުހިމެނެއެވެ.

(4) ގްރައުންޑް ހޭންޑްލިންގ، ފަސިންޖަރުންނަށް އެހީތެރިކަން ފޯރުވައިދިނުން، ޕެކިންގ، މުދާ އެރުވުމާއި ބޭލުން، ލޭޝިންގ، ސެކިއުރިންގ، ހެންޑްލިންގ، ސްޓީވެޑޯރިންގ، ގުދަންކުރުން، އިންސްޕެކްޝަން އަދި ލިޔެކިޔުން ތައްޔާރުކުރުން ފަދަ އެންސިލަރީ ޚިދުމަތްތައް؛ ނުވަތަ

(5) ބައިނަލްއަޤްވާމީ ދަތުރުފަތުރާ ގުޅިގެން ދިވެހިރާއްޖޭގެ އެތެރޭގައި ދެވޭ ދަތުރުފަތުރުގެ ޚިދުމަތް.

(ށ) މި މައްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، ޤާނޫނު ނަންބަރު 6/96 (ދިވެހިރާއްޖޭގެ ކަނޑުގެ ސަރަޙައްދުތަކާބެހޭ ޤާނޫނު) ގައި މާނަކޮށްދީފައިވާ، ދިވެހިރާއްޖޭގެ އެތެރޭގެ ކަނޑާއި އާކިޕެލަޖިކް ކަނޑާއި ސަރަޙައްދީ ކަނޑާއި އެ ސަރަޙައްދުތަކުގެ މަތީގައިވާ ވައިގެ ސަރަޙައްދުގައި ފޯރުވައިދޭ ދަތުރުފަތުރުގެ ޚިދުމަތްތަކަކީ (ފަސިންޖަރުންނާއި މުދާ އުފުލައިދިނުމުގެ ޚިދުމަތްތަކަކީ) ހަމައެކަނި ދިވެހިރާއްޖެއަށް ވަނުމުގެ ނުވަތަ ދިވެހިރާއްޖެއިން ނުކުތުމުގެ ބޭނުމުގައި ދެވޭ ޚިދުމަތްތަކެއްނަމަ އެއީ ބައިނަލްއަޤްވާމީ ދަތުރުފަތުރުގެ ޚިދުމަތް ކަމަށް ބެލެވޭނެއެވެ.

(ނ) މި މާއްދާގެ (ހ) ގެ (4) އާއި (5) ގައި ބަޔާންކޮށްފައިވާ ދަތުރުފަތުރުގެ ޚިދުމަތްތަކަކަށް މި މާއްދާގެ (ށ) ރައްދެއްނުވާނެއެވެ.

38. ޖޫރިމަނާ

ޤާނޫނުގެ 20 ވަނަ މާއްދާގެ (ލ) ގެ ބޭނުމަށް، ޖޫރިމަނާ ކަމަށް ބުނެފައި އެވަނީ، ދައުލަތުގެ މުއައްސަސާއަކުން ނުވަތަ ރެގިއުލޭޓްކުރާ އިދާރާއަކުން ނުވަތަ ކޯޓަކުން ނުވަތަ ޓްރައިބިއުނަލްއަކުން ނުވަތަ ދިވެހިރާއްޖޭގައި ޖޫރިމަނާކުރުމުގެ ޤާނޫނީ ބާރެއް ލިބިފައިވާ އެނޫންވެސް ފަރާތަކުން ކުރާ ޖޫރިމަނާއަށާއި، މުދާ ނުވަތަ ޚިދުމަތް ފޯރުވައިދިން ފަރާތަށް ފައިސާ ދައްކަންޖެހޭ ދުވަހަށް ފައިސާ ނުދެއްކުމުން އެ މުދާ ނުވަތަ ޚިދުމަތް ލިބިގަތް ފަރާތުން ދައްކަންޖެހޭ ޖޫރިމަނާއަށެވެ.

39. ސުން-ރޭޓު ކަނޑައަޅާފައިވާ އަސާސީ މުދަލުން ޖީ.އެސް.ޓީ ނެގުން

ޤާނޫނުގެ ޖަދުވަލު 1 ގައި، އަސާސީ މުދަލުގެ ގޮތުގައި ކަނޑައަޅާފައިވާ މުދަލުގެ ބާވަތްތަކުގެ ތެރޭގައި ހިމެނޭ އެކިއެކި މުދަލުން ޖީ.އެސް.ޓީ ދައްކަންޖެހޭނީ ސުން-ރޭޓުގައިކަން ނުވަތަ ނޫންކަން ކަނޑައަޅާނީ މި ބާބަށް ރިޢާޔަތްކޮށެވެ.

40 .ސުން-ރޭޓު ކަނޑައަޅާފައިވާ އަސާސީ މުދާ 

(ހ) ޤާނޫނުގެ ޖަދުވަލު 1 ގެ 1 ވަނަ އައިޓަމާއި 2 ވަނަ އައިޓަމާއި 3 ވަނަ އައިޓަމުގެ ބޭނުމަށް، ހަނޑޫ، ހަކުރު، ފުށް ކަމަށް ބުނެފައި އެވަނީ، އިޤްތިޞާދީ ތަރައްޤީއާބެހޭ މިނިސްޓްރީއިން ކަނޑައަޅާ ކޮންޓްރޯލް އަގުގައި ވިއްކުމަށްޓަކައި ސްޓޭޓް ޓްރޭޑިން އޮގަނައިޒޭޝަން ޕަބްލިކް ލިމިޓެޑް ކޮމްޕެނީއިން އެތެރެކުރާ، އަދި އެ އަގުގައި ވިއްކާ، ހަނޑޫ، ހަކުރު، ފުށަށެވެ.

(ށ) ޤާނޫނުގެ ޖަދުވަލު 1 ގެ 4 ވަނަ އައިޓަމުގެ ބޭނުމަށް، ލޮނު ކަމަށް ބުނެފައި އެވަނީ، ކެއިންބުއިމަށް ޚާއްޞަކޮށްގެން ތައްޔާރުކޮށްފައިވާ، ޞިނާއީ ބޭނުންތަކަށް ތައްޔާރުކޮށްފައިވާ އެއްޗެއްކަމަށް ލޭބަލްކޮށްފައި ނުވާ، ލޮނަށެވެ.

(ނ) ޤާނޫނުގެ ޖަދުވަލު 1 ގެ 5 ވަނަ އައިޓަމުގެ ބޭނުމަށް، ކިރު ކަމަށް ބުނެފައި އެވަނީ، ކެއިންބުއިމަށް ޚާއްޞަކޮށްގެން ތައްޔާރުކޮށްފައިވާ، ޕްރިޒަރވޭޓިވްސް ފިޔަވައި އެހެން އެއްޗިއްސާ އެއްކޮށްގެން ޕްރޮސަސްކޮށްފައިވާ ބުއިމެއް ކަމުގައި ނުވާ، ކިރުގެ ގޮތުގައި މާކެޓްކުރާ، ގެރީގެ ކިރު ނުވަތަ ބަކަރީގެ ކިރު ނުވަތަ ޖަމަލުގެ ކިރު ނުވަތަ ކަންބަޅީގެ ކިރު ނުވަތަ ސޯޔާ މިލްކް ނުވަތަ ރައިސް މިލްކް އަށެވެ.

(ރ) ޤާނޫނުގެ ޖަދުވަލު 1 ގެ 6 ވަނަ އައިޓަމުގެ ބޭނުމަށް، ކުކިންގ އޮއިލް ކަމަށް ބުނެފައި އެވަނީ، ޢާންމުކޮށް ކެއްކުމަށް ބޭނުންކުރާ ވެޖިޓަބަލް އޮއިލްއަށާއި ޕާމް އޮއިލްއަށާއި ކޯން އޮއިލްއަށާއި ސަންފްލާވަރ އޮއިލްއަށާއި އޮލިވް އޮއިލްއަށެވެ.

(ބ) ޤާނޫނުގެ ޖަދުވަލު 1 ގެ 7 ވަނަ އައިޓަމުގެ ބޭނުމަށް، ބިސް ކަމަށް ބުނެފައި އެވަނީ، ރޯ ކުކުޅު ބިހަށެވެ.

(ޅ) ޤާނޫނުގެ ޖަދުވަލު 1 ގެ 8 ވަނަ އައިޓަމުގެ ބޭނުމަށް، ސައިފަތް ކަމަށް ބުނެފައި އެވަނީ، އެއްވެސް ރަހައެއް އިތުރުކޮށްފައިނުވާ، ކަޅުސައި ހެދުމަށް ބޭނުންކުރާ ސައިފަތަށާއި އެފަދަ ޕެކެޓް ސައިފަތަށެވެ.

(ކ) ޤާނޫނުގެ ޖަދުވަލު 1 ގެ 9 ވަނަ އައިޓަމުގެ ބޭނުމަށް،

(1) ކަނޑުމަސް ކަމަށް ބުނެފައި އެވަނީ، ކަޅުބިލަމަހަށާއި ކަންނެއްޔަށާއި ލައްޓިއަށާއި ރާގޮނޑިއަށާއި، އެފަދަ މަސްމަހުގެ ބައިތަކަށެވެ.

(2) ފަރުމަސް ކަމަށް ބުނެފައި އެވަނީ، މި މާއްދާގެ (ކ) ގެ (1) ގައި ބަޔާންކޮށްފައިވާ މަސްތައް ފިޔަވައި، ކޮތަރިއާއި ނަގޫފަތް ހުންނަ، ކަނޑުފަޅުގައި ދިރިއުޅޭ އެންމެހައި މަސްމަހަށާއި، އެފަދަ މަސްމަހުގެ ބައިތަކަށެވެ.

(3) ރާއްޖޭގައި ބަންދުކޮށްފައިވާ އެކި ބާވަތުގެ މަސް ކަމަށް ބުނެފައި އެވަނީ، ރާއްޖޭގައި ބަންދުކޮށްފައިވާ ކަނޑުމަހާއި ފަރުމަހަށެވެ.

(4) މި މާއްދާގެ (ކ) ގެ (1)، (2) އަދި (3) ވަނަ ނަންބަރުގައި ހިމެނޭނީ ރޯމަހާއި ހިކިމަހާއި ވަޅޯމަހާއި ލޮނުމަހާއި ދަޅުގައި ބަންދުކުރުމަށް ޚާއްޞަކޮށް ޕްރޮސަސްކުރެވިފައިވާ މަހެވެ.

(5) ކަނޑުމަހާއި ފަރުމަހުގެ ތެރޭގައި، ޒީނަތްތެރިކުރުމުގެ ގޮތުން ގެންގުޅޭ މަސް ނުހިމެނޭނެއެވެ.

(އ) ޤާނޫނުގެ ޖަދުވަލު 1 ގެ 10 ވަނަ އައިޓަމުގެ ބޭނުމަށް، އަލުތްވާއި ފިޔާގެ ތެރޭގައި އެންމެހައި ބާވަތްތަކުގެ އަލުތްވާއި ފިޔާ ހިމެނޭނެއެވެ.

(ވ) ޤާނޫނުގެ ޖަދުވަލު 1 ގެ 11 ވަނަ އައިޓަމުގެ ބޭނުމަށް،

(1) މިރުސް ކަމަށް ބުނެފައި އެވަނީ، ގިތެޔޮ މިރުހަށާއި ތޮޅި މިރުހަށާއި ރިހަ މިރުހަށާއި ވިފުކު މިރުހަށެވެ.

(2) ހަވާދު އުފެއްދުމަށް ބޭނުންކުރާ ބާވަތްތަކުގެ ތެރޭގައި، ދިރި، ދަވިއްގަނދު، ކޮތަނބިރި، ރީނދޫ، ލޮނުމެދު، އިނގުރު، މިރުސް، ތެޅިމިރުސް، ފޮނިތޮށި، ކާފޫރުތޮޅި، އަސޭމިރުސް، ހިކި މިރުސް، ހިކަނދިފަތް، ރާނބާފަތް، އަދި ކަރަންފޫ ހިމެނޭނެއެވެ.

(3) މި މާއްދާގެ (ވ) ގެ (1) އަދި (2) ގައި ބަޔާންކޮށްފައިވާ އެންމެހައި ތަކެތި މުގުރާފައި ވިއްކި ކަމުގައިވިޔަސް ޖީ.އެސް.ޓީ ނެގޭނީ ސުން-ރޭޓުގައެވެ. އެހެންނަމަވެސް އެފަދަ ތަކެތި އެހެން އެއްޗަކާ އެއްކޮށްފިނަމަ، ސުން-ރޭޓުގައި ޖީ.އެސް.ޓީ ނެގޭ މުދަލުގެ ތެރޭގައި އެފަދަ މުދަލެއް ނުހިމެނޭނެއެވެ.

(މ) ޤާނޫނުގެ ޖަދުވަލު 1 ގެ 12 ވަނަ އައިޓަމުގެ ބޭނުމަށް،

(1) ދިޔާހަކުރުގެ ތެރޭގައި ކަރުހަކުރާއި ރުކުރާ ހިމެނެއެވެ.

(2) ކާށި، ކުރުނބާ، ކުރޮޅީގެ ތެރޭގައި ގޮބޮޅިއާއި މިރިޔާއި ކިހާކާއި ގަބުޅިއާއި މުޑިކާށްޓާއި، ރާއްޖޭގައި އުފައްދާ ކާށިހުންޏާއި ކާށިކިރާއި ކާށިތެޔޮ ހިމެނޭނެއެވެ.

(ފ) ޤާނޫނުގެ ޖަދުވަލު 1 ގެ 13 ވަނަ އައިޓަމުގެ ބޭނުމަށް،

(1) ތަރުކާރީ ކަމަށް ބުނެފައި އެވަނީ، ޕްރޮސަސްނުކޮށް ހުންނަ، ތާޒާ ތަރުކާރީއަށެވެ.

(2) ތޮޅި ކަމަށް ބުނެފައި އެވަނީ، ފެހިތޮޅި ("ގްރީން ބީންސް" އަދި "ލޯންގް ބީންސް") އަށެވެ.

(3) ކެރެޓާއި ކެބެޖާއި ޓޮމާޓޯގެ ތެރޭގައި އެންމެހައި ބާވަތްތަކުގެ ކެރެޓާއި ކެބެޖާއި ޓޮމާޓޯ ހިމެނޭނެއެވެ.

(ދ) ޤާނޫނުގެ ޖަދުވަލު 1 ގެ 14 ވަނަ އައިޓަމްގެ ބޭނުމަށް، މޭވާ ކަމަށް ބުނެފައި އެވަނީ، މާ އަޅާ ގަސްގަހުގައި ގަންނަ ތަކެތީގެ ތެރެއިން، ދޮންވެ ފައްކާވީމާ ޢާންމުގޮތެއްގައި ރޯކޮށް ހުއްޓާ ކައިއުޅޭ، ޕްރޮސަސްނުކޮށް ހުންނަ، ތާޒާ މޭވާއަށެވެ.

(ތ) ޤާނޫނުގެ ޖަދުވަލު 1 ގެ 15 ވަނަ އައިޓަމުގެ ބޭނުމަށް،

(1) ޕާން ކަމަށް ބުނެފައި އެވަނީ، އޭގެ ޒާތަށް އެއްވެސް ބަދަލެއް ނުގެނެސް ހުންނަ އާދައިގެ ޕާން ("ވައިޓް ބްރެޑް" އަދި "ބްރައުން ބްރެޑް") އަށެވެ.

(2) ބަނަސް ކަމަށް ބުނެފައި އެވަނީ، އޭގެ ޒާތަށް އެއްވެސް ބަދަލެއް ނުގެނެސް ހުންނަ މަޑު ބަނަހަށާއި ބަޓަރު ބަނަހަށާއި ހޮޓްޑޯގް ބަނަހަށާއި ބަރގަރ ބަނަހަށެވެ.

(3)  ފާރޮށި ކަމަށް ބުނެފައި އެވަނީ، އޭގެ ޒާތަށް އެއްވެސް ބަދަލެއް ނުގެނެސް ވިއްކާ އެންމެހައި ބާވަތްތަކުގެ ފާރޮށްޓަށެވެ.

(ލ) ޤާނޫނުގެ ޖަދުވަލު 1 ގެ 16 ވަނަ އައިޓަމުގެ ބޭނުމަށް، ކުޑަކުދިންގެ ނެޕީގެ ތެރޭގައި ނެޕީ ފޮތި ހިމެނޭނެއެވެ.

(ގ) ޤާނޫނުގެ ޖަދުވަލު 1 ގެ 17 ވަނަ އައިޓަމުގެ ބޭނުމަށް، ތުއްތުކުދިންގެ ކާނާ ކަމަށް ބުނެފައި އެވަނީ، 3 (ތިނެއް) އަހަރުން ދަށުގެ ކުދިންނަށް ޚާއްޞަކޮށް ތައްޔާރުކޮށްފައި ހުންނަ، އެ ކުދިންނަށް ޚާއްޞަ ކާނާގެ ގޮތުގައި ލޭބަލްކޮށްފައިވާ އެންމެހައި ކާނާއަށެވެ.

(ޏ) ޤާނޫނުގެ ޖަދުވަލު 1 ގެ 22 ވަނަ އައިޓަމުގެ ބޭނުމަށް، އެފަދަ ތަކެތިކަމަށް ބުނެފައި އެ ވަނީ، ޙައިޟުގެ ދުވަސްވަރުގައި ނުވަތަ ނިފާސްކަމުގެ ދުވަސްވަރުގައި ބޭނުންކުރުމަށް ތައްޔާރުކޮށްފައި ހުންނަ، ސެނިޓަރީ ޓަވަލަށާއި، ސެނިޓަރީ ޕެޑަށާއި، ޕޭންޓީ ލައިނަރސްއަށާއި، ޕެޑު ނުވަތަ ޓަވަލާއެކީ ބޭނުންކުރުމަށް އުފައްދާފައިވާ ސެނިޓަރީ ބެލްޓަށާއި، ޙައިޟުގެ ދުވަސްވަރު ބޭނުންކުރުމަށް އުފައްދާފައިވާ އިންޓަރނަލް ޑިވައިސް (ކީޕަރސް) އަށާއި، މެޓަރނިޓީ ޕެޑަށެވެ.

41. ދިވެހިރާއްޖެއިން އެކްސްޕޯޓްކުރެވޭ މުދަލާއި ޚިދުމަތް 

(ހ) ޤާނޫނުގެ 22 ވަނަ މާއްދާގެ (ށ) ގެ ބޭނުމަށް، ދިވެހިރާއްޖެއިން އެކްސްޕޯޓްކުރެވޭ މުދަލާއި ޚިދުމަތް ކަމަށް ބުނެފައި އެވަނީ، މުދާ އެކްސްޕޯޓް ކުރުމަށް ނުވަތަ ރީއެކްސްޕޯޓް ކުރުމަށް މޯލްޑިވްސް ކަސްޓަމްސް ސަރވިސްގައި ރަޖިސްޓަރީކޮށްގެން އެކްސްޕޯޓްކުރާ ނުވަތަ ރީއެކްސްޕޯޓްކުރާ މުދަލަށާއި، ޑިއުޓީ ފްރީ ފިހާރަތަކުން ފޯރުވައިދޭ މުދަލަށާއި، ރަޖިސްޓަރީކޮށްފައިވާ ފަރާތަކުން އެކްސްޕޯޓްކުރާ ޚިދުމަތަށެވެ.

(ށ) މި މާއްދާގެ (ހ) ގެ ބޭނުމަށް، އެކްސްޕޯޓްކުރާ ޚިދުމަތް ކަމަށް ބުނެފައި އެވަނީ، ދިވެހިރާއްޖެއިން ބޭރުގައި ހުރި ފަރާތަކަށް ދިވެހިރާއްޖޭގައި ހުރި ފަރާތަކުން ފޯރުވައިދޭ ޚިދުމަތްތަކުގެ ތެރެއިން ދިވެހިރާއްޖެއިން ބޭރުގައި ބޭނުންކުރާ ޚިދުމަތްތަކަށެވެ.

(ނ) މި މާއްދާގެ (ށ) ގެ ބޭނުމަށް، ކޮންޓްރެކްޓުގައި ބުނާ ޚިދުމަތް ފޯރުވައިދެވުނު ފަރާތް ހުރީ ކޮންމެ ތަނެއްގައި ނަމަވެސް، ޚިދުމަތް ފޯރުވައިދީފައިވަނީ ދިވެހިރާއްޖޭގައި ވަޒަންވެރިވެފައިނުވާ ފަރާތަކަށްނަމަ އަދި އެ ޚިދުމަތް ފޯރުވައިދެވުނު އިރު އެ ފަރާތް ހުރީ ދިވެހިރާއްޖެއިން ބޭރުގައިނަމަ، އަންނަނިވި ޙާލަތުތަކުންކުރެ ޙާލަތެއްގައި، އެއީ ދިވެހިރާއްޖެއިން ބޭރުގައި ބޭނުންކުރާ ޚިދުމަތެއް ކަމަށް ބެލެވޭނެއެވެ.

(1) އެ ޚިދުމަތް ފިޒިކަލީ ލިބިގަންނަނީ ދިވެހިރާއްޖޭގައި ހުރި، އެ ޚިދުމަތް ލިބިގަންނަ ނުވަތަ އެއިން މަންފާ ލިބިގަންނަ ފަރާތަކަށް ނުވުން؛ އަދި

(2) އެ ޚިދުމަތަކީ އެ ޚިދުމަތް ފޯރުވައިދެވުނު އިރު ދިވެހިރާއްޖޭގައި ހުރި އެއްވެސް މުދަލަކާ ސީދާ ގުޅިގެން ފޯރުވައިދީފައިވާ ޚިދުމަތަކަށް ނުވުން.

(ރ) ދިވެހިރާއްޖޭގައި ވަޒަންވެރިވެފައިނުވާ، އަދި ޚިދުމަތް ފޯރުވައިދެވުނު އިރު ދިވެހިރާއްޖޭގައި ނެތް ފަރާތަކަށް މަޢުލޫމާތު ނުވަތަ އެޑްވައިސް ދިނުމުގެ ޚިދުމަތަކަށް މި މާއްދާގެ (ނ) ގެ (2) ރައްދެއްނުވާނެއެވެ.

(ބ) ޓެލެކޮމިއުނިކޭޝަން ޚިދުމަތްތަކަކަށް މި މާއްދާގެ (ނ) ރައްދެއް ނުވާނެއެވެ.

(ޅ) މި މާއްދާގެ (ށ) ގެ ބޭނުމަށް:

(1) ޓެލެކޮމިއުނިކޭޝަން ޚިދުމަތްދޭ ބޭރުގެ ފަރާތެއްގެ ކަސްޓަމަރަކު، ޓެލެކޮމިއުނިކޭޝަން ޚިދުމަތްދޭ ދިވެހިރާއްޖޭގެ ފަރާތެއްގެ ޓެލެކޮމިއުނިކޭޝަން ނެޓްވަރކް ބޭނުންކުރުމަށް މަގުފަހިކޮށްދިނުމުގެ ގޮތުން، ޓެލެކޮމިއުނިކޭޝަން ޚިދުމަތްދޭ ދިވެހިރާއްޖޭގެ ފަރާތަކުން ޓެލެކޮމިއުނިކޭޝަން ޚިދުމަތްދޭ ބޭރުގެ ފަރާތަކަށް ފޯރުވައިދޭ ޓެލެކޮމިއުނިކޭޝަން ޚިދުމަތް، ދިވެހިރާއްޖެއިން ބޭރުގައި ބޭނުންކުރާ ޚިދުމަތްތަކުގެ ތެރޭގައި ހިމެނެއެވެ؛

(2) ޓެލެކޮމިއުނިކޭޝަން ޚިދުމަތްދޭ ދިވެހިރާއްޖޭގެ ފަރާތެއްގެ ކަސްޓަމަރަކު، ޓެލެކޮމިއުނިކޭޝަން ޚިދުމަތްދޭ ބޭރުގެ ފަރާތެއްގެ ޓެލެކޮމިއުނިކޭޝަން ނެޓްވަރކް ބޭނުންކުރުމަށް މަގުފަހިކޮށްދިނުމުގެ ގޮތުން، ޓެލެކޮމިއުނިކޭޝަން ޚިދުމަތްދޭ ބޭރުގެ ފަރާތަކުން ޓެލެކޮމިއުނިކޭޝަން ޚިދުމަތްދޭ ދިވެހިރާއްޖޭގެ ފަރާތަކަށް ފޯރުވައިދޭ ޓެލެކޮމިއުނިކޭޝަން ޚިދުމަތް ބެލެވޭނީ، އެ ކަސްޓަމަރު ދިވެހިރާއްޖޭގައި ބޭނުންކުރާ ޚިދުމަތުގެ ގޮތުގައެވެ.

(ކ) މި މާއްދާގެ (ޅ) ގެ ބޭނުމަށް:

(1) "ޓެލެކޮމިއުނިކޭޝަން ޚިދުމަތްދޭ ދިވެހިރާއްޖޭގެ ފަރާތެއް" ކަމަށް ބުނެފައި އެ ވަނީ، ސަރުކާރުގެ ކަމާބެހޭ އިދާރާގައި ރަޖިސްޓަރީކޮށްގެން ދިވެހިރާއްޖޭގައި ޓެލެކޮމިއުނިކޭޝަން ޚިދުމަތް ފޯރުވައިދޭ ފަރާތްތަކަށެވެ؛ އަދި

(2) "ޓެލެކޮމިއުނިކޭޝަން ޚިދުމަތްދޭ ބޭރުގެ ފަރާތެއް" ކަމަށް ބުނެފައި އެ ވަނީ، ޓެލެކޮމިއުނިކޭޝަން ޚިދުމަތްދޭ ދިވެހިރާއްޖޭގެ ފަރާތެއް ކަމުގައި ނުވާ، ޓެލެކޮމިއުނިކޭޝަން ޚިދުމަތް ފޯރުވައިދޭ އެހެނިހެން ފަރާތްތަކަށެވެ.

(އ) މި މާއްދާގެ ބޭނުމަށް:

(1) ދިވެހިރާއްޖޭގައި ވަޒަންވެރިވެފައިނުވާ ފަރާތެއް ކަމަށް ބުނެފައި އެވަނީ، ޤާނޫނު ނަންބަރު 25/2019 (އާމްދަނީން ޓެކްސް ނެގުމުގެ ޤާނޫނު) ގެ 79  ވަނަ މާއްދާގެ (ހލ) ގައި އެ ޢިބާރާތަށް ދީފައިވާ މާނައިގެ ތެރޭގައި ހިމެނޭ ފަރާތަކަށެވެ؛ އަދި

(2) ދިވެހިރާއްޖޭގައި ވަޒަންވެރިވެފައިނުވާ ފަރާތެއްގެ މުވައްޒަފެއް ނުވަތަ އެ ފަރާތް ތަމްސީލުކުރާ އެހެން ފަރާތެއް، އެ ޚިދުމަތް ފޯރުވައިދިނުމުގެ މަސައްކަތުގައި ދިވެހިރާއްޖޭގައި ހުރިނަމަ، އެ ފަރާތަކީ ދިވެހިރާއްޖޭގައި ހުރި ފަރާތެއް ކަމަށް ބެލެވޭނެއެވެ.

42. ހިނގަމުންދާ ވިޔަފާރިއެއް ވިއްކައިލުން

(ހ) ޤާނޫނުގެ 22 ވަނަ މާއްދާގެ (ނ) ގެ ބޭނުމަށް، ހިނގަމުންދާ ވިޔަފާރިއެއް ވިއްކައިލުމުގެ މުޢާމަލާތުން ސުން-ރޭޓުގައި ޖީ.އެސް.ޓީ ދައްކަންޖެހޭނީ އަންނަނިވި ޙާލަތުތަކުގައެވެ.

(1) އެ ވިޔަފާރީގެ އައު މިލްކުވެރި ފަރާތަކީ ޤާނޫނުގެ ދަށުން މީރާގައި ރަޖިސްޓަރީކޮށްފައިވާ ފަރާތަކަށްވުން، ނުވަތަ އެ ފަރާތަކީ ރަޖިސްޓަރީކޮށްފައިވާ ފަރާތަކަށްނުވާނަމަ އެ މުޢާމަލާތް ކުރުމުގެ ކުރިން އެ ފަރާތުގެ އަމިއްލަ އިޚްތިޔާރުގައި މީރާގައި ރަޖިސްޓަރީކުރުން؛ ނުވަތަ

(2) އެ ވިޔަފާރި ވިއްކައިލުމުގެ މުޢާމަލާތުގެ މައިގަނޑު ބޭނުމަކީ ފަރުދަކު ނުވަތަ ފަރުދުންތަކެއް ހިންގާ ވިޔަފާރިއެއް، އޭނާ ނުވަތަ އެ މީހުން އެ ކުންފުންޏެއްގެ ޝެއަރ ކެޕިޓަލްގެ މަދުވެގެން 99 އިންސައްތަ ހިއްސާކުރާ ކުންފުންޏެއްގެ މިލްކުވެރިކަމުގެ ދަށަށް ބަދަލުކުރުން ކަމަށްވުން؛ ނުވަތަ

(3) އެ މުޢާމަލާތުން ސުން-ރޭޓުގައި ޖީ.އެސް.ޓީ ނެގިކަމުގައިވިޔަސް ދައުލަތުގެ އާމްދަނީއަށް އުނިކަމެއް ނާންނާނެކަމަށް މީރާއިން ކަނޑައެޅުން.

(ށ) މިލްކުވެރިކަން ބަދަލުކުރުމުގެ މައިގަނޑު މަޤްޞަދަކީ ނުވަތަ މައިގަނޑު އެއް މަޤްޞަދަކީ ޓެކްސް ދެއްކުމުން އެއްކިބާވުން ކަމަށް ކޮމިޝަނަރ ޖެނެރަލަށް ގަބޫލުކުރެވޭނަމަ މި މާއްދާގެ (ހ) ގެ (2) ރައްދެއް ނުވާނެއެވެ.

43. އައުޓްޕުޓް ޓެކްސް އަދި އިންޕުޓް ޓެކްސް

(ހ) ރަޖިސްޓަރީކޮށްފައިވާ ފަރާތަކުން ފޯރުވައިދޭ މުދަލާއި ޚިދުމަތުގެ އަގުން ޤާނޫނުގައިވާ ގޮތުގެމަތިން ނެގޭ ޖީ.އެސް.ޓީ އަކީ އެ ފަރާތުގެ އައުޓްޕުޓް ޓެކުހެވެ.

(ށ) ރަޖިސްޓަރީކޮށްފައިވާ ފަރާތަކުން، ރަޖިސްޓަރީކޮށްފައިވާ އެހެން ފަރާތަކަށް ޓެކްސް ނެގޭ މުދަލެއް ނުވަތަ ޚިދުމަތެއް ފޯރުވައިދޭނަމަ، ޤާނޫނުގައިވާ ގޮތުގެމަތިން އެ މުދަލުގެ ނުވަތަ ޚިދުމަތުގެ އަގުން ޖީ.އެސް.ޓީ ނަގަންވާނެއެވެ. އަދި މިގޮތުން ނެގޭ ޖީ.އެސް.ޓީ އަކީ މުދާ ނުވަތަ ޚިދުމަތް ލިބިގަތް ފަރާތުގެ އިންޕުޓް ޓެކުހެވެ.

(ނ) ރަޖިސްޓަރީކޮށްފައިވާ ފަރާތަކުން ފޯރުވައިދޭ މުދަލަކާ ނުވަތަ ޚިދުމަތަކާ ގުޅިގެން ޤާނޫނުގައިވާ ގޮތުގެމަތިން ނަގާ ޖީ.އެސް.ޓީ އެ ފަރާތަށް ދެއްކުމަކީ އެ މުދާ ނުވަތަ ޚިދުމަތް ލިބިގަތް ފަރާތުގެ މައްޗަށް ލާޒިމުކަމެކެވެ.

(ރ) ރަޖިސްޓަރީކޮށްފައިވާ ފަރާތަކުން ފޯރުވައިދޭ މުދަލަކީ ނުވަތަ ޚިދުމަތަކީ ރަޖިސްޓަރީކޮށްފައިވާ އެހެން ފަރާތަކުން ލިބިގަތުމަށްފަހު ފޯރުވައިދޭ މުދަލެއް ނުވަތަ ޚިދުމަތެއް ކަމުގައިވާނަމަ، އެ މުދަލާ ނުވަތަ ޚިދުމަތާ ގުޅިގެން މީރާއަށް ޖީ.އެސް.ޓީ ދައްކާނީ، އެ ފަރާތަކުން ދައްކަންޖެހޭ އައުޓްޕުޓް ޓެކުހުގެ އަދަދުން އެ ފަރާތުގެ އިންޕުޓް ޓެކުހުގެ އަދަދު، ޤާނޫނާއި މި ގަވާއިދުގައިވާ ގޮތުގެމަތިން އުނިކުރުމުން ލިބޭ އަދަދެވެ.

(ބ) ޤާނޫނުގެ 15 ވަނަ މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ ތަނެއް ނުވަތަ އުޅަނދެއް ހިންގާ ފަރާތަކުން، އެ ތަނެއްގެ ނުވަތަ އެ އުޅަނދެއްގެ މުވައްޒަފުންނަށް ޚާއްޞަކުރެވިގެން ހިންގާ ފިހާރައަކަށް ނުވަތަ ކެފޭއަކަށް މުދަލާއި ޚިދުމަތް ފޯރުވައިދޭ ނަމަ އަދި އެ ފިހާރަ ނުވަތަ ކެފޭ ހިންގާ ފަރާތަކީ އެ ތަން ނުވަތަ އެ އުޅަނދު ހިންގާ ފަރާތް ކަމުގައި ވާ ނަމަ، އަދި އެ ފިހާރަ ނުވަތަ ކެފޭ ހިންގާ ފަރާތް ޖީ.އެސް.ޓީ.އަށް ރަޖިސްޓަރީކޮށްފައިވާ ނަމަ، އެ ފަދަ މުދަލާއި ޚިދުމަތުން، ޤާނޫނުގެ 15 ވަނަ މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ ތަނުން ނުވަތަ އުޅަނދުން އައުޓްޕުޓް ޓެކްސް ނަގާކަށް ނުޖެހޭނެއެވެ.

44. އިންޕުޓް ޓެކްސް އުނި ނުކުރެވޭނެ ހާލަތުތައް

(ހ) ރަޖިސްޓަރީކޮށްފައިވާ ފަރާތަކުން ލިބިގަތް މުދަލަކާ ނުވަތަ ޚިދުމަތަކާ ގުޅޭ އިންޕުޓް ޓެކްސް، އަންނަނިވި ޙާލަތުތަކުގައި އެ ފަރާތުގެ އައުޓްޕުޓް ޓެކުހުން އުންޏެއް ނުކުރެވޭނެއެވެ.

(1) މުދާ ނުވަތަ ޚިދުމަތް ފޯރުވައިދިން ފަރާތުން ޤާނޫނާއި މި ގަވާއިދުގައި ވާ ގޮތުގެ މަތިން ދޫކޮށްފައިވާ ޞައްޙަ ޓެކްސް އިންވޮއިސްއެއް ނުވަތަ ޑެބިޓް ނޯޓެއް، މުދާ ނުވަތަ ޚިދުމަތް ލިބިގަތް ފަރާތުގެ އަތުގައި ނެތުން؛ ނުވަތަ

(2) އެ ފަރާތުން ބޭނުންކުރާ ޖީ.އެސް.ޓީ ހިސާބުކުރުމުގެ އަސާސްގެ ދަށުން އިންޕުޓް ޓެކުހުގެ އަދަދު އުނިކުރަންޖެހޭ ޓެކްސް ނެގޭ މުއްދަތު ނިމުނު ތާރީޚުން ފެށިގެން 12 (ބާރަ) މަސްދުވަސް ފާއިތުވެފައިވުން؛ ނުވަތަ

(3) އެ މުދަލަކީ ނުވަތަ ޚިދުމަތަކީ ދިވެހިރާއްޖޭގައި ފޯރުވައިދީފައިވާ މުދަލެއް ނުވަތަ ޚިދުމަތެއް ކަމުގައި ނުވުން؛ ނުވަތަ

(4) މުދާ ނުވަތަ ޚިދުމަތް ލިބިގަތުމަށް ކޮށްފައިވާ ޚަރަދަކީ މި ގަވާއިދުގެ އެހެން މާއްދާއެއްގެ ދަށުން އިންޕުޓް ޓެކްސް އުނިނުކުރެވޭނެ ބާވަތުގެ ޚަރަދެއް ކަމުގައިވުން.

(5) އިންޕުޓް ޓެކްސް ނިސްބަތްވާ މުދަލަށް ނުވަތަ ޚިދުމަތަށް އައުޓްޕުޓް ޓެކްސް ދައްކައިފައި ނުވުން.

(ށ) މި މާއްދާގެ (ހ) ގެ (1) ގެ ބޭނުމަށް، ޞައްޙަ ޓެކްސް އިންވޮއިސްއެއް ކަމަށް ބުނެފައި އެވަނީ، ޤާނޫނުގެ 42 ވަނަ މާއްދާގެ (ހ) ގައި ބަޔާންކޮށްފައިވާ އެންމެހައި މަޢުލޫމާތު ހިމަނައިގެން ތައްޔާރުކޮށްފައިވާ ޓެކްސް އިންވޮއިސްގެ އަސްލަށެވެ. އެބަހީ، ޤާނޫނުގެ 42 ވަނަ މާއްދާގެ (ށ) ގެ ދަށުން ދޫކުރާ ޓެކްސް އިންވޮއިސްއަކީ މި މާއްދާގެ (ހ) ގެ (1) ގެ ބޭނުމަށް ޞައްޙަ ޓެކްސް އިންވޮއިސްއެއްގެ ގޮތުގައެއް ނުބެލެވޭނެއެވެ.

45. އިންޕުޓް ޓެކްސް އުނި ނުކުރެވޭނެ ޚަރަދުތައް

ރަޖިސްޓަރީކޮށްފައިވާ ފަރާތަކުން ކުރާ އަންނަނިވި ބާވަތްތަކުގެ ކެޕިޓަލް އަދި ރެވެނިއު ޚަރަދުތަކާ ގުޅޭ އިންޕުޓް ޓެކްސް، އެ ފަރާތުގެ އައުޓްޕުޓް ޓެކުހުން އުންޏެއް ނުކުރެވޭނެއެވެ.

(ހ) ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތް ފޯރުވައިދިނުމަށްޓަކައި ކުރާ ޚަރަދުތައް؛

(ށ) ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތް ފޯރުވައިދިނުމަށާއި، ޓެކްސް ނެގޭ މުދަލާއި ޚިދުމަތް ފޯރުވައިދިނުމަށާއި، މި ދެ ބޭނުމަށް ކުރާ ޚަރަދާ ގުޅޭ އިންޕުޓް ޓެކުހުގެ ތެރެއިން ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތް ފޯރުވައިދިނުމަށް ނިސްބަތްވާނެކަމަށް ޢަދުލުވެރިގޮތަކަށް ލަފާކުރެވޭ އަދަދު؛

(ނ) އެ ފަރާތުގެ މުވައްޒަފުންގެ ގޮތުގައި ނުހިމެނޭ ފަރާތްތަކަށް ދޭ އިނާޔަތްތައް ދިނުމަށް ކޮށްފައިވާ ޚަރަދުތައް؛

(ރ) ވިޔަފާރީގެ ބޭނުން ނޫން އެހެން ބޭނުންތަކަށް ނުވަތަ އެ ފަރާތުގެ އަމިއްލަ ބޭނުމަށް ހޯދާފައިވާ މުދަލާއި ޚިދުމަތާ ގުޅޭ ޚަރަދުތައް؛

(ބ) ކްލަބް ޖަމްޢިއްޔާތަކަށް ދައްކާ ސަބްސްކްރިޕްޝަން ފީ؛

(ޅ) އެކިއެކި ފަރާތްތަކަށް ހިލޭ ބެހުމަށްޓަކައި ހޯދާ މުދަލާ ގުޅޭ ޚަރަދުތައް؛

(ކ) ފަންޑް ރެއިޒިން ޙަރަކާތްތައް ހިންގުމަށް ކުރާ ޚަރަދުތައް؛

(އ) މުދާ ނުވަތަ ޚިދުމަތް ފޯރުވައިދިން ފަރާތުން ޤާނޫނާއި މި ގަވާއިދާ ޚިލާފަށް ނަގާފައިވާ ޖީ.އެސް.ޓީ (މުދާ ނުވަތަ ޚިދުމަތް ފޯރުވައިދިން ފަރާތުން އެ މުޢާމަލާތާ ގުޅޭ އައުޓްޕުޓް ޓެކްސް މީރާއަށް ދައްކާފައިނުވާނަމަ).

46. ކެޕިޓަލް ޚަރަދުތަކާ ގުޅޭ އިންޕުޓް ޓެކްސް

(ހ) ރަޖިސްޓަރީކޮށްފައިވާ ފަރާތަކުން، އެ ފަރާތެއްގެ ޓެކްސް ނެގޭ ހަރަކާތަކަށް ނިސްބަތްވާ ކެޕިޓަލް ޚަރަދާ ގުޅޭ އިންޕުޓް ޓެކްސް އުނިކުރެވޭނީ، އަންނަނިވި ގޮތުގެ މަތިން، އެ ޓެކްސް ނެގޭ ހަރަކާތުގެ އައުޓްޕުޓް ޓެކުހުންނެވެ. 

(1) އެއް ކަމަކަށް ކުރާ ކެޕިޓަލް ޚަރަދު ނުވަތަ އެއް ބާވަތެއްގެ އެއްޗެހިތަކެއް ހޯދުމަށް އެއްފަހަރާ ކުރާ ކެޕިޓަލް ޚަރަދުގެ ޖުމުލަ -/500,000 (ފަސް ލައްކަ) ރުފިޔާ ނުވަތަ އެއަށްވުރެ ކުޑަނަމަ، އައުޓްޕުޓް ޓެކުހުން އެ ޚަރަދަކާ ގުޅޭ އިންޕުޓް ޓެކްސް އެއްފަހަރާ އުނިކުރެވިދާނެއެވެ. މި ގޮތުން، އެއްފަހަރާ އުނިކުރެވޭނީ އެ ކެޕިޓަލް ޚަރަދުކުރި ޓެކްސް ނެގޭ މުއްދަތު ނިމުނު ތާރީޚުން ފެށިގެން 12 (ބާރަ) މަސްދުވަހުގެ ތެރޭގައެވެ.

(2) އެއް ކަމަކަށް ކުރާ ކެޕިޓަލް ޚަރަދު ނުވަތަ އެއް ބާވަތެއްގެ އެއްޗެހިތަކެއް ހޯދުމަށް އެއްފަހަރާ ކުރާ ކެޕިޓަލް ޚަރަދުގެ ޖުމުލަ -/500,000 (ފަސް ލައްކަ) ރުފިޔާއަށްވުރެ ބޮޑުނަމަ، އެ ޚަރަދުކުރި ޓެކްސް ނެގޭ މުއްދަތުން ފެށިގެން ކުރިއަށް އޮތް 36 (ތިރީސް ހައެއް) މަސްދުވަހަށް އެއްވަރަކަށް ބަހާލައިގެން، އައުޓްޕުޓް ޓެކުހުން އެ ޚަރަދަކާ ގުޅޭ އިންޕުޓް ޓެކްސް އުނިކުރެވިދާނެއެވެ. 

(3) މި މާއްދާގެ (ހ) ގެ (1) ވަނަ ނަންބަރު ރައްދުވާ ހާލަތުގައި، އެއްވެސް ސަބަބަކާހުރެ 12 (ބާރަ) މަސްދުވަސް ނިމޭއިރު އުނި ނުކުރެވި ހުރި ކެޕިޓަލް ޚަރަދާ ގުޅޭ އިންޕުޓް ޓެކުހާއި،  މި މާއްދާގެ (ހ) ގެ (2) ވަނަ ނަންބަރު ރައްދުވާ ހާލަތުގައި، އެއްވެސް ސަބަބަކާހުރެ 36 (ތިރީސް ހައެއް) މަސްދުވަސް ނިމޭއިރު އުނި ނުކުރެވި ހުރި ކެޕިޓަލް ޚަރަދާ ގުޅޭ އިންޕުޓް ޓެކްސް، ކުރިޔަށްހުރި ޓެކްސް ނެގޭ މުއްދަތުތަކުގައި، އައުޓްޕުޓް ޓެކުހުން އުނިކުރެވިދާނެއެވެ. މި އަކުރަށް ޢަމަލުކުރާނީ، މި މާއްދާގެ (ހ) ގެ (5) ވަނަ ނަންބަރާ ޚިލާފުނުވާ ގޮތެއްގެ މަތިންނެވެ.

(4) އެ ޚަރަދުކުރި ޓެކްސް ނެގޭ މުއްދަތުގެ ނިޔަލަށް، އެ ހަރަކާތަށް، އެއްވެސް ޓެކްސް ނެގޭ މުއްދަތެއްގައި އައުޓްޕުޓް ޓެކުހެއް ލިބިފައިނުވާނަމަ، މި މާއްދާގެ (ހ) ގެ (2) ވަނަ ނަންބަރަށް ޢަމަލުކުރުމުގައި، 36 (ތިރީސް ހައެއް) މަސް ގުނަން ފަށާނީ ފުރަތަމަ ފަހަރަށް އެ ހަރަކާތަށް އައުޓްޕުޓް ޓެކުހެއް ލިބޭ ޓެކްސް ނެގޭ މުއްދަތު ނިމޭ މަހަކީ ފުރަތަމަ މަސް ކަމުގައި ބަލައިގެންނެވެ. 

(5) މި މާއްދާގެ (ހ) ގެ (2) ވަނަ ނަންބަރަށް ޢަމަލުކުރުމުގައި، ޓެކްސް ނެގޭ މުއްދަތެއްގައި ކެޕިޓަލް ޚަރަދުތަކާ ގުޅިގެން އުނިކުރެވޭ އިންޕުޓް ޓެކުހުގެ އަދަދު، އެ ހަރަކާތެއްގެ އެ މުއްދަތުގެ އައުޓްޕުޓް ޓެކުހުން އެ މުއްދަތުގައި އުނިކުރެވެންހުރި ރެވެނިއު ޚަރަދުތަކާ ގުޅޭ އިންޕުޓް ޓެކްސްގެ ޖުމުލަ އަދަދާއި، މި މާއްދާގެ (ހ) ގެ (1) ވަނަ ނަންބަރުގެ ދަށުން އުނިކުރެވެންހުރި ކެޕިޓަލް ޚަރަދާ ގުޅޭ އިންޕުޓް ޓެކްސްގެ ޖުމުލަ އަދަދު އުނިކުރުމުން އަންނަ އަދަދަށްވުރެ އިތުރުވެގެން ނުވާނެއެވެ. އެފަދައިން އިތުރުވާ ޙާލަތުގައި، އެ އިތުރުވި ބައި އުނިކުރެވޭނީ މި މާއްދާގައިވާ ގޮތުގެ މަތިން، ޖެހިގެން އަންނަ ޓެކްސް ނެގޭ މުއްދަތުތަކުގައެވެ.

(ށ) ކެޕިޓަލް ޚަރަދަކާ ގުޅޭ އިންޕުޓް ޓެކްސް އުނިކުރެވޭނީ އެ ޓެކްސް ނެގޭ ހަރަކާތަކުން އައުޓްޕުޓް ޓެކުހެއް ލިބުމުންނެވެ. މި ގޮތުން އައުޓްޕުޓް ޓެކްސް ލިބުނުކަމަށް ބަލާނީ، އެ ޚަރަދު ކުރެވުނު ޓެކްސް ނެގޭ ހަރަކާތުގެ މައިގަނޑު ވިޔަފާރިން އައުޓްޕުޓް ޓެކުހެއް ލިބުމުންނެވެ.

(ނ) ކެޕިޓަލް ޚަރަދުކުރި ޓެކްސް ނެގޭ މުއްދަތުގެ ޓެކްސް ބަޔާނާއެކު، މީރާއިން ކަނޑައަޅާ ފޯމެޓެއްގައި، ކެޕިޓަލް ޚަރަދުގެ މަޢުލޫމާތު މީރާއަށް ހުށަހަޅަންވާނެއެވެ. މި ގޮތަށް މައުލޫމާތު ހުށަހަޅާފައިނުވާ ކެޕިޓަލް ޚަރަދަކާ ގުޅޭ އިންޕުޓް ޓެކްސް އެއްވެސް ޓެކްސް ނެގޭ މުއްދަތެއްގައި އުނި ނުކުރެވޭނެއެވެ.

(ރ) ރަޖިސްޓަރީކޮށްފައިވާ ފަރާތަކުން ކެޕިޓަލް ޚަރަދެއް ކުރަނީ ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތް ފޯރުވައިދިނުމަށާއި، ޓެކްސް ނެގޭ މުދަލާއި ޚިދުމަތް ފޯރުވައިދިނުމަށާއި، މި ދެ ބޭނުމަށް ކަމުގައިވާނަމަ، އެ ކެޕިޓަލް ޚަރަދާ ގުޅޭ އިންޕުޓް ޓެކުހުގެ ތެރެއިން ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތް ފޯރުވައި ދިނުމަށް ނިސްބަތްވާނެކަމަށް ޢަދުލުވެރިގޮތަކަށް ލަފާކުރެވޭ އަދަދު، އެ ފަރާތުގެ އައުޓްޕުޓް ޓެކުހުން އުނި ނުކުރެވޭނެއެވެ. އެހެންނަމަވެސް، އެ ޚަރަދުގެ ތެރެއިން ޓެކްސް ނެގޭ މުދަލާއި ޚިދުމަތް ފޯރުވައި ދިނުމަށް ނިސްބަތްވާނެ ކަމަށް ޢަދުލުވެރިގޮތަކަށް ލަފާކުރެވޭ އަދަދު، މި މާއްދާގައިވާ ގޮތުގެމަތިން އެ ފަރާތުގެ އައުޓްޕުޓް ޓެކުހުން އުނިކުރެވިދާނެއެވެ.

(ބ) ޓެކްސް ރޫލިންގ TR-2017/G45 މެދުވެރިކޮށް މި މާއްދާއަށް ގެނެވުނު އިޞްލާޙުތަކަށް ޢަމަލުކުރާނީ 1 ޖަނަވަރީ 2018 އިން ފެށިގެންނެވެ. އެ ތާރީޚުގެ ކުރިން، އެ ވަގުތު މި ގަވާއިދުގައި ބަޔާންކޮށްފައިވާ ގޮތަށް ކެޕިޓަލް ޚަރަދާގުޅޭ އިންޕުޓް ޓެކްސް އުނިކުރުމުގައި ޢަމަލުކޮށްފައިވާ ނުވަތަ ޢަމަލުކުރަން ފަށާފައިވާ ފަރާތްތަކަށް، އެ ކެޕިޓަލް ޚަރަދާގުޅޭ އިންޕުޓް ޓެކްސް އުނިކުރުމުގައި މި އިސްލާޙުތަކުގައި ބަޔާންކޮށްފައިވާ އުސޫލުތަކަށް ޢަމަލުކުރެވިދާނެއެވެ.

47. ޖީ.އެސް.ޓީ އަށް ރަޖިސްޓަރީކުރުމުގެ ކުރިން ހޯދާފައިވާ މުދަލާއި ޚިދުމަތާ ގުޅޭ އިންޕުޓް ޓެކްސް

މި ގަވާއިދުގެ އެހެން މާއްދާއެއްގައި އެހެން ގޮތަކަށް ބަޔާންކޮށްފައި އޮތްނަމަވެސް، ރަޖިސްޓަރީކޮށްފައިވާ ފަރާތް ޖީ.އެސް.ޓީ އަށް ރަޖިސްޓަރީކުރުމުގެ ކުރިން ގަނެފައިވާ މުދަލަކާ ނުވަތަ ހޯދާފައިވާ ޚިދުމަތަކާ ގުޅޭގޮތުން އިންޕުޓް ޓެކްސް އުންޏެއް ނުކުރެވޭނެއެވެ.

48. މުދާ ނުވަތަ ޚިދުމަތް ލިބިގަތް ފަރާތުން ދަރަނި އަދާ ނުކޮށް އިންޕުޓް ޓެކްސް އުނިނުކުރުން

(ހ) ރަޖިސްޓަރީކޮށްފައިވާ ފަރާތަކުން ދަރަންޏަށް ކޮށްފައިވާ މުޢާމަލާތަކާ ގުޅޭގޮތުން އިންޕުޓް ޓެކްސް އުނިކޮށްފައިވަނިކޮށް، އެ ދަރަނި އަދާކުރަންޖެހޭ ދުވަހަށް ނުވަތަ އެ ދަރަނި ދޫކުރި ފަރާތާއެކު އެއްބަސްވެވިފައިވާ އެހެން ދުވަހަކަށް އެ ދަރަނި ނުވަތަ އެއިން ބައެއް އަދާނުކޮށްފިނަމަ، އެގޮތުން އުނިކުރެވުނު އަދަދުގެ ތެރެއިން، އެ އަދާނުކުރި އަދަދާއި މުޢާމަލާތުގެ ޖުމުލަ އަދަދު އަޅާކިޔާއިރު މި ދެ އަދަދުގެ މެދުގައިވާ ނިސްބަތުން ޖެހޭ އަދަދު، އެ ދަރަނި އަދާކުރަންޖެހޭ ޓެކްސް ނެގޭ މުއްދަތުގެ އައުޓްޕުޓް ޓެކުހުގެ ގޮތުގައި ދައްކަންވާނެއެވެ.

(ށ) މި މާއްދާގެ (ހ) އާއި އެއްގޮތްވާ ގޮތުގެމަތިން އައުޓްޕުޓް ޓެކްސް ދައްކާފައިވާ އަދަދަކާ ގުޅޭ ދަރަންޏެއް ނުވަތަ އެއިން ބައެއް ރަޖިސްޓަރީކޮށްފައިވާ ފަރާތުން އަދާކޮށްފިނަމަ، އެގޮތުން އައުޓްޕުޓް ޓެކުހުގެ ގޮތުގައި ދެއްކި އަދަދުގެ ތެރެއިން، އެ އަދާކުރި އަދަދާއި މި މާއްދާގެ (ހ) ގައި ބަޔާންކޮށްފައިވާ ދަރަނީގެ އަދަދު އަޅާކިޔާއިރު މި ދެ އަދަދުގެ މެދުގައިވާ ނިސްބަތުން ޖެހޭ އަދަދު، ޤާނޫނުގެ 36 ވަނަ މާއްދާގެ (ނ) ގެ (1) ގެ ދަށުން އިންޕުޓް ޓެކުހުގެ ގޮތުގައި އުނިކުރެވިދާނެއެވެ.

49. އިސްތިސްނާ މުދަލާއި ޚިދުމަތަކީ އެ ފަރާތުގެ މުޅި ވިޔަފާރީގެ %5 އަށްވުރެ ކުޑަ ބައެއް ކަމުގައި ހިމެނޭ ފަރާތްތަކަށް ދެވޭ ލުއި

މި ގަވާއިދުގެ އެހެން މާއްދާއެއްގައި އެހެން ގޮތަކަށް ބަޔާންކޮށްފައި އޮތްނަމަވެސް، ރަޖިސްޓަރީކޮށްފައިވާ ފަރާތުން ފޯރުވައިދޭ ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތުގެ އަގު، އެ ފަރާތުން ފޯރުވައިދޭ މުދަލާއި ޚިދުމަތުގެ ޖުމުލަ އަގުގެ %5 (ފަހެއް އިންސައްތަ) އަށްވުރެ ދަށްނަމަ، އަދި އެ ފަރާތުން ފޯރުވައިދޭ ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތުގެ އަގަކީ މަހެއްގެ މައްޗަށް -/10,000 (ދިހަ ހާސް) ރުފިޔާއަށްވުރެ ދަށް އަދަދެއްނަމަ، އެ ފަރާތުގެ ޖުމުލަ އިންޕުޓް ޓެކުހަށް އުނިއިތުރު ގެނައުމަކާ ނުލައި އެ އަދަދު އެކުގައި އުނިކުރެވިދާނެއެވެ.

50. މަސްހުނިކުރެވިފައިވާ މުދާ ނުވަތަ ޚިދުމަތާ ގުޅޭ އައުޓްޕުޓް ޓެކްސް

(ހ) މި މާއްދާގެ ބޭނުމަށް، މަސްހުނިކުރެވިފައިވާ މުދާ ނުވަތަ ޚިދުމަތް ކަމަށް ބުނެފައި އެވަނީ، ވަކިވަކިން ފޯރުވައިދޭ މުދަލާއި ޚިދުމަތް އެއްކޮށްލައިގެން، އެ މުދާތަކުގެ ނުވަތަ ޚިދުމަތްތަކުގެ އަސްލަށާއި ޒާތަށް ބަދަލެއް ގެނައުމަކާނުލައި، އައު މުދަލެއް ނުވަތަ ޚިދުމަތެއްގެ ގޮތުގައި މާކެޓްކޮށްގެން ފޯރުވައިދޭ މުދަލާއި ޚިދުމަތަށެވެ.

(ށ) މަސްހުނިކުރެވިފައިވާ މުދާ ނުވަތަ ޚިދުމަތް އެކުލެވިގެންވަނީ މުޅިންވެސް އެއް ރޭޓެއްގައި ޖީ.އެސް.ޓީ ނެގޭ މުދަލާއި ޚިދުމަތުގެ މައްޗަށް ކަމުގައިވާނަމަ، އެ މުދާ ނުވަތަ ޚިދުމަތާ ގުޅޭ އައުޓްޕުޓް ޓެކްސް ހިސާބުކުރާނީ އެ މުދަލުގެ ނުވަތަ ޚިދުމަތުގެ ޖުމުލަ އަގުންނެވެ.

(ނ) މަސްހުނިކުރެވިފައިވާ މުދާ ނުވަތަ ޚިދުމަތް އެކުލެވިގެންވަނީ އެކި ރޭޓުގައި ޖީ.އެސް.ޓީ ނެގޭ މުދަލާއި ޚިދުމަތުގެ މައްޗަށް ކަމުގައިވާނަމަ، އެ މުދާ ނުވަތަ ޚިދުމަތާ ގުޅޭ އައުޓްޕުޓް ޓެކްސް ހިސާބުކުރާނީ އަންނަނިވި ގޮތުގެމަތިންނެވެ.

(1) މަސްހުނިކުރެވިފައިވާ މުދާ ނުވަތަ ޚިދުމަތުގެ އަގުގެ %98 (ނުވަދިހަ އަށެއް އިންސައްތަ) ނުވަތަ އެއަށްވުރެ ބޮޑު ބަޔަކީ ސުން-ރޭޓުގައި ޖީ.އެސް.ޓީ ދައްކަންޖެހޭ މުދާ ނުވަތަ ޚިދުމަތް ކަމުގައިވާނަމަ، އެ މުޢާމަލާތަކަށް ޖީ.އެސް.ޓީ ނެގޭނީ ސުން-ރޭޓުގައެވެ.

(2) މަސްހުނިކުރެވިފައިވާ މުދާ ނުވަތަ ޚިދުމަތުގެ އަގުގެ %2 (ދޭއް އިންސައްތަ) އަށްވުރެ ބޮޑު ބަޔަކީ ސުން-ރޭޓު ފިޔަވައި އެހެން ރޭޓެއްގައި ޖީ.އެސް.ޓީ ދައްކަންޖެހޭ މުދާ ނުވަތަ ޚިދުމަތް ކަމުގައިވާނަމަ، އެ މުދާތައް ނުވަތަ ޚިދުމަތްތައް ވަކިވަކިން ވިއްކިނަމަ ވިއްކާނެ އަގުގެ ނިސްބަތުން އެ މުޢާމަލާތަކަށް ޖީ.އެސް.ޓީ ނަގަންވާނެއެވެ.

(ރ) މަސްހުނިކުރެވިފައިވާ މުދާ ނުވަތަ ޚިދުމަތް އެކުލަވާލެވިފައިވާ ގޮތުން އެ މުދަލުގެ ނުވަތަ ޚިދުމަތުގެ އެއް ބަޔަކީ ޖީ.އެސް.ޓީ ނެގުމުން އިސްތިސްނާވާ މުދަލެއް ނުވަތަ ޚިދުމަތެއް ކަމުގައިވާނަމަ، އައުޓްޕުޓް ޓެކްސް ހިސާބުކުރާނީ އަންނަނިވި ގޮތުގެމަތިންނެވެ.

(1) މަސްހުނިކުރެވިފައިވާ މުދާ ނުވަތަ ޚިދުމަތުގެ އަގުގެ %98 (ނުވަދިހަ އަށެއް އިންސައްތަ) ނުވަތަ އެއަށްވުރެ ބޮޑު ބަޔަކީ ޖީ.އެސް.ޓީ ނެގުމުން އިސްތިސްނާވާ މުދާ ނުވަތަ ޚިދުމަތް ކަމުގައިވާނަމަ، އެ މުޢާމަލާތަކީ ޖީ.އެސް.ޓީ ނެގުމުން އިސްތިސްނާވާ މުޢާމަލާތެކެވެ.

(2) މަސްހުނިކުރެވިފައިވާ މުދާ ނުވަތަ ޚިދުމަތުގެ އަގުގެ %2 (ދޭއް އިންސައްތަ) އަށްވުރެ ބޮޑު ބަޔަކީ ޖީ.އެސް.ޓީ ނެގޭ މުދާ ނުވަތަ ޚިދުމަތް ކަމުގައިވާނަމަ، އެ މުދާތައް ނުވަތަ ޚިދުމަތްތައް ވަކިވަކިން ވިއްކިނަމަ ވިއްކާނެ އަގުގެ ނިސްބަތުން އެ މުޢާމަލާތަކަށް ޖީ.އެސް.ޓީ ނަގަންވާނެއެވެ.

(ބ) މި މާއްދާގެ (ނ) އާއި (ރ) ގެ ބޭނުމަށް، މަސްހުނިކުރެވިފައިވާ މުދަލެއްގެ ނުވަތަ ޚިދުމަތެއްގެ ތެރޭގައި ހިމެނޭ ވަކިވަކި މުދާ ނުވަތަ ޚިދުމަތުގެ އަގުގެ ނިސްބަތް، އެ އަކުރުތަކުގައިވާ ނިސްބަތަށްވުރެ އިތުރުވާކަން ނުވަތަ ނޫންކަން ބަލާނީ އެ މުދާތައް ނުވަތަ ޚިދުމަތްތައް ވަކިވަކިން ވިއްކިނަމަ ވިއްކާނެ އަގަށް ރިޢާޔަތްކޮށެވެ.

51. ބަންދުކޮށްފައި ހުންނަ މުދާ

(ހ) ސުން-ރޭޓުގައި ޖީ.އެސް.ޓީ ނެގޭ މުދަލެއް ނުވަތަ ޖީ.އެސް.ޓީ ނެގުމުން އިސްތިސްނާވާ މުދަލެއް ވިއްކަނީ އެ މުދާ ވިއްކުމަށް ކޮންމެހެން ބޭނުންވާ ފެންވަރަކަށް ބަންދުކުރުމަށްފަހުގައި ކަމަށްވާނަމަ، ޖީ.އެސް.ޓީ ނެގުމުގައި އެ މުދަލަކާމެދު ޢަމަލުކުރެވޭ އުސޫލު، އެ ބަންދުކުރުމަށްވެސް ރައްދުވާނެއެވެ.

(ށ) މި މާއްދާގެ (ހ) އާއި ޚިލާފުނުވާ ގޮތުގެމަތިން، ސުން-ރޭޓުގައި ޖީ.އެސް.ޓީ ނެގޭ މުދަލެއް ނުވަތަ ޖީ.އެސް.ޓީ ނެގުމުން އިސްތިސްނާވާ މުދަލެއް ވިއްކަނީ ސުން-ރޭޓު ފިޔަވައި އެހެން ރޭޓެއްގައި ޖީ.އެސް.ޓީ ނެގޭ އަދި ވަކިން ވިއްކާލެވޭފަދަ އެއްޗަކުން ނުވަތަ އެފަދަ އެއްޗެއްގައި ބަންދުކުރުމަށްފަހުގައި ކަމަށްވާނަމަ، އެ އެއްޗެއް ވަކިން ވިއްކާލާނަމަ ނަގާނެ އަގުގެ ނިސްބަތުން އެ އެއްޗަކަށް ޖީ.އެސް.ޓީ ނަގަންވާނެއެވެ.

(ނ) މި މާއްދާގެ ބޭނުމަށް، މުދާ ވިއްކުމަށް ކޮންމެހެން ބޭނުންވާ ފެންވަރަކަށް ބަންދުކުރުން ކަމަށް ބުނެފައި އެވަނީ، ބާޒާރުގައި އެ މުދަލެއް ޢާންމުކޮށް ވިއްކުމަށް ބަންދުކޮށްފައިވާނަމަ އެކަންވެސް ހިމެނޭ ގޮތުން، އިތުރު އަގަކާ ނުލައި މުދަލެއް ބަންދުކުރުމަށެވެ.

52. ސަރވިސް ޗާޖް

(ހ) ފޯރުވައިދޭ މުދަލަކަށް ނުވަތަ ޚިދުމަތަކަށް ނަގާ ސަރވިސް ޗާޖުން ޖީ.އެސް.ޓީ ނަގަންވާނީ އެ މުދަލަށް ނުވަތަ ޚިދުމަތަށް ޖީ.އެސް.ޓީ ނެގޭ ރޭޓުންނެވެ.

(ށ) މި މާއްދާގެ (ހ) ގައި ބަޔާންކޮށްފައިވާ ސަރވިސް ޗާޖުގެ ތެރޭގައި، މުދާ ނުވަތަ ޚިދުމަތް ލިބިގަންނަ ފަރާތުން، އެ ފަރާތުގެ އަމިއްލަ އިޚުތިޔާރުގައި މުދާ ނުވަތަ ޚިދުމަތް ފޯރުވައިދޭ ފަރާތަށް ދޭ ހަދިޔާ ("ޓިޕްސް") އެއް ނުހިމެނެއެވެ.

53. ޑިސްކައުންޓް

(ހ) މުދާ ނުވަތަ ޚިދުމަތް ލިބިގަންނަ ފަރާތަށް އެއްވެސް ޝަރުތަކާނުލައި ޑިސްކައުންޓެއް ދީފިނަމަ، ޖީ.އެސް.ޓީ ނަގާނީ ޑިސްކައުންޓް ކެނޑުމުން ލިބޭ ޢަދަދުންނެވެ.

(ށ) ވަކި ޝަރުތަކާ ނުވަތަ ޝަރުތުތަކަކާ ލައިގެން ޑިސްކައުންޓެއް ދީފިނަމަ، ޖީ.އެސް.ޓީ ނަގާނީ މުދާ ނުވަތަ ޚިދުމަތް ލިބިގަންނަ ފަރާތުން ދައްކާ އަދަދުންނެވެ.

(ނ) އެއް ޓެކްސް އިންވޮއިސްގައި ނުވަތަ ރަސީދުގައި، ސުން-ރޭޓުގައި ޓެކްސް ނެގޭ މުދާ ނުވަތަ ޚިދުމަތާއި އެނޫން ރޭޓުތަކުގައި ޓެކްސް ނެގޭ މުދާ ނުވަތަ ޚިދުމަތް ހިމެނޭނަމަ، އަދި އެ ޓެކްސް އިންވޮއިސްގެ ނުވަތަ ރަސީދުގެ ޖުމުލަ އަދަދުން ޑިސްކައުންޓް ދީފިނަމަ، އެ މުދާ ނުވަތަ ޚިދުމަތްތަކުގެ މެދުގައި ޑިސްކައުންޓުގެ އަދަދު ބަހާލަންވާނީ އެ މުޢާމަލާތުގައި ހިމެނޭ މުދާ ނުވަތަ ޚިދުމަތްތަކުގެ އަގުގެ ނިސްބަތުންނެވެ.

54. ހިލޭ ފޯރުވައިދޭ މުދަލާއި ޚިދުމަތް 

(ހ) މި ގަވާއިދުގެ 25 ވަނަ މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، މުދަލާއި ޚިދުމަތް ލިބިގަންނަ ފަރާތަށް ހިލޭ ފޯރުވައިދޭ މުދަލާއި ޚިދުމަތުގެ ތެރެއިން، އަންނަނިވި މުދަލާއި ޚިދުމަތުން ޖީ.އެސް.ޓީ ދައްކާކަށް ނުޖެހޭނެއެވެ.

(1) މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރި ޕްރޮމޯޓްކުރުމަށް ފޯރުވައިދޭ މުދަލާއި ޚިދުމަތް؛

(2) މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރީގެ ބޭނުންތަކަށް ފޯރުވައިދޭ މުދަލާއި ޚިދުމަތް؛

(3) އެ އިދާރާއެއްގެ ހުރިހައި ޚަރަދެއް ނުވަތަ މައިގަނޑު ޚަރަދުތައް ދައުލަތުގެ ބަޖެޓުން ކުރާ އިދާރާއަކަށް ޗެރިޓީގެ ގޮތުގައި ހަދިޔާކުރާ މުދަލާއި ޚިދުމަތް.

(ށ) ހިލޭ ފޯރުވައިދޭ މުދަލާއި ޚިދުމަތުގެ ތެރެއިން، މި މާއްދާގެ (ހ) ރައްދުނުވާ މުދަލާއި ޚިދުމަތުގެ ބާޒާރުގެ އަގުގެ ތެރޭގައި ޤާނޫނުގައި ބަޔާންކޮށްފައިވާ މިންވަރުން ޖީ.އެސް.ޓީ ހިމެނޭ ކަމަށް ބަލައި، އެ މުއާމަލާތްތަކުން ޖީ.އެސް.ޓީ ދައްކަންވާނެއެވެ.

(ނ) މި މާއްދާގެ (ހ) ގެ (1) ރައްދުވާނީ، އެ މުދާ ނުވަތަ ޚިދުމަތް ލިބިގަންނަ ފަރާތަކީ އެ މުދާ ނުވަތަ ޚިދުމަތް ފޯރުވައިދޭ ވަގުތު:

(1) އެ މުދާ ނުވަތަ ޚިދުމަތް ފޯރުވައިދޭ ފަރާތުގެ ވިޔަފާރި ނުވަތަ އެ ފަރާތާ އެއްފަދަ އެހެން ފަރާތްތަކެއްގެ ވިޔަފާރި ޕްރޮމޯޓްކުރުމުގެ ވިޔަފާރިކުރާ ފަރާތެއްނަމަ؛ ނުވަތަ

(2) މި މާއްދާގެ (ނ) ގެ (1) ގައި ބަޔާންކޮށްފައިވާ ފަރާތެއްގެ މުވައްޒަފެއްނަމަ، އަދި އެ މުވައްޒަފު އެ މުދާ ނުވަތަ ޚިދުމަތް ލިބިގަންނަނީ އޭނާއަށް އެ ވަޒީފާ ދިން ފަރާތުން ކުރާ، މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރި ނުވަތަ އެ ފަރާތާ އެއްފަދަ އެހެން ފަރާތްތަކެއްގެ ވިޔަފާރި ޕްރޮމޯޓްކުރުމުގެ ވިޔަފާރީގެ ބޭނުމަށްނަމަ؛ ނުވަތަ

(3) މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރި ޕްރޮމޯޓްކުރުން ހިމެނޭ ޕަބްލިކޭޝަންތައް އާންމުކުރުމުގެ ވިޔަފާރިކުރާ، ނުވަތަ އެ ފަރާތެއްގެ ވިޔަފާރީގެ ބައެއް ކަމުގައި އެ ފަދަ  ޕަބްލިކޭޝަންތައް އާންމުކުރުން ހިމެނޭ، ޕަބްލިޝްކުރާ ފަރާތެއްނަމަ؛ ނުވަތަ

(4) މި މާއްދާގެ (ނ) ގެ (3) ގައި ބަޔާންކޮށްފައިވާ ފަދަ ޕަބްލިޝްކުރާ ފަރާތެއްގެ މުވައްޒަފެއްނަމަ ނުވަތަ އެ ފަރާތުން ކޮންޓްރެކްޓްކޮށްފައިވާ ފަރާތެއްނަމަ، އަދި އެ މުވައްޒަފު ނުވަތަ އެ ކޮންޓްރެކްޓަރު އެ މުދާ ނުވަތަ ޚިދުމަތް ލިބިގަންނަނީ ޕަބްލިޝްކުރާ ފަރާތުން އެ ޕަބްލިކޭޝަންތައް އާންމުކުރުމުގެ ބޭނުމަށްނަމައެވެ.

(ރ) މުދަލާއި ޚިދުމަތް ލިބިގަންނަ ފަރާތަކީ:

(1) މުދަލާއި ޚިދުމަތް ފޯރުވައިދޭ ފަރާތުގެ މުވައްޒަފެއްނަމަ؛ ނުވަތަ

(2) މުދަލާއި ޚިދުމަތް ފޯރުވައިދޭ ފަރާތުގެ މުވައްޒަފަކާ ގުޅުން ހުރި ފަރާތެއްނަމަ؛ ނުވަތަ

(3) މުދަލާއި ޚިދުމަތް ފޯރުވައިދޭ ފަރާތުގެ ޑިރެކްޓަރެއްނަމަ؛ ނުވަތަ

(4) މުދަލާއި ޚިދުމަތް ފޯރުވައިދޭ ފަރާތުގެ ޑިރެކްޓަރަކާ ގުޅުން ހުރި ފަރާތެއްނަމަ؛ ނުވަތަ

(5) މުދަލާއި ޚިދުމަތް ފޯރުވައިދޭ ފަރާތާ ގުޅުން ހުރި ފަރާތެއްނަމަ،

މި މާއްދާގެ (ހ) ރައްދުވާނީ:

(ހ) މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރީގައި، މި މާއްދާގެ (ރ) ގެ (1) އިން (5) އަށް ބަޔާންކޮށްފައިވާ ފަރާތަކުން ހަރަކާތްތެރިވާ ވަގުތު ފޯރުވައިދޭ މުދަލާއި ޚިދުމަތަށް؛ ނުވަތަ

(ށ) މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރީގައި، މި މާއްދާގެ (ރ) ގެ (1) އިން (5) އަށް ބަޔާންކޮށްފައިވާ ފަރާތަކުން އެކަށީގެންވާ މިންވަރެއްގެ ވަގުތު ސީދާގޮތުން ހަރަކާތްތެރިވެފައިވާ ދުވަހަކު ފޯރުވައިދޭ މުދަލާއި ޚިދުމަތަށެވެ.

(ބ) މި މާއްދާގެ (ރ) ގެ (ށ) ގެ ބޭނުމަށް:

(1) މި މާއްދާގެ (ހ) ރައްދުވާ މުއާމަލާތްތައް ކޮށްފައިވާ ކޮންމެ ދުވަހަކު މުދަލާއި ޚިދުމަތް ލިބިގަތް ފަރާތުން ހިންގައިފައިވާ ހަރަކާތްތަކާއި އެ ހަރަކާތްތައް ހިންގައިފައިވާ ވަގުތުގެ ސައްޙަ އަދި ތެދު ރިކޯޑު، މުދަލާއި ޚިދުމަތް ފޯރުވައިދޭ ފަރާތުން ލިޔުމުން ބަލަހައްޓަންވާނެއެވެ.

(2) އެއްވެސް ފަރާތަކުން "އެކަށީގެންވާ މިންވަރެއްގެ ވަގުތު" ކަނޑައަޅައިފައިވަނީ ރަނގަޅަށް ނޫންކަމަށް ކޮމިޝަނަރ ޖެނެރަލަށް ފެނިއްޖެނަމަ އެ ވަގުތު ކަނޑައަޅާނީ ކޮމިޝަނަރ ޖެނެރަލެވެ.

(ޅ) މި މާއްދާގެ (ރ) ރައްދުވާ ހާލަތުތަކުގައި މި މާއްދާގެ (ހ) ރައްދުވާނީ 168 (ސަތޭކަ ފަސްދޮޅަސް އަށެއް) ގަޑިއިރާ ހަމައަށެވެ.

(ކ) މުދަލާއި ޚިދުމަތުގެ ތެރެއިން ބައެއް ފޯރުވައިދީފައިވަނީ އެ މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރި ޕްރޮމޯޓްކުރުމަށް ނުވަތަ މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރީގެ ބޭނުމަށް ކަމަށްވެފައި، އަނެއް ބައި ފޯރުވައިދީފައިވަނީ އެހެން ހަރަކާތްތަކަށް ނުވަތަ އެހެން ބޭނުންތަކަށް ކަމަށްވާނަމަ، އެ މުދަލާއި ޚިދުމަތުގެ ތެރެއިން މި މާއްދާގެ (ހ) ރައްދުވާ މުދަލާއި ޚިދުމަތް ކަނޑައަޅަންވާނީ އެކަށީގެންވާ ނިސްބަތަކުންނެވެ.

(އ) މި މާއްދާގެ (ކ) ގެ ބޭނުމަށް، އެއްވެސް ފަރާތަކުން ކަނޑައަޅައިފައިވާ ނިސްބަތަކީ އެކަށީގެންވާ ނިސްބަތެއް ނޫންކަމަށް ކޮމިޝަނަރ ޖެނެރަލަށް ފެނިއްޖެނަމަ އެ ނިސްބަތް ކަނޑައަޅާނީ ކޮމިޝަނަރ ޖެނެރަލެވެ.

(ވ) ވަޒީފާގެ އެއްބަސްވުމެއްގައި ނުވަތަ ޑިރެކްޓަރުކަމުގެ އެއްބަސްވުމެއްގައި ނުވަތަ މުދަލާއި ޚިދުމަތް ފޯރުވައިދޭ ފަރާތާ ގުޅުންހުރި ފަރާތަކާއެކު ހަދައިފައިވާ ކޮންޓްރެކްޓެއްގައި، އެ ފަރާތަކަށް ކަނޑައަޅައިފައިވާ އުޖޫރައިގެ ތެރޭގައި ހިލޭ ފޯރުވައިދޭ މުދަލާއި ޚިދުމަތް ހިމެނޭ ކަމަށް ނުވަތަ ހިމެނިދާނެ ކަމަށް ބަޔާންކޮށްފައި އޮތް ނަމަވެސް، މި މާއްދާގެ (ރ)، (ބ)، (ޅ)، (ކ) އަދި (އ) އަށް ޢަމަލުކުރަންވާނެއެވެ.

(މ) ޓޫރިސްޓް ރިޒޯޓެއްގައި ނުވަތަ އިންޓަގްރޭޓެޑް ޓޫރިސްޓް ރިޒޯޓެއްގައި ވަޒީފާގައި އުޅޭ، އެ ރިޒޯޓުގައި އޭނާގެ ވަޒީފާ މެދުކެނޑުމެއްނެތި އަދާކުރަމުންދާ މީހަކަށް އެ ރިޒޯޓުގައި ފޯރުވައިދޭ މުދަލާއި ޚިދުމަތްތަކަށް މި މާއްދާގެ (ރ) އާއި، (ބ) އާއި، (ޅ) އާއި، (ކ) އާއި، (އ) އާއި، (ވ) ރައްދެއް ނުވާނެއެވެ.

(ފ) މުދަލާއި ޚިދުމަތް ފޯރުވައިދެނީ މި މާއްދާގެ (ހ) ރައްދުވާ ފަރާތަކަށާއި އެ ފަރާތާ ގުޅުން ހުރި ފަރާތަކަށް ނުވަތަ ފަރާތްތަކަކަށް އެއްކޮށް ކަމަށްވާނަމަ، މި މާއްދާގެ (ހ) ރައްދުވާނީ އެ މުދަލުގެ ނުވަތަ ޚިދުމަތުގެ ބާޒާރުގެ އަގާ އަންނަނިވި ކަސްރާ ގުނަކުރުމުން އަންނަ އަދަދަށެވެ.

މި މާއްދާގެ (ހ) ރައްދުވާ ފަރާތްތަކުގެ އަދަދު / މުދާ ނުވަތަ ޚިދުމަތް ލިބިގަތް ފަރާތުގެ ޖުމުލަ އަދަދު

(ދ) މި މާއްދާގެ ބޭނުމަށް:

(1) "މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރި ޕްރޮމޯޓްކުރުން" ކަމަށް ބެލެވޭނީ، މުދަލާއި ޚިދުމަތް ލިބިގަންނަ ފަރާތުން ނުވަތަ އޭނާއަށް ވަޒީފާ ދިން ފަރާތުން ނުވަތަ ޕަބްލިޝްކުރާ ފަރާތުން، މުދަލާއި ޚިދުމަތް ފޯރުވައިދޭ ފަރާތުގެ މުދަލާއި ޚިދުމަތް މާކެޓްކުރާނަމަ ނުވަތަ އިސްތިހާރުކުރާނަމަ ނުވަތަ ޕަބްލިސައިޒްކުރާނަމަ ނުވަތަ ވިއްކާނަމައެވެ.

(2) "މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރީގެ ބޭނުން" ކަމަށް ބެލެވޭނީ، މުދަލާއި ޚިދުމަތް ލިބިގަންނަ ފަރާތުން އެ ފަރާތުގެ ހުރިހައި ހަރަކާތްތަކެއް ހިންގަނީ މުދަލާއި ޚިދުމަތް ފޯރުވައިދޭ ފަރާތުގެ ވިޔަފާރި ހިންގުމާ ނުވަތަ މެނޭޖްކުރުމާ ނުވަތަ އޮޕަރޭޓްކުރުމާ ނުވަތަ މާލީ ކަންކަމާ ނުވަތަ އިދާރީ ކަންކަމާ ގުޅިގެން ކަމަށްވާނަމައެވެ.

(3) އަންނަނިވި ހާލަތުތަކުގައި، ތަނެއް ކުއްޔަށް ދޭ ފަރާތަކީ ނުވަތަ އެ ފަރާތާ ގުޅުން ހުރި ފަރާތަކީ، މުދަލާއި ޚިދުމަތް ފޯރުވައިދޭ ފަރާތާ ގުޅުން ހުރި ފަރާތެއް ކަމަށް ބެލެވޭނެއެވެ.

(ހ) ކުއްޔަށް ދިން ފަރާތް ނުވަތަ އެ ފަރާތާ ގުޅުން ހުރި ފަރާތް، މުދަލާއި ޚިދުމަތް ލިބިގަންނަނީ ކުއްޔަށް ދީފައިވާ ތަނުގައި ކަމަށްވުން؛ ނުވަތަ

(ށ) ތަން ކުއްޔަށް ދޭ ފަރާތަށް ނުވަތަ އެ ފަރާތާ ގުޅުން ހުރި ފަރާތަކަށް ފޯރުވައިދޭ މުދަލާއި ޚިދުމަތަކީ ސީދާ ގޮތެއްގައި ނަމަވެސް ނުވަތަ ނުސީދާ ގޮތެއްގައި ނަމަވެސް، ކުއްޔަށް ދޫކޮށްފައިވާ ތަނާ ގުޅިގެން ފޯރުވައިދޭ މުދަލާއި ޚިދުމަތަށްވުން؛ ނުވަތަ

(ނ) ތަން ކުއްޔަށް ދޭ ފަރާތަށް ނުވަތަ އެ ފަރާތާ ގުޅުން ހުރި ފަރާތަކަށް ފޯރުވައިދޭ މުދަލާއި ޚިދުމަތް ފޯރުވައިދެނީ ސީދާ ގޮތެއްގައި ނަމަވެސް ނުވަތަ ނުސީދާ ގޮތެއްގައި ނަމަވެސް، އެ ތަން ކުއްޔަށް ދިނުމާ ގުޅިގެންކަމަށްވުން.

55. މުދާ ރައްދުކޮށްދިނުމަށް ނަގާ އަގު

މުދަލެއް ގަތް ފަރާތަށް އެ މުދާ ރައްދުކޮށްދިނުމަށް އެ މުދަލުގެ އަގުގެ މައްޗަށް އިތުރު އަގެއް ނަގާނަމަ، ޤާނޫނުގައިވާ މިންވަރުން އެ ޚިދުމަތަށް ޖީ.އެސް.ޓީ ނަގަންވާނެއެވެ.

56. މުދަލުގެ ނުވަތަ ޚިދުމަތުގެ މުޤާބިލު އަނބުރައި ރައްދުކުރުން

ރަޖިސްޓަރީކޮށްފައިވާ ފަރާތުން ފޯރުވައިދީފައިވާ މުދަލަކާ ނުވަތަ ޚިދުމަތަކާ ގުޅޭގޮތުން މީރާއަށް ޖީ.އެސް.ޓީ ދައްކާފައިވަނިކޮށް، އެ މުދާ ނުވަތަ ޚިދުމަތް ލިބިގަތް ފަރާތަށް އެއްވެސް ސަބަބަކާހުރެ އެ މުދަލުގެ ނުވަތަ ޚިދުމަތުގެ މުޤާބިލު އަނބުރައި ރައްދުކޮށްދީފިނަމަ، އެ މުޢާމަލާތާ ގުޅިގެން ޖީ.އެސް.ޓީގެ ގޮތުގައި ދައްކާފައިވާ އަދަދު، އެ އަދަދު އަނބުރައި ރައްދުކޮށްދިން ޓެކްސް ނެގޭ މުއްދަތުގެ އައުޓްޕުޓް ޓެކުހުން އުނިކުރެވިދާނެއެވެ.

57. ގެއްލޭ ނުވަތަ ހަލާކުވާ މުދާ

ޖީ.އެސް.ޓީ ނެގޭ މުދަލެއް ގެއްލިއްޖެނަމަ ނުވަތަ ހަލާކުވެއްޖެނަމަ، އެ މުދަލަކުން ޖީ.އެސް.ޓީ ދެއްކުމުގައި ޢަމަލުކުރާނީ އަންނަނިވި ގޮތުގެމަތިންނެވެ.

(ހ) މުދާ ގެއްލުނީ ނުވަތަ ހަލާކުވީ މުދާ ވިއްކާލުމުގެ ކުރިން ކަމުގައިވާނަމަ، އެ މުދަލަށް ޖީ.އެސް.ޓީ ދައްކާކަށް ނުޖެހޭނެއެވެ.

(ށ) މުދާ ގެއްލުނީ ނުވަތަ ހަލާކުވީ މުދާ ވިއްކާލުމަށްފަހު އެ މުދާ ގަތް ފަރާތަށް ރައްދުކޮށްދިނުމުގެ ކުރިން ކަމުގައިވާނަމަ އެ މުދަލަށް ޖީ.އެސް.ޓީ ދައްކަންވާނެއެވެ.

57-1. ދިވެހިރާއްޖޭގެ އެތެރޭގައި ވައިގެ ދަތުރުފަތުރުގެ ޚިދުމަތް ދޭ ފަރާތްތަކުން ވިއްކާ މުދަލާއި ދޭ ޚިދުމަތް

(ހ) ޤާނޫނުގެ 15 ވަނަ މާއްދާގެ (ހ) ގެ (5) ވަނަ ނަންބަރުގެ ބޭނުމަށް، "ދިވެހިރާއްޖޭގެ އެތެރޭގައި ވައިގެ ދަތުރުފަތުރުގެ ޚިދުމަތް ދޭ ފަރާތްތަކުން ދިވެހިރައްޔިތުން ފިޔަވައި އެހެން ފަރާތްތަކަށް ވިއްކާ މުދަލާއި ދޭ ޚިދުމަތް" ކަމަށް ބުނެފައި އެ ވަނީ، ދިވެހިރައްޔިތުން ފިޔަވައި އެހެން ފަރާތްތަކާއި އެ ފަރާތްތަކާއެކު އުފުލާ ކާގޯ، ދިވެހިރާއްޖޭގެ އެއް ތަނުން އަނެއް ތަނަށް ވައިގެ މަގުން ގެންގޮސްދިނުމަށެވެ.

(ށ) މި މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، ދިވެހިރައްޔިތުން އުފުލުމަށް ޗާޓަރުކުރާ ފްލައިޓް ފިޔަވައި އެ ނޫން ބޭނުންތަކަށް ޗާޓަރުކުރާ ފްލައިޓްތަކަކީ، ދިވެހިރައްޔިތުން ފިޔަވައި އެހެން ފަރާތްތަކަށް ފޯރުވައިދޭ ޚިދުމަތެއްގެ ގޮތުގައި ބެލެވޭނެއެވެ.

(ނ) އެތެރޭގެ ވައިގެ ދަތުރުފަތުރުގެ ޚިދުމަތް ފޯރުވައިދެވޭ ފަރާތްތަކުގެ ތެރެއިން ޤާނޫނުގެ 16 ވަނަ މާއްދާގައި ބަޔާންކޮށްފައިވާ ޖީ.އެސް.ޓީ ނެގޭ ރޭޓު ރައްދުވާ ކޮންމެ ދިވެހިރައްޔިތެއްގެ ދިވެހިރައްޔިތެއްކަން އަންގައިދޭ ކާޑު ނަންބަރު، ކޮންމެ ފްލައިޓެއްގެ ފްލައިޓް މެނިފެސްޓުގައި ބަޔާންކޮށްފައި އޮންނަންވާނެއެވެ. ފްލައިޓް މެނިފެސްޓުގައި އެ ނަންބަރު ބަޔާންކޮށްފައި ނެތް ނަމަ، އަދި އެ ފަސިންޖަރަކީ ދިވެހިރައްޔިތެއްކަން އެހެން ގޮތަކުން ވެސް ސާބިތުކޮށް  ނުދެވިއްޖެ ނަމަ، އެ ފަރާތަކަށް ފޯރުވައިދިން ޚިދުމަތުން ޤާނޫނުގެ 15 ވަނަ މާއްދާގެ (ށ) ގައި ބަޔާންކޮށްފައިވާ ރޭޓުގައި، ވައިގެ ދަތުރުފަތުރުގެ ޚިދުމަތް ދޭ ފަރާތުން މީރާއަށް ޖީ.އެސް.ޓީ ދައްކަންޖެހޭނެއެވެ.

58. އަނބުރައި ނުލިބޭނެ ދަރަންޏަށް ނިސްބަތްވާ ޖީ.އެސް.ޓީ އުނިކުރެވޭނެ ހާލަތުތައް

ޤާނޫނުގެ 36 ވަނަ މާއްދާގެ (ނ) ގެ (1) ގެ ބޭނުމަށް، ރަޖިސްޓަރީކޮށްފައިވާ ފަރާތަކަށް އަނބުރައި ނުލިބޭނެ ދަރަންޏަށް ނިސްބަތްވާ ޖީ.އެސް.ޓީގެ ގޮތުގައި އެއްވެސް އަދަދެއް އުނިކުރެވޭނީ އަންނަނިވި ހާލަތުތަކުގައެވެ.

(ހ) ކޯޓު ޙުކުމަކުން އެ ދަރަންޏެއް އެއްކޮށް ނުވަތަ އެއިން ބައެއް އަނބުރައި ނުލިބޭނެކަމަށް ނިންމުން؛ ނުވަތަ

(ށ) ދަރަނި އަދާކުރަންޖެހޭ ފަރާތް ލިކުއިޑޭޓްކުރުން ނުވަތަ އިފްލާސްކުރުން؛ ނުވަތަ

(ނ) އިންޓަރނޭޝަނަލް ފައިނޭންޝަލް ރިޕޯޓިންގ ސްޓޭންޑަރޑްސް ނުވަތަ މީރާއަށް ޤަބޫލުކުރެވޭ އެހެން އެކައުންޓިންގ ސްޓޭންޑަރޑަކާ އެއްގޮތަށް ހިސާބުތަކުން އެ ދަރަނި އުނިކުރެވުން.

59. (އުނިކޮށްފައި)

60. އަނބުރައި ނުލިބޭނެ ދަރަނީގެ ގޮތުގައި އުނިކޮށްފައިވާ ދަރަނި އަނބުރައި ލިބުން

(ހ) ރަޖިސްޓަރީކޮށްފައިވާ ފަރާތަކުން މި ގަވާއިދުގެ 58 ވަނަ މާއްދާއާ އެއްގޮތްވާ ގޮތުގެ މަތިން އަނބުރާ ނުލިބޭނެ ދަރަންޏަށް ނިސްބަތްވާ ޖީ.އެސް.ޓީގެ ގޮތުގައި އެއްވެސް އަދަދެއް އުނިކޮށްފައިވާނަމަ، އެ ފަރާތަކުން އެ މުޢާމަލާތާ ގުޅިގެން ދައްކައިފައިވާ ޓެކުހުގެ އަދަދުގެ ތެރެއިން، އަނބުރާ ނުލިބޭނެ ދަރަންޏަށް ނިސްބަތްވާ ޖީ.އެސް.ޓީގެ ގޮތުގައި އުނިކުރި އަދަދާއި، އެ މުޢާމަލާތުގެ ޖުމުލަ މުޤާބިލުގެ އަދަދު އަޅައިކިޔާއިރު، މި ދެ އަދަދުގެ މެދުގައިވާ ނިސްބަތުން ޖެހޭ އަދަދު، ޤާނޫނުގެ 36 ވަނަ މާއްދާގެ (ނ) ގެ (1) ގެ ދަށުން އިންޕުޓް ޓެކުހުގެ ގޮތުގައި އުނިކުރެވިދާނެއެވެ.

(ށ) މި މާއްދާގެ (ހ) އާއި އެއްގޮތްވާ ގޮތުގެމަތިން އިންޕުޓް ޓެކުހުގެ ގޮތުގައި އުނިކުރެވިފައިވާ އަދަދަކާ ގުޅޭ ދަރަންޏެއް ނުވަތަ އެއިން ބައެއް ރަޖިސްޓަރީކޮށްފައިވާ ފަރާތަށް އަނބުރައި ލިބިއްޖެނަމަ، އެގޮތުން އުނިކުރެވުނު އަދަދުގެ ތެރެއިން، އަނބުރައި ނުލިބޭނެ ދަރަންޏަށް ނިސްބަތްވާ ޖީ.އެސް.ޓީގެ ގޮތުގައި އުނިކުރި އަދަދާއި އަނބުރައި ލިބުނު އަދަދު އަޅާކިޔާއިރު މި ދެ އަދަދުގެ މެދުގައިވާ ނިސްބަތުން ޖެހޭ އަދަދު، އެ ދަރަނި އަނބުރައި ލިބުނު ޓެކްސް ނެގޭ މުއްދަތުގައި ކުރެވުނު މުޢާމަލާތެއްގެ ގޮތުގައި ބަލައި، އެ މުއްދަތުގެ އައުޓްޕުޓް ޓެކުހުގެ ގޮތުގައި ދައްކަންވާނެއެވެ.

(ނ) އަނބުރައި ނުލިބޭނެ ދަރަންޏަކަށް ނިސްބަތްވާ ޖީ.އެސް.ޓީގެ ގޮތުގައި އެއްވެސް އަދަދެއް އުނިކުރާ ޓެކްސް ނެގޭ މުއްދަތަށްވުރެ ކުރީގެ ޓެކްސް ނެގޭ މުއްދަތެއްގައި އެ ދަރަނި ނިސްބަތްވާ މުޢާމަލާތުގެ އަގުން ފުރިހަމައަށް އައުޓްޕުޓް ޓެކްސް ދައްކާފައި ނުވާނަމަ، ޤާނޫނުގެ 36 ވަނަ މާއްދާގެ (ނ) ގެ (1) އެފަރާތަކަށް ރައްދެއް ނުވާނެއެވެ.

61. ފުރިހަމަ ޓެކްސް އިންވޮއިސްއެއް ދޫކުރުން

ޤާނޫނުގެ 42 ވަނަ މާއްދާގެ (ށ) ގައި، އެހެން ބަޔާންކޮށްފައި އޮތްނަމަވެސް، މުދާ ނުވަތަ ޚިދުމަތް ލިބިގަންނަ ފަރާތުން އެދިއްޖެނަމަ، އަދި އެ ފަރާތަކީ ޖީ.އެސް.ޓީ އަށް ރަޖިސްޓަރީކޮށްފައިވާ ފަރާތެއް ކަމުގައިވާނަމަ، ޤާނޫނުގެ 42 ވަނަ މާއްދާގެ (ހ) ގެ (1) އިން ފެށިގެން (9) ގެ ނިޔަލަށްހުރި ނަންބަރުތަކުގައި ބަޔާންކޮށްފައިވާ މަޢުލޫމާތު ހިމެނިފައިވާ ޓެކްސް އިންވޮއިސްއެއް، މުދާ ނުވަތަ ޚިދުމަތް ފޯރުވައިދޭ ފަރާތުން ދޫކުރަންވާނެއެވެ.

62. ކޮންމެ މުޢާމަލާތަކަށް އެއް ޓެކްސް އިންވޮއިސް ދޫކުރުން

ރަޖިސްޓަރީކޮށްފައިވާ ފަރާތަކުން އެއްފަހަރާ ފޯރުވައިދޭ މުދާ ނުވަތަ ޚިދުމަތްތަކަކީ ދެ ރޭޓެއްގައި ޖީ.އެސް.ޓީ ނެގޭ މުދާ ނުވަތަ ޚިދުމަތްތަކެއް ކަމުގައިވީނަމަވެސް، ނުވަތަ ޖީ.އެސް.ޓީ ނެގުމުން އިސްތިސްނާ ކުރެވިފައިވާ މުދާ ނުވަތަ ޚިދުމަތްތަކެއް ކަމުގައިވީނަމަވެސް، އެ ހުރިހާ މުދަލަކަށް ނުވަތަ ޚިދުމަތްތަކަށް އެއް ޓެކްސް އިންވޮއިސް ތައްޔާރުކުރެވިދާނެއެވެ. އަދި މިގޮތުން ތައްޔާރުކުރާ ޓެކްސް އިންވޮއިސްގައި، އެކި ރޭޓުގައި ޖީ.އެސް.ޓީ ނެގޭ މުދަލާއި ޚިދުމަތުގެ އަދި ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތުގެ ތަފުސީލާއި އަގު ވަކިވަކިން ހިމަނަންވާނެއެވެ.

63. ޕްރޮފޯމާ އިންވޮއިސް

ޤާނޫނާއި މި ގަވާއިދުގެ ބޭނުމަށް، ޕްރޮފޯމާ އިންވޮއިސް އަކީ ޓެކްސް އިންވޮއިސް އެއްގެ ގޮތުގައެއް ނުބެލެވޭނެއެވެ. އަދި ޕްރޮފޯމާ އިންވޮއިސްގައި ސާފުކޮށް ފެންނަން އޮންނާނެހެން "މިއީ ޓެކްސް އިންވޮއިސްއެއް ނޫން" މިހެން ލިޔެވިފައި އޮންނަންވާނެއެވެ.

64. ޓެކްސް އިންވޮއިސް ނުވަތަ ރަސީދު ނުވަތަ ކްރެޑިޓް ނޯޓް ނުވަތަ ޑެބިޓް ނޯޓް ބާޠިލުކުރުން

ޤާނޫނުގެ 50 ވަނަ މާއްދާގެ (ށ) ގެ ބޭނުމަށް، ޓެކްސް އިންވޮއިސްއެއް ނުވަތަ ރަސީދެއް ނުވަތަ ކްރެޑިޓް ނޯޓެއް ނުވަތަ ޑެބިޓް ނޯޓެއް ބާޠިލުކުރެވޭނީ އަންނަނިވި ހާލަތުތަކުގައެވެ.

(ހ) މުދަލުގެ ނުވަތަ ޚިދުމަތުގެ އަގު ފިޔަވައި، އެ ލިޔުމުގައި ހިމެނޭ އެހެން މަޢުލޫމާތެއް ބަދަލުކުރަންޖެހުން؛

(ށ) ޤާނޫނުގެ 42 ވަނަ މާއްދާގެ (ށ) ގެ ދަށުން ޓެކްސް އިންވޮއިސްއެއް ދޫކުރެވިފައި ވަނިކޮށް މުދާ ނުވަތަ ޚިދުމަތް ލިބިގަތް ފަރާތުން އެދިގެން، ޤާނޫނުގެ 42 ވަނަ މާއްދާގެ (ހ) ގައި ބަޔާންކޮށްފައިވާ އެންމެހައި މަޢުލޫމާތު ހިމަނައިގެން ޓެކްސް އިންވޮއިސްއެއް ދޫކުރަންޖެހުން؛

(ނ) މުދާ ނުވަތަ ޚިދުމަތް ފޯރުވައިދިނުމަށްފަހު އޭގެ ބަދަލުގައި އެހެން މުދަލެއް ނުވަތަ ޚިދުމަތެއް ފޯރުވައިދިނުން.

65. (އުވައިލެވިފައި)

66. ކްރެޑިޓް ނޯޓް ދޫކުރުން

އަންނަނިވި ހާލަތުތަކުގައި، ޤާނޫނުގެ 44 ވަނަ މާއްދާއާ އެއްގޮތްވާ ގޮތުގެމަތިން ތައްޔާރުކުރެވިފައިވާ ކްރެޑިޓް ނޯޓެއް، މުދާ ނުވަތަ ޚިދުމަތް ލިބިގަންނަ ފަރާތަށް، ރަޖިސްޓަރީކޮށްފައިވާ ފަރާތުން ދޫކުރަންވާނެއެވެ.

(ހ) ރަޖިސްޓަރީކޮށްފައިވާ ފަރާތުން މުދަލެއް ނުވަތަ ޚިދުމަތެއް ފޯރުވައިދިނުމަށްފަހު،

(1) އެ މުދާ ނުވަތަ ޚިދުމަތް ފޯރުވައިދިނުމާގުޅޭ މުޢާމަލާތް ކެންސަލްކުރުން؛ ނުވަތަ

(2) ސުން-ރޭޓުގައި ޖީ.އެސް.ޓީ ނެގޭ ނުވަތަ ޖީ.އެސް.ޓީ ދެއްކުމުން އިސްތިސްނާވާ މުދަލަކަށް ނުވަތަ ޚިދުމަތަކަށް ޖީ.އެސް.ޓީ ނެގިފައިވުން، ނުވަތަ ނަގަންޖެހޭ އަދަދަށްވުރެ އިތުރަށް ޖީ.އެސް.ޓީ ނެގިފައިވުން؛ ނުވަތަ

(3) އެ މުދާ ނުވަތަ ޚިދުމަތުގެ މުޤާބިލުގެ ގޮތުގައި ކުރިން އެއްބަސްވެވިފައިވާ އަދި ފާއިތުވެފައިވާ ޓެކްސް ނެގޭ މުއްދަތެއްގެ ޖީ.އެސް.ޓީ ބަޔާނުގައި ހިމެނިފައިވާ އަދަދު، އެ މުޢާމަލާތުން ދެވުނު ޑިސްކައުންޓްވެސް ހިމެނޭ ގޮތުން، ކުޑަކުރުން؛ ނުވަތަ

(4) ފޯރުވައިދެވުނު މުދާ ނުވަތަ ޚިދުމަތް ނުވަތަ އެއިން ބައެއް ރަޖިސްޓަރީކޮށްފައިވާ ފަރާތަށް އަނބުރައި ރައްދުކުރުން؛ ނުވަތަ

(5) ރަޖިސްޓަރީކޮށްފައިވާ ފަރާތަށް އެ މުޢާމަލާތުގެ މުޤާބިލުގެ ގޮތުގައި ލިބިފައިވާ އަގު، އެނޫންވެސް ސަބަބަކާހުރެ އެ މުދާ ނުވަތަ ޚިދުމަތް ފޯރުވައިދިން އަސްލު އަގަށްވުރެ ދަށްވުން.

(ށ) އެ މުޢާމަލާތާ ގުޅިގެން ރަޖިސްޓަރީކޮށްފައިވާ ފަރާތުން ޓެކްސް އިންވޮއިސްއެއް ތައްޔާރުކޮށްފައިވުން؛ އަދި

(ނ) ޓެކްސް އިންވޮއިސްއެއްގައި ޓެކުހުގެ ގޮތުގައި ބަޔާންކޮށްފައިވާ އަދަދެއް ނުވަތަ ރަޖިސްޓަރީކޮށްފައިވާ ފަރާތުން ފާއިތުވެފައިވާ ޓެކްސް ނެގޭ މުއްދަތެއްގެ ޖީ.އެސް.ޓީ ބަޔާނުގައި އައުޓްޕުޓް ޓެކުހުގެ ގޮތުގައި ހިމަނާފައިވާ އަދަދެއް، މި މާއްދާގެ (ހ) ގައި ބަޔާންކޮށްފައިވާފަދަ ހާލަތަކާ ގުޅިގެން އިޞްލާޙުކުރަންޖެހުން.

67. ޑެބިޓް ނޯޓް ދޫކުރުން

އަންނަނިވި ޙާލަތުތަކުގައި، ޤާނޫނުގެ 45 ވަނަ މާއްދާއާ އެއްގޮތްވާ ގޮތުގެމަތިން ތައްޔާރުކުރެވިފައިވާ ޑެބިޓް ނޯޓެއް، މުދާ ނުވަތަ ޚިދުމަތް ލިބިގަންނަ ފަރާތަށް، ރަޖިސްޓަރީކޮށްފައިވާ ފަރާތުން ދޫކުރަންވާނެއެވެ.

(ހ) ރަޖިސްޓަރީކޮށްފައިވާ ފަރާތުން މުދަލެއް ނުވަތަ ޚިދުމަތެއް ފޯރުވައިދިނުމަށްފަހު،

(1) ޓެކްސް ނެގޭ މުދަލަކަށް ނުވަތަ ޚިދުމަތަކަށް ސުން-ރޭޓުގައި ޖީ.އެސް.ޓީ ނެގިފައިވުން ނުވަތަ ޖީ.އެސް.ޓީ ދެއްކުމުން އިސްތިސްނާކުރެވިފައިވުން، ނުވަތަ ނަގަންޖެހޭ އަދަދަށްވުރެ މަދުން ޖީ.އެސް.ޓީ ނެގިފައިވުން؛ ނުވަތަ

(2) އެ މުދާ ނުވަތަ ޚިދުމަތުގެ މުޤާބިލުގެ ގޮތުގައި ކުރިން އެއްބަސްވެވިފައިވާ އަދި ފާއިތުވެފައިވާ ޓެކްސް ނެގޭ މުއްދަތެއްގެ ޖީ.އެސް.ޓީ ބަޔާނުގައި ހިމެނިފައިވާ އަދަދު އިތުރުކުރުން؛ ނުވަތަ 

(3) ރަޖިސްޓަރީކޮށްފައިވާ ފަރާތަށް އެ މުޢާމަލާތުގެ މުޤާބިލުގެ ގޮތުގައި ލިބިފައިވާ އަގު، އެނޫންވެސް ސަބަބަކާހުރެ އެ މުދާ ނުވަތަ ޚިދުމަތް ފޯރުވައިދިން އަސްލު އަގަށްވުރެ އިތުރުވުން؛ އަދި

(ށ) އެ މުޢާމަލާތާ ގުޅިގެން ރަޖިސްޓަރީކޮށްފައިވާ ފަރާތުން ޓެކްސް އިންވޮއިސްއެއް ތައްޔާރުކޮށްފައިވުން؛ އަދި

(ނ) ޓެކްސް އިންވޮއިސްއެއްގައި ޓެކުހުގެ ގޮތުގައި ބަޔާންކޮށްފައިވާ އަދަދެއް ނުވަތަ ރަޖިސްޓަރީކޮށްފައިވާ ފަރާތުން ފާއިތުވެފައިވާ ޓެކްސް ނެގޭ މުއްދަތެއްގެ ޖީ.އެސް.ޓީ ބަޔާނުގައި އައުޓްޕުޓް ޓެކުހުގެ ގޮތުގައި ހިމަނާފައިވާ އަދަދެއް، މި މާއްދާގެ (ހ) ގައި ބަޔާންކޮށްފައިވާފަދަ ހާލަތަކާއި ގުޅިގެން އިޞްލާޙުކުރަންޖެހުން.

68. ފާއިތުވެފައިވާ ޓެކްސް ނެގޭ މުއްދަތު

މި ގަވާއިދުގެ 66 ވަނަ މާއްދާ އަދި 67 ވަނަ މާއްދާގެ ބޭނުމަށް، ފާއިތުވެފައިވާ ޓެކްސް ނެގޭ މުއްދަތެއް ކަމަށް ބުނެފައި އެވަނީ، މުދާ ނުވަތަ ޚިދުމަތް ފޯރުވައިދެވުނު ޓެކްސް ނެގޭ މުއްދަތު ނުވަތަ މި ގަވާއިދުގެ 66 ވަނަ މާއްދާގެ (ހ) އަދި 67 ވަނަ މާއްދާގެ (ހ) ގައި ބަޔާންކޮށްފައިވާފަދަ ޙާލަތެއް މެދުވެރިވާ ޓެކްސް ނެގޭ މުއްދަތަށްވުރެ ކުރީގެ، ޓެކްސް ނެގޭ އެހެން މުއްދަތަކަށެވެ.

69. ކްރެޑިޓް ނޯޓް އަދި ޑެބިޓް ނޯޓާ ގުޅޭ ޢާންމު މާއްދާތައް

ރަޖިސްޓަރީކޮށްފައިވާ ފަރާތަކުން ޓެކްސް ނެގޭ މުއްދަތަކަށް ދައްކަންޖެހޭ ޓެކުހުގެ އަދަދު ހިސާބުކުރުމުގައި އަންނަނިވި މާއްދާތަކަށް ޢަމަލުކުރަންވާނެއެވެ.

(ހ) ޓެކްސް ނެގޭ މުއްދަތުގައި އެ ފަރާތުން ދޫކޮށްފައިވާ ކްރެޑިޓް ނޯޓުތަކުގެ ޖުމުލަ އަދަދު އުނިކުރުން، އަދި އެ މުއްދަތުގައި އެ ފަރާތަށް ލިބިފައިވާ ކްރެޑިޓް ނޯޓުތަކުގެ ޖުމުލަ އަދަދު އެއްކުރުން؛

(ށ) ޓެކްސް ނެގޭ މުއްދަތުގައި އެ ފަރާތުން ދޫކޮށްފައިވާ ޑެބިޓް ނޯޓުތަކުގެ ޖުމުލަ އަދަދު އެއްކުރުން، އަދި އެ މުއްދަތުގައި އެ ފަރާތަށް ލިބިފައިވާ ޑެބިޓް ނޯޓުތަކުގެ ޖުމުލަ އަދަދު އުނިކުރުން.

70. ޓެކްސް ނެގޭ މުއްދަތު ކަނޑައަޅާ ތްރެޝޯލްޑް

(ހ) ޤާނޫނުގެ 24 ވަނަ މާއްދާގެ (ހ) ގެ ބޭނުމަށް، ރަޖިސްޓަރީކޮށްފައިވާ ފަރާތުން މަހެއްގެ ތެރޭގައި ފޯރުވައިދޭ މުދަލާއި ޚިދުމަތުގެ ޖުމުލަ އަގު، އެ މާއްދާގައި ބަޔާންކޮށްފައިވާ -/1,000,000 (އެއް މިލިއަން) ރުފިޔާގެ ތްރެޝޯލްޑަށްވުރެ އިތުރުވާކަން ނުވަތަ ނޫންކަން ބަލާނީ، ފާއިތުވެދިޔަ 12 (ބާރަ) މަސްދުވަހުގެ ތެރޭގައި އެ ފަރާތުން ފޯރުވައިދިން މުދަލާއި ޚިދުމަތުގެ ޖުމުލަ އަގުން މަހަކަށްޖެހޭ އެވްރެޖް އަގަށާއި، ކުރިއަށް އޮތް 12 (ބާރަ) މަސްދުވަހުގެ ތެރޭގައި އެ ފަރާތުން ފޯރުވައިދޭނެކަމަށް އަންދާޒާކުރާ މުދަލާއި ޚިދުމަތުގެ ޖުމުލަ އަގުން މަހަކަށްޖެހޭނެ އެވްރެޖް އަގަށް ރިޢާޔަތްކޮށެވެ.

(ށ) ޤާނޫނުގެ 24 ވަނަ މާއްދާގެ (ހ) ގެ (1) ގެ ދަށުން 3 (ތިނެއް) މަސްދުވަހުގެ ޓެކްސް ނެގޭ މުއްދަތެއް އެއްވެސް ފަރާތަކަށް އިޚުތިޔާރުކުރެވޭނީ، މި މާއްދާގެ (ހ) ގައި ބަޔާންކޮށްފައިވާ ދެ އެވްރެޖްވެސް -/1,000,000 (އެއް މިލިއަން) ރުފިޔާއަށްވުރެ ދަށް ކަމުގައިވާނަމައެވެ.

71. ޓެކްސް ނެގޭ މުއްދަތު ބަދަލުކުރުމަށް އެދި ހުށަހެޅުން

(ހ) ރަޖިސްޓަރީކޮށްފައިވާ ފަރާތެއްގެ ޓެކްސް ނެގޭ މުއްދަތު ބަދަލުކުރުމަށް އެދި ހުށަހަޅަންވާނީ އެކަމަށް އެދޭ ފޯމު (MIRA207) ފުރިހަމަކުރުމަށްފަހު އެ ފޯމުގައި ކަނޑައަޅާފައިވާ އެންމެހައި މަޢުލޫމާތާއި ލިޔެކިޔުންތަކާ އެކުގައެވެ. އަދި އެ ފަރާތެއްގެ ޓެކްސް ނެގޭ މުއްދަތު އެ ފޯމުގައި އެދިފައިވާގޮތަށް ބަދަލުކުރަންވާނީ ކޮމިޝަނަރ ޖެނެރަލްގެ ހުއްދަ ލިޔުމަކުން ލިބުމުންނެވެ.

(ށ) މި މާއްދާގެ (ހ) ގެ ދަށުން ޓެކްސް ނެގޭ މުއްދަތު ބަދަލުކުރުމަށް ހުއްދަ ލިބޭ ފަރާތުން، އެ ހުއްދައާ އެއްގޮތަށް ޓެކްސް ނެގޭ މުއްދަތު ބަދަލުކުރާނީ، އެ ހުއްދަ ލިބުނުއިރު ހިނގަމުންދާ ޓެކްސް ނެގޭ މުއްދަތާ ޖެހިގެން ފެށޭ ޓެކްސް ނެގޭ މުއްދަތުގައެވެ.

72. ޓެކްސް ނެގޭ މުއްދަތު ބަދަލުކުރެވޭނެ ވަރު

ރަޖިސްޓަރީކޮށްފައިވާ ފަރާތަކުން އެދިގެން ޓެކްސް ނެގޭ މުއްދަތު ބަދަލުކުރުމަށް ހުއްދަ ދެވޭނީ ގިނަވެގެން އަހަރަކު 1 (އެކެއް) ފަހަރެވެ.

73. ޓެކްސް ނެގޭ މުއްދަތު ބަދަލުކުރަން އެންގުން

(ހ) މި ގަވާއިދުގެ 72 ވަނަ މާއްދާގައި އެހެން ބަޔާންކޮށްފައި އޮތްނަމަވެސް، ރަޖިސްޓަރީކޮށްފައިވާ ފަރާތުން ފާއިތުވެދިޔަ 12 (ބާރަ) މަސްދުވަހުގެ ތެރޭގައި ފޯރުވައިދިން މުދަލާއި ޚިދުމަތުގެ ޖުމުލަ އަގުން މަހަކަށްޖެހޭ އެވްރެޖް -/1,000,000 (އެއް މިލިއަން) ރުފިޔާއަށްވުރެ އިތުރުވެއްޖެނަމަ، ނުވަތަ ކުރިއަށްއޮތް 12 (ބާރަ) މަސްދުވަހުގެ ތެރޭގައި އެ ފަރާތުން ފޯރުވައިދޭނެ މުދަލާއި ޚިދުމަތުގެ ޖުމުލަ އަގުން މަހަކަށްޖެހޭ އެވްރެޖް -/1,000,000 (އެއް މިލިއަން) ރުފިޔާއަށްވުރެ އިތުރުވާނެކަމަށް އަންދާޒާކުރެވޭނަމަ، އެ ފަރާތެއްގެ ޓެކްސް ނެގޭ މުއްދަތު 1 (އެކެއް) މަސްދުވަހަށް ބަދަލުކުރުމަށް ކޮމިޝަނަރ ޖެނެރަލްއަށް އެންގިދާނެއެވެ.

(ށ) މި މާއްދާގެ (ހ) ގައިވާ ގޮތުގެމަތިން ޓެކްސް ނެގޭ މުއްދަތު ބަދަލުކުރުމަށް ކޮމިޝަނަރ ޖެނެރަލް އަންގައިފިނަމަ، އެ އެންގުމާ އެއްގޮތަށް ޓެކްސް ނެގޭ މުއްދަތު ބަދަލުކުރާނީ، އެ އެންގުން އެންގިއިރު ހިނގަމުންދާ ޓެކްސް ނެގޭ މުއްދަތާ ޖެހިގެން ފެށޭ ޓެކްސް ނެގޭ މުއްދަތުގައެވެ.

74. ޖީ.އެސް.ޓީ ހިސާބުކުރުމުގެ އަސާސް ބަދަލުކުރުން

(ހ) ޤާނޫނުގެ 34 ވަނަ މާއްދާގެ (ށ) ގެ ދަށުން ޖީ.އެސް.ޓީ ހިސާބުކުރުމުގެ އަސާސް، އިންވޮއިސް އަސާސް ފިޔަވައި އެހެން އަސާސަކަށް ބަދަލުކުރުމުގެ ހުއްދަ ހޯދުމުގެ ބޭނުމަށް، އެ މާއްދާގައި ބަޔާންކޮށްފައިވާ -/2,000,000 (ދެ މިލިއަން) ރުފިޔާގެ ތްރެޝޯލްޑަށްވުރެ އިތުރުވާކަން ނުވަތަ ނޫންކަން ބަލާނީ، ފާއިތުވެދިޔަ 12 (ބާރަ) މަސްދުވަހުގެ ތެރޭގައި އެ ފަރާތުން ފޯރުވައިދިން މުދަލާއި ޚިދުމަތުގެ ޖުމުލަ އަގަށާއި، އަދި ކުރިއަށް އޮތް 12 (ބާރަ) މަސްދުވަހުގެ ތެރޭގައި އެ ފަރާތުން ފޯރުވައިދޭނެކަމަށް އަންދާޒާކުރާ މުދަލާއި ޚިދުމަތުގެ ޖުމުލަ އަގަށް ރިޢާޔަތްކޮށެވެ.

(ށ) ޤާނޫނުގެ 34 ވަނަ މާއްދާގެ (ށ) ގެ ދަށުން ޖީ.އެސް.ޓީ ހިސާބުކުރުމުގެ އަސާސް، އިންވޮއިސް އަސާސް ފިޔަވައި އެހެން އަސާސަކަށް ބަދަލުކުރުމުގެ ހުއްދަ އެއްވެސް ފަރާތަކަށް ދެވޭނީ، މި މާއްދާގެ (ހ) ގައި ބަޔާންކޮށްފައިވާ ދެ އަދަދުވެސް -/2,000,000 (ދެ މިލިއަން) ރުފިޔާއަށްވުރެ ދަށް ކަމުގައިވާނަމައެވެ.

(ނ) މި މާއްދާގެ (ށ) ގެ ދަށުން ޖީ.އެސް.ޓީ ހިސާބުކުރުމުގެ އަސާސަށް ބަދަލެއް ގެނައުމަށް ހުއްދަ ދީފިނަމަ، އެއަށް ޢަމަލުކުރަން ފަށަންވާނީ އެ ހުއްދަ ދެވުނުއިރު ހިނގަމުންދާ ޓެކްސް ނެގޭ މުއްދަތާ ޖެހިގެން ފެށޭ ޓެކްސް ނެގޭ މުއްދަތުގައެވެ.

(ރ) ޖީ.އެސް.ޓީ ހިސާބުކުރުމުގެ އަސާސް ބަދަލުކުރުމުގެ ހުއްދައަށް އެދި ހުށަހަޅަންވާނީ އެކަމަށް އެދޭ ފޯމް (MIRA207) ފުރިހަމަކުރުމަށްފަހު އެ ފޯމުގައި ކަނޑައަޅައިފައިވާ އެންމެހައި މަޢުލޫމާތާއި ލިޔެކިޔުންތަކާ އެކުގައެވެ.

75. ޖީ.އެސް.ޓީ ހިސާބުކުރުމުގެ އަސާސް ބަދަލުވުމުން ހުށަހަޅަންޖެހޭ މަޢުލޫމާތު

(ހ) ޤާނޫނުގެ 34 ވަނަ މާއްދާގެ ދަށުން ޖީ.އެސް.ޓީ ހިސާބުކުރުމުގެ އަސާސް ބަދަލުވެއްޖެނަމަ، ކޮމިޝަނަރ ޖެނެރަލް ކަނޑައަޅާ ނަމޫނާއާ އެއްގޮތްވާ ގޮތުގެމަތިން ރަޖިސްޓަރީކޮށްފައިވާ ފަރާތުން އަންނަނިވި މަޢުލޫމާތު މީރާއަށް ހުށަހަޅަންވާނެއެވެ.

(1) ޓެކްސް ނެގޭ ޙަރަކާތާ ގުޅިގެން ރަޖިސްޓަރީކޮށްފައިވާ ފަރާތަށް ލިބެންޖެހި ނުލިބިވާ ފައިސާގެ ތަފުސީލު؛

(2) ޓެކްސް ނެގޭ ޙަރަކާތާ ގުޅިގެން ރަޖިސްޓަރީކޮށްފައިވާ ފަރާތުން އެހެން ފަރާތްތަކަށް ދައްކަންޖެހި ނުދައްކައިވާ ފައިސާގެ ތަފުސީލު؛

(3) ކޮމިޝަނަރ ޖެނެރަލް ކަނޑައަޅާ އެނޫންވެސް މަޢުލޫމާތު.

(ށ) މި މާއްދާގެ (ހ) ގައިވާ ގޮތުގެމަތިން ހުށަހަޅަންޖެހޭ މަޢުލޫމާތު ހުށަހަޅާނީ އަސާސް ބަދަލުކުރުމުގެ ހުއްދަ ދެވުނުއިރު ހިނގަމުންދިޔަ ޓެކްސް ނެގޭ މުއްދަތުގެ ޖީ.އެސް.ޓީ ބަޔާން ހުށަހަޅަންޖެހޭ އެންމެފަހު ދުވަހު ނުވަތަ އެ ތާރީޚުގެ ކުރިންނެވެ.

76. ޖީ.އެސް.ޓީ ބަޔާން

(ހ) މި ގަވާއިދުގައި ކަނޑައެޅިގެން އެހެން ގޮތަކަށް ބަޔާންކޮށްފައި ނުވާހާ ހިނދަކު، ރަޖިސްޓަރީކޮށްފައިވާ ކޮންމެ ފަރާތަކުންމެ، ޤާނޫނާއި ގަވާއިދުގައި ކަނޑައަޅާފައިވާ އުސޫލުތަކާ އެއްގޮތަށް އަދި ކަނޑައަޅާ މުއްދަތުތަކެއްގައި މީރާއަށް ޖީ.އެސް.ޓީ ބަޔާނެއް ހުށަހަޅަންވާނެއެވެ.

(ށ) މި ގަވާއިދުގެ 7 ވަނަ މާއްދާގެ ދަށުން ވަކިން ރަޖިސްޓަރީކުރާ ކޮންމެ ފަރާތަކުން، ޓެކްސް ނެގޭ ކޮންމެ މުއްދަތަކަށް ވަކި ޖީ.އެސް.ޓީ ބަޔާނެއް ހުށަހަޅަންވާނެއެވެ.

77. ޖީ.އެސް.ޓީ ބަޔާން ތައްޔާރުކުރުން

(ހ) ޤާނޫނުގެ 16 ވަނަ މާއްދާގައި ބަޔާންކޮށްފައިވާ ދާއިރާތަކުގެ ޓެކްސް ނެގޭ ޙަރަކާތްތައް ހިންގާ ފަރާތްތަކުން ޖީ.އެސް.ޓީ ބަޔާން ހުށަހަޅަންވާނީ (MIRA205) ފޯމުންނެވެ.

(ށ) ޤާނޫނުގެ 15 ވަނަ މާއްދާގައި ބަޔާންކޮށްފައިވާ ޓޫރިޒަމް ދާއިރާގެ ޓެކްސް ނެގޭ ޙަރަކާތްތައް ހިންގާ ފަރާތްތަކުން ޖީ.އެސް.ޓީ ބަޔާން ހުށަހަޅަންވާނީ (MIRA206) ފޯމުންނެވެ.

(ނ) ޖީ.އެސް.ޓީ ބަޔާން ހުށަހެޅުމަށް މީރާއިން ކަނޑައަޅާފައިވާ ފޯމު ފުރަންވާނީ ރަޖިސްޓަރީކޮށްފައިވާ ފަރާތުން ބޭނުންކުރާ ޖީ.އެސް.ޓީ ހިސާބުކުރުމުގެ އަސާސާއި އެއްގޮތްވާ ގޮތުގެމަތިން، އެ ޓެކްސް ނެގޭ މުއްދަތުގެ ޖީ.އެސް.ޓީ ބަޔާނުގައި ހިމަނަންޖެހޭ އަދަދުތައް ހިސާބުކުރުމަށްފަހުގައެވެ.

78. ޖީ.އެސް.ޓީ ބަޔާނުގައި ހިމަނަންޖެހޭ މަޢުލޫމާތު

ރަޖިސްޓަރީކޮށްފައިވާ ފަރާތުން ހުށަހަޅާ ޖީ.އެސް.ޓީ ބަޔާނުގައި، އެ ފަރާތުން ހިންގާ އެންމެހައި ޓެކްސް ނެގޭ ޙަރަކާތްތަކާ ގުޅޭގޮތުން، ޤާނޫނުގެ 29 ވަނަ މާއްދާގައި ބަޔާންކޮށްފައިވާ މަޢުލޫމާތުގެ އިތުރުން، އަންނަނިވި މަޢުލޫމާތު ހިމަނަންވާނެއެވެ.

(ހ) ރަޖިސްޓަރީކޮށްފައިވާ ފަރާތުން ފޯރުވައިދީފައިވާ މުދަލާއި ޚިދުމަތުގެ ޖުމުލަ އަގުގެ ތެރޭގައި ހިމެނޭ، ޓެކްސް ނެގުމުން އިސްތިސްނާވާ މުދަލާއި ޚިދުމަތްތަކުގެ ޖުމުލަ އަގު؛

(ށ) ރަޖިސްޓަރީކޮށްފައިވާ ފަރާތުން ފޯރުވައިދީފައިވާ މުދަލާއި ޚިދުމަތުގެ ޖުމުލަ އަގުގެ ތެރޭގައި ހިމެނޭ، ސުން-ރޭޓުގައި ޖީ.އެސް.ޓީ ދައްކަންޖެހޭ މުދަލާއި ޚިދުމަތްތަކުގެ ޖުމުލަ އަގު؛

(ނ) ރަޖިސްޓަރީކޮށްފައިވާ ފަރާތުން ފޯރުވައިދީފައިވާ މުދަލާއި ޚިދުމަތުގެ ޖުމުލަ އަގުގެ ތެރޭގައި ހިމެނޭ، ޤާނޫނުގެ އިމުގެ ތެރޭގައި ނުހިމެނޭ އެހެނިހެން އާމްދަނީ؛

(ރ) MIRA205 ނުވަތަ MIRA206 ފޯމުގައި ހިމެނޭ އެހެނިހެން މަޢުލޫމާތު.

78-1. ޖީ.އެސް.ޓީ ބަޔާނާއެކު ހުށަހަޅަންޖެހޭ ލިޔެކިޔުންތައް

(ހ) ރަޖިސްޓަރީކޮށްފައިވާ ފަރާތްތަކުން ހުށަހަޅާ ޖީ.އެސް.ޓީ ބަޔާނާއެކު، އަންނަނިވި ލިޔެކިޔުންތައް މީރާއަށް ހުށަހަޅަންވާނެއެވެ.

(1) ރަޖިސްޓަރީކޮށްފައިވާ ފަރާތުން އިންޕުޓް ޓެކުހުގެ ގޮތުގައި އެއްވެސް އަދަދެއް އުނިކުރާނަމަ، މީރާއިން ކަނޑައަޅާ ނަމޫނާއާ އެއްގޮތްވާ ގޮތުގެ މަތީން ތައްޔާރުކޮށްފައިވާ އިންޕުޓް ޓެކްސް ސްޓޭޓްމަންޓެއް؛

(2) މި އަކުރުގެ (1) ވަނަ ނަންބަރު ރައްދުވާނަމަ، އިންޕުޓް ޓެކުހުގެ ގޮތުގައި އުނިކުރާ ކޮންމެ އަދަދެއް ނިސްބަތްވާ ޓެކްސް އިންވޮއިސްގެ އަސްލު؛

(3) މީރާއިން ކަނޑައަޅާ ނަމޫނާއާ އެއްގޮތްވާ ގޮތުގެ މަތީން ތައްޔާރުކޮށްފައިވާ އައުޓްޕުޓް ޓެކްސް ސްޓޭޓްމަންޓެއް.

(ށ) މި މާއްދާގެ (ހ) ގެ (2) ވަނަ ނަންބަރަށް ޢަމަލަކުރާނީ، ކޮމިޝަނަރ ޖެނެރަލް ކަނޑައަޅާ ފަރާތްތަކުންނެވެ.

(ނ) މި މާއްދާގެ (ހ) ގެ (2) ވަނަ ނަންބަރުގެ ދަށުން ޖީ.އެސް.ޓީ ބަޔާނާއެކު ހުށަހަޅާ ޓެކްސް އިންވޮއިސްތައް ތަރުތީބުކޮށްފައި ހުންނަންވާނީ، އިންޕުޓް ޓެކްސް ސްޓޭޓްމަންޓުގައި އެ އިންވޮއިސްތައް ލިސްޓުކޮށްފައިވާ ތަރުތީބުންނެވެ.

(ރ) މި މާއްދާގެ (ހ) ގެ (2) ވަނަ ނަންބަރުގެ ދަށުން ހުށަހަޅާ ޓެކްސް އިންވޮއިސްއަކީ ޤާނޫނާއި މި ގަވާއިދުގައި ކަނޑައަޅައިފައިވާ ހަމަތަކާ ޚިލާފަށް ތައްޔާރުކޮށްފައިވާ ޓެކްސް އިންވޮއިސްއެއް ކަމަށް މީރާގެ އޮފިސަރަކަށް ފެނިއްޖެނަމަ، އަންނަނިވި ތާރީޚުތަކުން ފެށިގެން 30 (ތިރީސް) ދުވަހަށް ވުރެ ދިގު ނޫން މުއްދަތަކަށް އެ ޓެކްސް އިންވޮއިސް ހިފެހެއްޓިދާނެއެވެ.

(1) ރަޖިސްޓަރީކޮށްފައިވާ ފަރާތުން ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 42 ވަނަ މާއްދާގައި ބަޔާންކޮށްފައިވާ މުއްދަތުގެ ތެރޭގައި އިއުތިރާޒުކޮށްފައި ނުވާނަމަ، ނުވަތަ ޓެކްސް އެޕީލް ޓްރައިބިއުނަލްގެ ނުވަތަ ކޯޓެއްގެ ނިންމުމެއް އިސްތިއުނާފުކުރުމަށް ދީފައިވާ މުއްދަތުގެ ތެރޭގައި އިސްތިއުނާފުކޮށްފައި ނުވާނަމަ، ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 42 ވަނަ މާއްދާގައި ބަޔާންކޮށްފައިވާ މުއްދަތު ހަމަވާ ތާރީޚު ނުވަތަ އިސްތިއުނާފުކުރުމަށް ދީފައިވާ މުއްދަތު ހަމަވާ ތާރީޚު؛

(2) ރަޖިސްޓަރީކޮށްފައިވާ ފަރާތުން، ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 42 ވަނަ މާއްދާގައި ބަޔާންކޮށްފައިވާ މުއްދަތުގެ ތެރޭގައި އިއުތިރާޒުކޮށްފައިވާނަމަ، ޓެކްސް އެޕީލް ޓްރައިބިއުނަލުން ނުވަތަ ކޯޓަކުން އެ އިއުތިރާޒާމެދު ފަހުގެ ނިންމުން ނިންމާ ތާރީޚު.

(ބ) މި މާއްދާގެ (ރ) ރައްދުވާނަމަ:

(1) އެ ޓެކްސް އިންވޮއިސް ބެލުމުގެ ހުއްދައަކަށް ރަޖިސްޓަރީކޮށްފައިވާ ފަރާތަށް އެދެވިދާނެއެވެ. އަދި އެ ޓެކްސް އިންވޮއިސް ބެލުމުގެ ހުއްދަ ދީފިނަމަ، އެ ފަރާތަށް އެ ޓެކްސް އިންވޮއިސް ބެލޭނީ މީރާގެ އޮފިސަރެއްގެ ބެލުމުގެ ދަށުންނެވެ.

(2) އެ ޓެކްސް އިންވޮއިސްގެ ފޮޓޯއަކަށް ނުވަތަ ކޮޕީއަކަށް، ރަޖިސްޓަރީކޮށްފައިވާ ފަރާތަށް އެދެވިދާނެއެވެ. އަދި:

(i) މީރާގެ އޮފިސަރެއްގެ ބެލުމުގެ ދަށުން އެ ޓެކްސް އިންވޮއިސްގެ ފޮޓޯއެއް ނުވަތަ ކޮޕީއެއް ނެގިދާނެއެވެ؛ ނުވަތަ

(ii) މީރާގެ އޮފިސަރަކު އެ ޓެކްސް އިންވޮއިސްގެ ފޮޓޯއެއް ނުވަތަ ކޮޕީއެއް ނެގުމަށްފަހު އެކަށީގެންވާ މުއްދަތެއްގެ ތެރޭގައި ރަޖިސްޓަރީކޮށްފައިވާ ފަރާތަށް ފޮނުވަންވާނެއެވެ.

(ޅ) ރަޖިސްޓަރީކޮށްފައިވާ ފަރާތުން މި މާއްދާގެ (ބ) ގެ ދަށުން އެދޭ އެދުމަކަށް އިޖާބަދީފިނަމަ ޓެކްސް އެޕީލް ޓްރައިބިއުނަލަށް ނުވަތަ ކޯޓަކަށް ހުށަހަޅައިފައިވާ ނުވަތަ ހުށަހަޅާނެ މައްސަލައަކަށް ހުރަސްއެޅޭނެކަމަށް ކޮމިޝަނަރ ޖެނެރަލަށް ގަބޫލުކުރެވޭނަމަ، އެ ފަދަ އެދުމަކަށް އިޖާބައެއް ނުދެވޭނެއެވެ.

(ކ) ޖީ.އެސް.ޓީ ބަޔާނާއެކު ހުށަހަޅާ ޓެކްސް އިންވޮއިސްއެއް ނުވަތަ ޖީ.އެސް.ޓީ ބަޔާނުގައިވާ އިންޕުޓް ޓެކްސް އުނިކުރުމެއް (އެ އުނިކުރުމާ ގުޅޭ ޓެކްސް އިންވޮއިސް އޮތްކަމުގައި ނުވަތަ ނެތްކަމުގައި ވީ ނަމަވެސް) ޤާނޫނާއި މި ގަވާއިދުގައި ބަޔާންކޮށްފައިވާ ހަމަތަކާ އެއްގޮތްތޯ ކަނޑައެޅުމަށް މީރާގެ އޮފިސަރަކު ކުރާ މުރާޖަޢާއަކީ، ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 3 ވަނަ ބާބުގެ ބޭނުމަށް، އޮޑިޓެއް ނުވަތަ ތަޙުޤީޤެއް ކަމުގައެއް ނުބެލެވޭނެއެވެ.

(އ) ރަޖިސްޓަރީކޮށްފައިވާ ފަރާތްތަކުން އިންޕުޓް ޓެކްސް ސްޓޭޓްމަންޓާއި އައުޓްޕުޓް ޓެކްސް ސްޓޭޓްމަންޓް މީރާއަށް ހުށަހަޅާނީ، އަންނަނިވި ވަސީލަތްތަކުގެ ތެރެއިން، މީރާއިން ކަނޑައަޅާ ވަސީލަތެއް މެދުވެރިކޮށެވެ.

(1) މީރާކަނެކްޓް؛

(2) އީމެއިލް؛ ނުވަތަ

(3) ޕޯޓަބަލް ސްޓޯރޭޖް ޑިވައިސްއެއް.

(ވ) މި މާއްދާގެ (ހ) ގެ (3) ވަނަ ނަންބަރާއި މި މާއްދާގެ (އ) ރައްދުވާނީ، އެ ފަރާތަށް ފައިބެ ޓެކްސް އަހަރުގައި ނިމުނު ޓެކްސް ނެގޭ މުއްދަތުތަކުގެ ޖުމުލަ އާމްދާނީ 5,000,000/- (ފަސް މިލިޔަން) ރުފިޔާ ނުވަތަ އެއަށްވުރެ އިތުރުވާ ފަރާތްތަކަށެވެ.

78-2. މީރާކަނެކްޓް މެދުވެރިކޮށް ޖީ.އެސް.ޓީ ބަޔާން ހުށަހެޅުމާއި ފައިސާ ދެއްކުން

(ހ) އަންނަނިވި ފަރާތްތަކުން ޖީ.އެސް.ޓީ ބަޔާން ހުށަހަޅަންވާނީ މީރާކަނެކްޓް މެދުވެރިކޮށެވެ.

(1) ފައިބެ ޓެކްސް އަހަރުގައި ނިމުނު ޓެކްސް ނެގޭ މުއްދަތުތަކުގެ ޖުމުލަ އާމްދާނީ 2,500,000/- (ދެ މިލިޔަން ފަސް ލައްކަ) ރުފިޔާ ނުވަތަ އެއަށްވުރެ އިތުރުވާ ފަރާތްތައް؛

(2) ޓެކްސް ޤާނޫނެއްގެ ދަށުން ނުވަތަ ގަވާއިދެއްގެ ދަށުން އެއްވެސް ޓެކްސް ބަޔާނެއް މީރާކަނެކްޓް މެދުވެރިކޮށް ހުށަހަޅަންޖެހުނު ފަރާތްތައް.

(ށ) ފައިބެ ޓެކްސް އަހަރުގައި ނިމުނު ޓެކްސް ނެގޭ މުއްދަތުތަކުގެ ޖުމުލަ އާމްދާނީ 20,000,000/- (ވިހި މިލިޔަން) ރުފިޔާ ނުވަތަ އެއަށްވުރެ އިތުރުވާ ފަރާތްތަކުން ޖީ.އެސް.ޓީ.އާއި ޖީ.އެސް.ޓީ.އާ ގުޅޭ ޖޫރިމަނާ ދައްކަންވާނީ، މީރާކަނެކްޓް މެދުވެރިކޮށް ނުވަތަ އެމް.އާރް.ޓީ.ޖީ.އެސް މެދުވެރިކޮށެވެ.

(ނ) މި މާއްދާގެ (ހ) އާއި (ށ) އަށް ޢަމަލުކުރަން ފަށާނީ، 1 މޭ 2023 އިން ފެށިގެންނެވެ. 

79. ޖީ.އެސް.ޓީ ބަޔާނުގައި ސޮއިކުރެވޭނެ ފަރާތްތައް

ރަޖިސްޓަރީކޮށްފައިވާ ފަރާތަކުން މީރާއަށް ހުށަހަޅާ ޖީ.އެސް.ޓީ ބަޔާނުގައި ސޮއިކުރަންވާނީ ރަޖިސްޓަރީކޮށްފައިވާ ފަރާތުން، ނުވަތަ އެ ފަރާތުގެ ނަމުގައި އެކަން ކުރުމަށް ކަނޑައަޅައި މީރާއަށް އަންގާފައިވާ ފަރާތަކުންނެވެ.

80. ޖީ.އެސް.ޓީ ބަޔާން ހުށަހަޅަންޖެހޭ ތާރީޚު ފަސްކުރުން

(ހ) އަންނަނިވި ހާލަތުތަކުގެ ތެރެއިން ޙާލަތެއް މެދުވެރިވެއްޖެނަމަ، ޖީ.އެސް.ޓީ ބަޔާން ހުށަހަޅަންޖެހޭ ތާރީޚު ފަސްކޮށްދިނުމަށް އެދި ރަޖިސްޓަރީކޮށްފައިވާ ފަރާތުން ކޮމިޝަނަރ ޖެނެރަލްއަށް ހުށަހެޅިދާނެއެވެ.

(1) ރަޖިސްޓަރީކޮށްފައިވާ ފަރާތަށް ކުއްލިއަކަށް ބޮޑު ބައްޔެއް ޖެހުން؛

(2) ރަޖިސްޓަރީކޮށްފައިވާ ފަރާތް މަރުވުން؛

(3) މަޤްބޫލު އެހެން އެއްވެސް ކަމެއް ދިމާވުން.

(ށ) މި މާއްދާގެ (ހ) ގައިވާފަދަ ޙާލަތެއް މެދުވެރިވެއްޖެނަމަ، ޖީ.އެސް.ޓީ ބަޔާން ހުށަހަޅަންޖެހޭ މުއްދަތު އިތުރުކޮށްދިނުމުގެ އިޚުތިޔާރު ކޮމިޝަނަރ ޖެނެރަލްއަށް ލިބިގެންވެއެވެ. އަދި، ކޮމިޝަނަރ ޖެނެރަލް ހުއްދަދޭ ތާރީޚުން ފެށިގެން، އެ ހުއްދަ ދީފައިވާ ގޮތެއްގެމަތިން ރަޖިސްޓަރީކޮށްފައިވާ ފަރާތުން ޢަމަލުކުރަންވާނެއެވެ.

81. ޖީ.އެސް.ޓީ ބަޔާން ހުށަހަޅަންޖެހޭ މުއްދަތު އިތުރުކޮށްދެވިފައިވާ ހާލަތުތަކުގައި ޖީ.އެސް.ޓީ ދެއްކުން

ޖީ.އެސް.ޓީ ބަޔާން ހުށަހަޅަންޖެހޭ މުއްދަތު އިތުރުކޮށްދެވިފައިވާ ފަރާތްތަކުން ތިރީގައި ބަޔާންކުރެވިފައިވާގޮތަށް އަންދާޒާކޮށްފައިވާ އަދަދެއް ޖީ.އެސް.ޓީގެ ގޮތުގައި މީރާއަށް ދައްކަންވާނެއެވެ. މިގޮތުން ޖީ.އެސް.ޓީ ދައްކަންވާނީ ޖީ.އެސް.ޓީ ބަޔާން ހުށަހަޅަންޖެހޭ މުއްދަތު އިތުރުކޮށްނުދެވުނުނަމަ އެ ފަރާތުން ޖީ.އެސް.ޓީ ދައްކަންޖެހޭނެ ތާރީޚުގެ ކުރިންނެވެ.

(ހ) ފާއިތުވި އަހަރުގެ ހަމަ އެ ޓެކްސް ނެގޭ މުއްދަތުގައި ދެއްކި ޖީ.އެސް.ޓީގެ އަދަދާއި، އެންމެ ފަހުން ހުށަހެޅި ޖީ.އެސް.ޓީ ބަޔާނުގައިވާ ޖީ.އެސް.ޓީގެ އަދަދުންކުރެ ބޮޑު އަދަދު؛

(ށ) ކޮމިޝަނަރ ޖެނެރަލްގެ ހުއްދައާއެކު، މި މާއްދާގެ (ހ) ގައި ބަޔާންކޮށްފައިވާ ގޮތް ނޫން އެހެން ގޮތަކަށް އަންދާޒާކުރެވިފައިވާ ޖީ.އެސް.ޓީގެ އަދަދު.

82. އިތުރުކުރެވުނު މުއްދަތު ހަމަވުމުން ޖީ.އެސް.ޓީ ބަޔާން ހުށަހެޅުމާއި ޖީ.އެސް.ޓީ ދެއްކުން

(ހ) މި ގަވާއިދުގެ 80 ވަނަ މާއްދާގެ ދަށުން ޖީ.އެސް.ޓީ ބަޔާން ހުށަހަޅަންޖެހޭ ތާރީޚު ފަސްކުރުމަށް ހުއްދަދެވުނު މުއްދަތު ހަމަވުމުން، އެ މުއްދަތާ ޖެހިގެން ފެށޭ ޓެކްސް ނެގޭ މުއްދަތުގެ ޖީ.އެސް.ޓީ ބަޔާނާއެކު، ތާރީޚު ފަސްކުރުމަށް ހުއްދަދެވުނު މުއްދަތުގެ ޖީ.އެސް.ޓީ ބަޔާންތައްވެސް ހުށަހަޅަންވާނެއެވެ.

(ށ) ޖީ.އެސް.ޓީ ބަޔާން ހުށަހަޅަންޖެހޭ ތާރީޚު ފަސްކުރުމަށް ހުއްދަދެވުނު މުއްދަތު ހަމަވުމުން ފެށޭ ޓެކްސް ނެގޭ މުއްދަތުގެ ޖީ.އެސް.ޓީ ދައްކަންވާނީ، ތާރީޚު ފަސްކުރުމަށް ހުއްދަދެވުނު މުއްދަތަށް ދައްކަންޖެހޭ އިތުރު ޓެކުހެއްވާނަމަ އެ ޓެކުހާއި، އެ ޓެކުހަށްވާ ޖޫރިމަނާއާ އެކުގައެވެ. އަދި މި ޙާލަތުގައި ޖީ.އެސް.ޓީގެ ގޮތުގައި އިތުރަށް ފައިސާ ދެއްކިފައިވާނަމަ، އެ ފަރާތުން ދައްކަންޖެހޭ ޖީ.އެސް.ޓީގެ އަދަދުން، އެ އަދަދު އުނިކުރެވިދާނެއެވެ. ނަމަވެސް، އިތުރަށް ދައްކާފައިވާ ފައިސާއަށް އިންޓަރެސްޓެއް ނުދެވޭނެއެވެ.

83. ޖީ.އެސް.ޓީ ބަޔާނަށް އިޞްލާޙު ގެނައުން

(ހ) ރަޖިސްޓަރީކޮށްފައިވާ ފަރާތަކުން ހުށަހަޅާފައިވާ ޖީ.އެސް.ޓީ ބަޔާނަކާ ގުޅިގެން، އެ ބަޔާން ހުށަހަޅަންޖެހޭ ތާރީޚުން ފެށިގެން ހިނގާ 12 (ބާރަ) މަސްދުވަހުގެ ތެރޭގައި، އިޞްލާޙުކުރެވިފައިވާ ޖީ.އެސް.ޓީ ބަޔާނެއް ހުށަހަޅައިފިނަމަ، އެ ބަޔާނަކީ ޤާނޫނުގެ 63 ވަނަ މާއްދާގެ ދަށުން ލިޔުމުން އަންގާ އެންގުމެއް ކަމުގައި ބެލެވޭނެއެވެ.

(ށ) ރަޖިސްޓަރީކޮށްފައިވާ ފަރާތަކުން ހުށަހަޅާފައިވާ ޖީ.އެސް.ޓީ ބަޔާނަކާ ގުޅިގެން، އެ ބަޔާން ހުށަހަޅަންޖެހޭ ތާރީޚުން ފެށިގެން 12 (ބާރަ) މަސްދުވަސް ފަހުން އެފަދަ ބަޔާނެއް އިޞްލާޙުކުރަންވާނީ ކޮމިޝަނަރ ޖެނެރަލްއަށް ލިޔުމުން އެކަން ހުށަހެޅުމުން، ކޮމިޝަނަރ ޖެނެރަލް އަންގާ ގޮތެއްގެމަތިންނެވެ.

(ނ) މި މާއްދާގެ ދަށުން ހުށަހަޅާ އިޞްލާޙުކުރެވިފައިވާ ޖީ.އެސް.ޓީ ބަޔާނަކާ ގުޅިގެން އިތުރަށް ޖީ.އެސް.ޓީ ދައްކަންޖެހޭނަމަ، އެ ޓެކުހާއި އެ ޓެކުހަށްވާ ޖޫރިމަނާ، އިޞްލާޙުކުރެވިފައިވާ ބަޔާން ހުށަހަޅާ ދުވަހު މީރާއަށް ދައްކަންވާނެއެވެ.

(ރ) މި މާއްދާގެ ދަށުން ހުށަހަޅާ އިޞްލާޙުކުރެވިފައިވާ ޖީ.އެސް.ޓީ ބަޔާނަކާ ގުޅިގެން އެ ފަރާތަށް ޖީ.އެސް.ޓީ ރީފަންޑް ލިބެންޖެހޭނަމަ، ރީފަންޑް ދިނުމުގައި ޢަމަލުކުރާނީ، ގަވާއިދު ނަންބަރު2013/R-45  (ޓެކްސް ނެގުމާބެހޭ އިދާރީ ގަވާއިދު) ގެ 69 ވަނަ މާއްދާގައި ބަޔާންކޮށްފައިވާ ގޮތަށެވެ.

84. ޓެކްސް އިންވޮއިސް އަތުގައި އޮތުން

ޤާނޫނުގެ 37 ވަނަ މާއްދާގެ (ރ) ގެ ބޭނުމަށް، ރަޖިސްޓަރީކޮށްފައިވާ ފަރާތުން އިންޕުޓް ޓެކުހުގެ ގޮތުގައި އުނިކުރާ އަދަދު ނިސްބަތްވާ ޓެކްސް ނެގޭ މުއްދަތުގެ ޖީ.އެސް.ޓީ ބަޔާން ހުށަހަޅާއިރު، އެ އިންޕުޓް ޓެކުހަށް ނިސްބަތްވާ، އެ މާއްދާގައި ބަޔާންކޮށްފައިވާ ޓެކްސް އިންވޮއިސް އެ ފަރާތެއްގެ އަތުގައި އޮންނަންވާނެއެވެ.

85. ކްރެޑިޓް ނޯޓް އަދި ޑެބިޓް ނޯޓް އަތުގައި އޮތުން

ރަޖިސްޓަރީކޮށްފައިވާ ފަރާތެއްގެ އައުޓްޕުޓް ޓެކުހުގެ އަދަދުން އެއްވެސް އަދަދެއް އުނިކުރާނަމަ، އެ އުނިކުރުން ނިސްބަތްވާ ޓެކްސް ނެގޭ މުއްދަތުގެ ޖީ.އެސް.ޓީ ބަޔާން ހުށަހަޅާއިރު އެ ފަރާތެއްގެ އަތުގައި ޤާނޫނުގެ 44 ވަނަ މާއްދާއާ އެއްގޮތްވާ ގޮތުގެމަތިން ތައްޔާރުކުރެވިފައިވާ ކްރެޑިޓް ނޯޓެއް ނުވަތަ ޤާނޫނުގެ 45 ވަނަ މާއްދާއާ އެއްގޮތްވާ ގޮތުގެމަތިން ތައްޔާރުކުރެވިފައިވާ ޑެބިޓް ނޯޓެއް ނެތްނަމަ އެފަދަ އަދަދެއް އުންޏެއް ނުކުރެވޭނެއެވެ.

86. ޖީ.އެސް.ޓީ ބަޔާން ހުށަހެޅުމާނުލައި ފައިސާ ދެއްކުން

(ހ) ރަޖިސްޓަރީކޮށްފައިވާ ފަރާތަކަށް، އެ ފަރާތުން ޖީ.އެސް.ޓީ ބަޔާން ހުށަހެޅުމަށް ކަނޑައެޅިފައިވާ މުއްދަތު ހަމަވުމުގެ ކުރިން ޖީ.އެސް.ޓީ ބަޔާން ހުށަނޭޅިއްޖެނަމަ، އެ ފަރާތެއްގެ ނަމުގައި ބަހައްޓާގޮތަށް ފައިސާގެ އަދަދެއް މީރާއަށް ދެއްކިދާނެއެވެ.

(ށ) މި މާއްދާގެ (ހ) ގައިވާ ގޮތުގެމަތިން ރަޖިސްޓަރީކޮށްފައިވާ ފަރާތެއްގެ ނަމުގައި ބަހައްޓާ ފައިސާ ހަމައެކަނި އަޅައިކެނޑޭނީ، ރަޖިސްޓަރީކޮށްފައިވާ ފަރާތުން ޖީ.އެސް.ޓީ ބަޔާން ހުށަހެޅުމުން، އެ ބަޔާނުގައިވާ ޓެކުހުގެ އަދަދުންނެވެ.

(ނ) މި މާއްދާގެ (ށ) ގައިވާ ގޮތަށް އަދަދެއް އަޅައިކަނޑާލުމުން ޓެކުހުގެ ގޮތުގައި އިތުރަށް ފައިސާ ދެއްކިފައިވާނަމަ، އެ ފައިސާ އުނިކުރެވޭނީ ޖެހިގެން އަންނަ ޓެކްސް ނެގޭ މުއްދަތުގައި ދައްކަންޖެހޭ ޓެކުހުގެ އަދަދުންނެވެ. އަދި މިގޮތަށް އަޅައިކަނޑާލުމުން ޓެކުހުގެ ގޮތުގައި މަދުން ފައިސާ ދެއްކިފައިވާނަމަ، އެ މަދުވާ ބައި ދައްކަންވާނީ، އެ ޓެކްސް ދައްކަންޖެހޭ ދުވަހުން ފެށިގެން ފައިސާ ދައްކާ ޚަލާޞްކުރާ ދުވަހާ ހަމައަށް އެ މަދުވާ ބަޔަށްވާ ޖޫރިމަނާއާ އެކުގައެވެ.

(ރ) މި މާއްދާގެ (ހ) ގައި ބަޔާންކޮށްފައިވާ ޙާލަތުގައި ރަޖިސްޓަރީކޮށްފައިވާ ފަރާތުގެ ނަމުގައި ބަހައްޓާ ފައިސާ، ޓެކުހުގެ ގޮތުގައި ދައްކަންޖެހޭ އަދަދަށްވުރެ އިތުރު ވިޔަސް، އެ އިތުރުވާ ބަޔަކަށް އިންޓަރެސްޓެއް ނުދެވޭނެއެވެ.

87. އައުޓްޕުޓް ޓެކުހަށްވުރެ އިންޕުޓް ޓެކްސް އިތުރުވުން

(ހ) ޤާނޫނުގެ 32 ވަނަ މާއްދާގެ (ށ) ގެ ބޭނުމަށް، ރަޖިސްޓަރީކޮށްފައިވާ ފަރާތަކުން ހުށަހަޅާ ޖީ.އެސް.ޓީ ބަޔާނެއްގައި އައުޓްޕުޓް ޓެކުހަށްވުރެ އިންޕުޓް ޓެކްސް އިތުރުވާނަމަ، އެ ބަޔާނަކީ، އިތުރަށް ދެއްކޭ ޓެކްސް މީރާއިން އަނބުރައި ހޯދުމަށް ހުށަހެޅިފައިވާ ހުށަހެޅުމެއް ކަމުގައި ބެލެވޭނެއެވެ.

(ށ) ރަޖިސްޓަރީކޮށްފައިވާ ފަރާތަކަށް މުދާ ނުވަތަ ޚިދުމަތް ފޯރުވައިދޭ ރަޖިސްޓަރީކޮށްފައިވާ އެހެން ފަރާތަކުން، ދެ ފަރާތުގެ ދެމެދުގައި ހިނގި މުޢާމަލާތުތަކާ ގުޅޭ އެ ފަރާތުގެ އައުޓްޕުޓް ޓެކްސް މީރާއަށް ނުދައްކައި އޮޅުވާލައިފައިވާކަމަށް ނުވަތަ އޮޅުވާލައިފައި ވެދާނެކަމަށް މީރާއަށް ގަބޫލުކުރެވޭނަމަ، މުދާ ނުވަތަ ޚިދުމަތް ލިބިގަތް ފަރާތުގެ އައުޓްޕުޓް ޓެކުހަށްވުރެ އިންޕުޓް ޓެކްސް އިތުރުވާ އަދަދު ނުވަތަ އެއިން ބައެއް އަނބުރައި ނުދިނުމުގެ އިޚުތިޔާރު މީރާއަށް ލިބިގެންވެއެވެ. 

88. ރަޖިސްޓަރީ ބާޠިލުކޮށްދިނުމަށް އެދި ހުށަހެޅުމާއި ރަޖިސްޓަރީން އުނިކޮށްދިނުމަށް އެދި ހުށަހެޅުން

(ހ) ޤާނޫނުގެ 55 ވަނަ މާއްދާގެ ދަށުން ރަޖިސްޓަރީ ބާޠިލުކޮށްދިނުމަށް އެދި ހުށަހަޅާ ފަރާތްތަކުންނާއި، ޤާނޫނުގެ 58 ވަނަ މާއްދާގެ ދަށުން ރަޖިސްޓަރީން އުނިކޮށްދިނުމަށް އެދި ހުށަހަޅާ ފަރާތްތަކުން އެ ކަމަށް އެދި ހުށަހަޅަންވާނީ، "ރަޖިސްޓަރީން އުނިކުރުން" (MIRA 106) ފޯމު ފުރިހަމަކުރުމަށްފަހު، އެ ފޯމުގައި ކަނޑައަޅައިފައިވާ އެންމެހައި މަޢުލޫމާތާއި ލިޔެކިޔުންތަކާ އެކުގައެވެ.

(ށ) (އުނިކޮށްފައި).

(ނ) ޤާނޫނުގެ 55 ވަނަ މާއްދާގެ ދަށުން އެއްވެސް ފަރާތެއްގެ ރަޖިސްޓަރީ ބާޠިލުކޮށްފިނަމަ، ނުވަތަ ޤާނޫނުގެ 58 ވަނަ މާއްދާގެ ދަށުން އެއްވެސް ފަރާތެއް ރަޖިސްޓަރީން އުނިކޮށްފިނަމަ، މި ގަވާއިދުގެ 10 ވަނަ މާއްދާގެ ދަށުން އެ ފަރާތަކަށް ދޫކޮށްފައިވާ ޖީ.އެސް.ޓީ ރެޖިސްޓްރޭޝަން ސެޓުފިކެޓުތައް ބާޠިލުވާނެއެވެ. އަދި އެ ފަރާތަކީ އޮންލައިންކޮށް ވިޔަފާރި ހިންގާ ފަރާތަކަށްވާތީ ދޫކޮށްފައިވާ ލޯގޯ ވެސް ބާޠިލުވާނެއެވެ.

89. ޖީ.އެސް.ޓީ ނެގުން ހުއްޓާލަންޖެހޭ ތާރީޚު

(ހ) ޤާނޫނުގެ 55 ވަނަ މާއްދާގެ (ހ) ގެ (1) އަދި (2) ވަނަ ނަންބަރުގެ ދަށުން ރަޖިސްޓަރީ ބާޠިލުކޮށްދިނުމަށް އެދި ހުށަހަޅާ ފަރާތްތަކުން، ޤާނޫނާއި މި ގަވާއިދުގައިވާ ގޮތުގެމަތިން ޓެކްސް ނެގުން ހުއްޓާލަންވާނީ، މީރާއިން އެ ފަރާތުގެ ރަޖިސްޓަރީ ބާޠިލުކޮށްދޭ ދުވަހާ ޖެހިގެން އަންނަ ދުވަހުން ފެށިގެންނެވެ.

(ށ) ޤާނޫނުގެ 55 ވަނަ މާއްދާގެ (ހ) ގެ (3) ވަނަ ނަންބަރުގެ ދަށުން ރަޖިސްޓަރީ ބާޠިލުކޮށްދިނުމަށް އެދި ހުށަހަޅާ ފަރާތްތަކުން، ޤާނޫނާއި މި ގަވާއިދުގައިވާ ގޮތުގެމަތިން ޓެކްސް ނެގުން ހުއްޓާލަންވާނީ، އެ ފަރާތުން ހިންގަމުން ގެންދިޔަ، ޓެކްސް ނެގޭ ޙަރަކާތް ހިންގުން ހުއްޓާލާ ދުވަހާ ޖެހިގެން އަންނަ ދުވަހުން ފެށިގެންނެވެ.

90. އަމިއްލަ އިޚުތިޔާރުގައި ރަޖިސްޓަރީކުރާ ފަރާތްތަކުގެ ރަޖިސްޓަރީ ބާޠިލުކޮށްނުދިނުމުގެ އިޚުތިޔާރު

ޤާނޫނުގެ 53 ވަނަ މާއްދާގެ ދަށުން އަމިއްލަ އިޚުތިޔާރުގައި ރަޖިސްޓަރީކުރާ ފަރާތްތައް، އެ ފަރާތުން ޖީ.އެސް.ޓީ ނަގަން ފެށި ތާރީޚުން ފެށިގެން 2 (ދޭއް) އަހަރުދުވަސް ހަމަނުވަނީސް، އެ ފަރާތުން އެދުނު ކަމުގައިވިޔަސް، އެ ފަރާތުގެ ރަޖިސްޓަރީ ބާޠިލުކޮށްނުދިނުމުގެ އިޚުތިޔާރު ކޮމިޝަނަރ ޖެނެރަލްއަށް ލިބިގެންވެއެވެ.

91. ރަޖިސްޓަރީ ބާޠިލުކޮށްފިނަމަ އެ ވަގުތު އަތުގައި ހުރި މުދަލުން ޖީ.އެސް.ޓީ ދެއްކުން

ޤާނޫނުގެ 55 ވަނަ މާއްދާގެ (ރ) ގައި ބަޔާންކޮށްފައިވާ ފަރާތްތައް ފިޔަވައި، ރަޖިސްޓަރީކޮށްފައިވާ އެހެން އެއްވެސް ފަރާތެއްގެ ރަޖިސްޓަރީ ބާޠިލުކޮށްފިނަމަ، އެ ފަރާތެއްގެ އަތުގައި އެ ވަގުތު ހުރި މުދަލާ ގުޅިގެން އިންޕުޓް ޓެކުހުގެ ގޮތުގައި އުނިކޮށްފައިވާ އަދަދު އަނބުރައި މީރާއަށް ދައްކަންވާނެއެވެ.

92. ރިކޯޑު ބެލެހެއްޓުން

(ހ) ރަޖިސްޓަރީކޮށްފައިވާ ފަރާތްތަކުން ދައްކަންޖެހޭ ޓެކުހުގެ އަދަދަކީ ޞައްޙަ އަދަދެއްކަން ދައްކައިދިނުމުގެ ބޭނުމަށް، އަންނަނިވި ލިޔެކިޔުންތައް ބަލަހައްޓަންވާނެއެވެ.

(1) ރަޖިސްޓަރީކޮށްފައިވާ ފަރާތުން ތައްޔާރުކޮށްފައިވާ ޓެކްސް އިންވޮއިސްތަކާއި ރަސީދުތައް، އަދި އެ ފަރާތަށް ލިބިފައިވާ ޓެކްސް އިންވޮއިސްތަކާއި ރަސީދުތައް؛

(2) ކްރެޑިޓް ނޯޓް، ޑެބިޓް ނޯޓް، އަދި މިނޫނަސް ރަޖިސްޓަރީކޮށްފައިވާ ފަރާތަކުން ފޯރުވައިދިން ނުވަތަ ލިބިގަތް މުދަލެއްގެ ނުވަތަ ޚިދުމަތެއްގެ އަގަށް އުނިއިތުރެއް އައިކަން ދައްކުވައިދޭ ލިޔެކިޔުންތައް؛

(3) ކޮންމެ ޖީ.އެސް.ޓީ ބަޔާނެއްގައިވެސް އައުޓްޕުޓް ޓެކުހުގެ ގޮތުގައި ހިމަނާފައިވާ އަދަދުގެ ތަފުސީލު ދައްކުވައިދޭ ސްޓޭޓްމަންޓަކާއި، އިންޕުޓް ޓެކުހުގެ ގޮތުގައި ހިމަނާފައިވާ އަދަދުގެ ތަފުސީލު ދައްކުވައިދޭ ސްޓޭޓްމަންޓެއް؛

(4) މުދާ އިމްޕޯޓްކުރިކަން ނުވަތަ އެކްސްޕޯޓްކުރިކަން ސާބިތުކޮށްދޭ ލިޔެކިޔުންތައް؛

(5) ވިޔަފާރީގެ ބޭނުމަށް ނޫން އެހެން ބޭނުންތަކަށް ނުވަތަ ރަޖިސްޓަރީކޮށްފައިވާ ފަރާތުގެ އަމިއްލަ ބޭނުމަށް ހޯދާ މުދަލާއި ޚިދުމަތުގެ ތަފުސީލު، އަދި އަމިއްލަ ބޭނުމަށް ނަގާ ތަކެތީގެ ތަފުސީލު؛

(6) ހިލޭ ނުވަތަ ކޮމްޕްލިމެންޓަރީ އުސޫލުން ފޯރުވައިދޭ މުދަލާއި ޚިދުމަތުގެ ތަފުސީލު، އަދި ގެއްލޭ މުދަލާއި، ހަލާކުވާ މުދަލާއި، މުދާ ލިބިގަތް ފަރާތުން އަނބުރައި ރައްދުކުރާ މުދަލުގެ ތަފުސީލު؛

(7) ވިޔަފާރީގެ އެއްބަސްވުންތައް؛

(8) އެ ފަރާތަކުން ޖީ.އެސް.ޓީގެ ގޮތުގައި ދައްކަންޖެހޭ އަދަދު ހިސާބުކުރުމަށް ބޭނުންވާނެ އެހެނިހެން ލިޔެކިޔުންތައް.

(ށ) ރަޖިސްޓަރީކޮށްފައިވާ ފަރާތްތަކުން ބަލަހައްޓަންޖެހޭނެކަމަށް މި މާއްދާގެ (ހ) ގައި ބަޔާންކުރެވިފައިވާ ލިޔެކިޔުންތަކުގެ ލިސްޓަށް، ކޮމިޝަނަރ ޖެނެރަލް ޢާންމުކުރާ އެންގުމެއްގެ ދަށުން ބައެއް އިތުރު ކުރެވިދާނެއެވެ.

(ނ) މި މާއްދާގެ ދަށުން ބަލަހައްޓަންޖެހޭ ރަސީދުތަކާއި އެއާ ގުޅުންހުރި ލިޔެކިޔުންތައް ބަލަހައްޓަންވާނީ، ރަޖިސްޓަރީކޮށްފައިވާ ފަރާތުން ފޯރުވައިދިން މުދަލަކާ ނުވަތަ ޚިދުމަތަކާ ގުޅޭ ފައިސާ ލިބުނު ދުވަހާއި ލިބުނު ގޮތް މީރާއިން ބަލަން ބޭނުންވެއްޖެ ހިނދެއްގައި ފަސޭހަކަމާއެކު އެކަންކަން ބެލޭނެފަދަ ގޮތަކަށެވެ.

93. ލިޔެކިޔުން ހުށަހެޅުމަށް އެންގުން

(ހ) މި ގަވާއިދުގެ 92 ވަނަ މާއްދާގެ (ހ) ގައި ބަޔާންކޮށްފައިވާ ލިޔެކިޔުންތަކުގެ ތެރެއިން ލިޔެކިޔުމެއް މީރާއިން ބޭނުންވެއްޖެ ހިނދެއްގައި، މަދުވެގެން 7 (ހަތެއް) ދުވަހުގެ ނޯޓިސްއެއް ދިނުމަށްފަހު، އެ ނޯޓިސްގައި ބަޔާންކުރާ ލިޔެކިޔުންތައް މީރާއަށް ހުށަހެޅުމަށް ރަޖިސްޓަރީކޮށްފައިވާ ފަރާތަށް އެންގުމުގެ ބާރު ކޮމިޝަނަރ ޖެނެރަލްއަށް ލިބިގެންވެއެވެ.

(ށ) މި ގަވާއިދުގެ 92 ވަނަ މާއްދާގެ (ހ) ގައި ބަޔާންކޮށްފައިވާ ލިޔެކިޔުންތައް ފިޔަވައި އިތުރު ލިޔެކިޔުމެއް މީރާއިން ބޭނުންވެއްޖެ ހިނދެއްގައި، މަދުވެގެން 21 (އެކާވީސް) ދުވަހުގެ ނޯޓިސްއެއް ދިނުމަށްފަހު، އެ ނޯޓިސްގައި ބަޔާންކުރާ ލިޔެކިޔުންތައް މީރާއަށް ހުށަހެޅުމަށް ރަޖިސްޓަރީކޮށްފައިވާ ފަރާތަށް އެންގުމުގެ ބާރު ކޮމިޝަނަރ ޖެނެރަލްއަށް ލިބިގެންވެއެވެ.

94. ޖީ.އެސް.ޓީ ނެގުމުން އިސްތިސްނާވާ ފަރާތްތަކަށް ފޯރުވައިދޭ މުދަލާއި ޚިދުމަތާ ގުޅޭ ލިޔެކިޔުން

ޤާނޫނުގެ 20 ވަނަ މާއްދާގެ (ތ) ގެ ދަށުން، ޖީ.އެސް.ޓީ ނެގުމުން އެހެން ޤާނޫނަކުން އިސްތިސްނާކޮށްފައިވާ ފަރާތަކަށް މުދަލެއް ނުވަތަ ޚިދުމަތެއް ފޯރުވައިދީފިނަމަ، އެ ފަރާތަކީ އެ ޤާނޫނުގެ ދަށުން ޖީ.އެސް.ޓީ ދެއްކުމުން އިސްތިސްނާވާ ފަރާތެއްކަން މީރާއަށް ޔަޤީންކޮށްދެވޭ މިންވަރަށް ރަޖިސްޓަރީކޮށްފައިވާ ފަރާތުގެ އަތުގައި ލިޔެކިޔުން ބަހައްޓަންވާނެއެވެ.

95. ރިކޯޑް ބަލަހައްޓަންޖެހޭ މުއްދަތު، ބަސް އަދި ޓެކްސް ދައްކާ ފައިސާއަށް މުޢާމަލާތްތައް ބަދަލުކުރުން

(ހ) ރަޖިސްޓަރީކޮށްފައިވާ ފަރާތެއްގެ ޓެކުހާ ބެހޭ ރިކޯޑުތައް، އެ ރިކޯޑަކާ ގުޅޭ ޓެކްސް ނެގޭ މުއްދަތު ނިމޭ ތާރީޚުން ފެށިގެން 5 (ފަހެއް) އަހަރު ދުވަހުގެ މުއްދަތަށް އެ ފަރާތުން ބަލަހައްޓަންވާނެއެވެ. މިފަދަ ލިޔެކިޔުންތައް ތައްޔާރުކުރަންވާނީ ދިވެހި ބަހުން ނުވަތަ އިނގިރޭސި ބަހުންނެވެ.

(ށ) ރަޖިސްޓަރީކޮށްފައިވާ ފަރާތަކުން މި ގަވާއިދުގެ 77 ވަނަ މާއްދާގެ ދަށުން ޓެކްސް ބަޔާން ތައްޔާރުކުރުމުގައި، އެ ފަރާތުން ޖީ.އެސް.ޓީ ދައްކަންޖެހޭ ފައިސާގެ ގޮތުގައި ޤާނޫނުގެ 62 ވަނަ މާއްދާގައި ބަޔާންކޮށްފައިވާ ފައިސާ ފިޔަވައި އެހެން ފައިސާއަކުން ކުރާ މުޢާމަލާތްތައް، އެ ފަރާތުން ޓެކްސް ދައްކަންޖެހޭ ފައިސާއަށް ބަދަލުކުރަންވާނީ މޯލްޑިވްސް މަނިޓަރީ އޮތޯރިޓީއިން ޝާއިޢުކުރާ، އެ މުޢާމަލާތާ ގުޅޭގޮތުން ޖީ.އެސް.ޓީ ލާޒިމުވާ ދުވަހުގެ އެކްސްޗޭންޖް ރޭޓުގެ %2± ("ޕްލަސް އޯ މައިނަސް" ދޭއް އިންސައްތަ) އަށްވުރެ ތަފާތު ބޮޑުނޫން އެކްސްޗޭންޖް ރޭޓެއް ބޭނުންކޮށްގެންނެވެ.

(ނ) ރަޖިސްޓަރީކޮށްފައިވާ ފަރާތަކުން އެކްސްޗޭންޖް ރޭޓު ބެލުމުގައި ރިޢާޔަތްކުރަންވާނީ އެއް މަސްދަރަކަށެވެ.

(ރ) މި ގަވާއިދުގެ ބޭނުމަށް، މޯލްޑިވްސް މަނިޓަރީ އޮތޯރިޓީ އިން ރޭޓު ޝާއިޢުކޮށްފައި ނުވާ ދުވަހެއްގެ ރިފަރެންސް ރޭޓަކީ އެ ދުވަހުގެ ކުރިން އެންމެ ފަހުން ޝާއިޢުކޮށްފައިވާ ރޭޓެވެ.

96. އިލެކްޓްރޯނިކް ފޯމެޓެއްގައި ރިކޯޑު ބެލެހެއްޓުން

ރަޖިސްޓަރީކޮށްފައިވާ ފަރާތެއްގެ ޓެކުހާ ގުޅޭ ރިކޯޑުތައް އިލެކްޓްރޯނިކް ފޯމެޓެއްގައި ބެހެއްޓޭނީ އަންނަނިވި ޝަރުޠުތައް ފުރިހަމަވާނަމައެވެ.

(ހ) މީރާއިން ބޭނުންވެއްޖެ ހިނދެއްގައި އެ ލިޔެކިޔުންތައް ކަރުދާހަށް ޕްރިންޓްކުރެވުން؛

(ށ) ލިޔެކިޔުން ކަރުދާހަށް ޕްރިންޓްކުރާނަމަ، އެ ލިޔެކިޔުން ތައްޔާރުކުރެވުނު ތާރީޚު އެނގެން އޮތުން؛

(ނ) އެ ފަރާތުން ދައްކަންޖެހޭ ޖީ.އެސް.ޓީގެ އަދަދު ހިސާބުކުރުމަށް މީރާއިން ބޭނުންވެއްޖެ ހިނދެއްގައި އެ ލިޔެކިޔުންތައް ފަސޭހަކަމާއެކު ހޯދައި ބެލޭގޮތަށް ހުރުން؛

(ރ) އެއް ފޯމެޓުން އަނެއް ފޯމެޓަށް ބަދަލުކުރާއިރު އެ ބަދަލުކުރެވުނު ލިޔެކިއުންތައް އޭގެ އަސްލާއި އެއްގޮތްކަން ޔަގީންކުރެވުން؛

(ބ) ހުއްދަ ލިބިފައިވާ ފަރާތްތައް ފިޔަވައި އެހެން އެއްވެސް ފަރާތަކަށް އެ ލިޔެކިޔުންތަކަށް ބަދަލެއް ނުގެނެވުން؛

(ޅ) ލިޔެކިޔުންތައް ބަލަހައްޓާ ސޮފްޓްވެއަރ އަށް ގެންނަ ބަދަލަކާ ގުޅިގެން ނުވަތަ އަޕްގްރޭޑަކާ ގުޅިގެން، އޭގެ ކުރިން ތައްޔާރުކޮށްފައިވާ ލިޔެކިޔުންތަކަށް ބަދަލު ނައުން؛

(ކ) ލިޔެކިޔުންތައް ބަލަހައްޓާ ސޮފްޓްވެއަރ ގެ ނުވަތަ ލިޔެކިޔުންތަކުގެ ސޮފްޓް ކޮޕީގެ ބެކަޕް އެކަށީގެންވާ ފެންވަރެއްގައި ބެހެއްޓުން؛

(އ) އެ ލިޔެކިޔުންތަކާގުޅޭ އޮޑިޓް ލޮގް ރިޕޯޓެއް ނެގޭގޮތަށް ހުރުން؛

(ވ) އެ ފަރާތުގެ "ޕްރޮގްރާމް ޑޮކިއުމެންޓޭޝަން" ހޯދުމަށް މީރާއިން އެދިއްޖެނަމަ އެ މަޢުލޫމާތު މީރާއަށް ފޯރުވައިދިނުން.

97. ރިކޯޑުތައް ބަހައްޓަންޖެހޭ ތަން

ރަޖިސްޓަރީކޮށްފައިވާ ފަރާތެއްގެ ޓެކުހާ ބެހޭ ރިކޯޑުތައް ބަހައްޓަންވާނީ ދިވެހިރާއްޖޭގައި އެފަރާތެއް ޢާންމުކޮށް ވިޔަފާރި ހިންގުމަށް ބޭނުންކުރާ ތަނެއްގައެވެ.

98. ކޮޕީ ހަދައިދިނުން

ޤާނޫނުގެ 47 ވަނަ މާއްދާގެ ބޭނުމަށް،

(ހ) ލިޔުމެއްގެ އަސްލުގެ ކޮޕީއެއްގައި، ފާޅުކަންބޮޑު ގޮތެއްގައި ފެންނާނެހެން "ކޮޕީ" މިހެން ލިޔެފައި އޮންނަންވާނެއެވެ؛

(ށ) ލިޔުމެއްގެ އަސްލުގެ ކޮޕީއެއްގައި، އެއީ އެ ލިޔުމުގެ އަސްލާ އެއްގޮތް ކޮޕީއެއްކަން އެނގޭނެހެން ލިޔެފައި އޮންނަންވާނެއެވެ؛

(ނ) ރަޖިސްޓަރީކޮށްފައިވާ ފަރާތަކުން ލިޔުމެއްގެ ކޮޕީ ދޫކުރާނަމަ މި މާއްދާގެ (ށ) ގައި ބަޔާންކޮށްފައިވާ ލިޔުންކޮޅުގައި އެ ފަރާތުން ސޮއިކުރަންވާނެއެވެ. ރަޖިސްޓަރީކޮށްފައިވާ ފަރާތަކީ ފަރުދެއް ނޫންނަމަ، އެ ފަރާތެއްގެ ޖީ.އެސް.ޓީ ބަޔާންތަކުގައި ސޮއިކުރުމަށް ހުއްދަދެވިފައިވާ ފަރާތަކުން އެ ލިޔުންކޮޅުގައި ސޮއިކުރަންވާނެއެވެ. އަދި؛

(ރ) ރަޖިސްޓަރީކޮށްފައިވާ ފަރާތަކީ ފަރުދެއް ނޫންނަމަ، މި މާއްދާގެ (ށ) ގައި ބަޔާންކޮށްފައިވާ ލިޔުންކޮޅުގައި އެ ފަރާތެއްގެ ސިއްކަ ނުވަތަ ރަސްމީ ތައްގަނޑު ޖަހަންވާނެއެވެ.

99. ކަޓޯފް ތާރީޚު

(ހ) ޤާނޫނުގެ ބޭނުމަށް ކަޓޯފް ތާރީޚުކަމަށް ބެލެވޭނީ 2 އޮކްޓޯބަރު 2011 ގެ 00:00 (ސުން ގަޑި ސުން މިނެޓު) އެވެ. މި ވަގުތުގެ ފަހުން ފޯރުވައިދެވޭ މުދަލާއި ޚިދުމަތަށް ޤާނޫނުގައިވާ ގޮތުގެމަތިން، އަދި ޖީ.އެސް.ޓީ ލާޒިމުވާ ވަގުތު ކަނޑައަޅާ އުސޫލުތަކުގެ މައްޗަށް ބިނާކޮށް، މި މާއްދާގެ (ށ) އަދި (ނ) ގައިވާ ގޮތުގެމަތިން ޖީ.އެސް.ޓީ ނަގަންވާނެއެވެ.

(ށ) ރަޖިސްޓަރީކޮށްފައިވާ ފަރާތަކީ 24 ގަޑިއިރު ވިޔަފާރިކުރުމުގެ ހުއްދަ ދައުލަތުގެ މުއައްސަސާއަކުން ދޫކޮށްފައިވާ ފަރާތެއް ކަމުގައިވާނަމަ، ނުވަތަ 24 ގަޑިއިރު ވިޔަފާރިކުރާ ފަރާތެއް ކަމުގައިވާނަމަ، ޖީ.އެސް.ޓީ ނަގަންވާނީ މި މާއްދާގެ (ހ) ގައި ބަޔާންކޮށްފައިވާ ވަގުތުން ފެށިގެންނެވެ.

(ނ) މި މާއްދާގެ (ށ) ގައި ނުހިމެނޭ ފަރާތްތަކުން ޖީ.އެސް.ޓީ ނަގަންވާނީ 2 އޮކްޓޯބަރު 2011 ވަނަ ދުވަހު އެ ފަރާތެއްގެ ވިޔަފާރި ފަށާ ވަގުތުން ފެށިގެންނެވެ.

(ނ) މި ގަވާއިދުގައި އެހެން ގޮތަކަށް ބަޔާންކޮށްފައި އޮތްނަމަވެސް، ޤާނޫނުގެ 16 ވަނަ މާއްދާގައި ބަޔާންކޮށްފައިވާ ދާއިރާތަކުގެ މުދަލާއި ޚިދުމަތްތައް ފޯރުވައިދޭ ފަރާތްތަކުން، ޤާނޫނަށް ޢަމަލުކުރަން ފަށާ ދުވަހުގެ ކުރިން މުދަލެއް ނުވަތަ ޚިދުމަތެއް ފޯރުވައިދީފައިވާނަމަ، އެ މުޢާމަލާތަށް ޓެކްސް އިންވޮއިސް ތައްޔާރުކުރަނީ ނުވަތަ އެ މުޢާމަލާތުގެ އަގު ނުވަތަ އެއިން ބައެއް އަދާކުރަނީ ޤާނޫނަށް ޢަމަލުކުރަން ފަށާ ދުވަހު ނުވަތަ އޭގެ ފަހުން ކަމުގައިވާނަމަ، އެ މުޢާމަލާތަކުން ޖީ.އެސް.ޓީ އެއް ނުނެގޭނެއެވެ.

100. ޤާނޫނު ތަޞްދީޤުކުރުމުގެ ކުރިން ކުރެވިފައިވާ މުޢާމަލާތްތައް

(ހ) ޤާނޫނުގެ 17 ވަނަ މާއްދާގެ (ހ) އަދި (ށ) ގައި އެހެން ބަޔާންކޮށްފައި އޮތްނަމަވެސް، ޤާނޫނު ނަންބަރު 19/2010 (ޓޫރިސްޓް ޚިދުމަތްދޭ ތަންތަނުން ވިއްކާ ތަކެއްޗާއި ދޭ ޚިދުމަތުގެ އަގުން ޓެކްސް ނެގުމުގެ ޤާނޫނު) ގެ ދަށުން މީރާގައި ރަޖިސްޓަރީކޮށްފައިވާ ފަރާތެއް ފިޔަވައި އެހެން ފަރާތަކުން މުދަލެއް ނުވަތަ ޚިދުމަތެއް ފޯރުވައިދިނުމަށް ޤާނޫނު ތަޞްދީޤުކުރުމުގެ ކުރިން އެއްބަސްވުމެއްގައި ސޮއިކޮށްފައިވާނަމަ، އަދި އެ މުޢާމަލާތްކުރެވުނީ ރަޖިސްޓަރީކޮށްފައިވާ ފަރާތުގެ ވިޔަފާރީގެ ޢާންމު އުސޫލުން ކަމުގައިވާނަމަ، އަދި ޤާނޫނު ތަޞްދީޤުކުރުމުގެ ކުރިން އެ އެއްބަސްވުމުގެ ޢަމަލީ މަސައްކަތް ފެށިފައިވާނަމަ، އެ މުޢާމަލާތަށް ޓެކްސް އިންވޮއިސް ތައްޔާރުކުރެވުނީ ނުވަތަ އެ މުޢާމަލާތުގެ އަގު ނުވަތަ އެއިން ބައެއް އަދާކުރެވުނީ ޤާނޫނަށް ޢަމަލުކުރަން ފަށާ ތާރީޚުން ފެށިގެން 1 (އެކެއް) އަހަރުދުވަހުގެ ތެރޭގައި ކަމުގައިވާނަމަ، އެ މުޢާމަލާތަށް ޖީ.އެސް.ޓީ ދައްކާކަށް ނުޖެހޭނެއެވެ.

(ށ) މި ގަވާއިދުގެ 52 ވަނަ މާއްދާގައި އެހެން ބަޔާންކޮށްފައި އޮތްނަމަވެސް، ޤާނޫނު ނަންބަރު 19/2010 (ޓޫރިސްޓް ޚިދުމަތްދޭ ތަންތަނުން ވިއްކާ ތަކެއްޗާއި ދޭ ޚިދުމަތުގެ އަގުން ޓެކްސް ނެގުމުގެ ޤާނޫނު) ގެ ދަށުން މީރާގައި ރަޖިސްޓަރީކޮށްފައިވާ ފަރާތަކުން، ޤާނޫނު ތަޞްދީޤުކުރެވުނު ދުވަހުގެ ކުރިން، އެ ފަރާތުގެ ވިޔަފާރީގެ ޢާންމު އުސޫލުން ވެފައިވާ އެއްބަސްވުމެއްގައި، އެ ފަރާތުން މުދާ ނުވަތަ ޚިދުމަތް ފޯރުވައިދޭ އަގުން އެ ޤާނޫނުގެ ދަށުން ނަގަންޖެހޭ ޓެކުހުގެ އަދަދު ހިސާބުކޮށްފައިވަނީ އަގުގެ ތެރޭގައި ސަރވިސް ޗާޖު ނުހިމަނައި ކަމުގައިވާނަމަ، އަދި ޤާނޫނު ތަޞްދީޤުކުރުމުގެ ކުރިން އެ އެއްބަސްވުމުގެ ޢަމަލީ މަސައްކަތް ފެށިފައިވާނަމަ، ޤާނޫނަށް ޢަމަލުކުރަން ފަށާ ތާރީޚުން ފެށިގެން 1 (އެކެއް) އަހަރުދުވަހުގެ ތެރޭގައި އެ އެއްބަސްވުމުގެ ދަށުން ކުރެވޭ މުޢާމަލާތްތަކުގައި ހިމެނޭ ސަރވިސް ޗާޖުން ޖީ.އެސް.ޓީ ދައްކާކަށް ނުޖެހޭނެއެވެ.

(ނ) ރަޖިސްޓަރީކޮށްފައިވާ ފަރާތަކުން ކުރާ މުޢާމަލާތަކަށް މި މާއްދާގެ (ހ) އަދި (ށ) ގެ ދަށުން ޖީ.އެސް.ޓީ ދައްކަން ނުޖެހޭނަމަ، މީރާއިން ބޭނުންވެއްޖެ ޙާލަތެއްގައި އެ މުޢާމަލާތަކީ އެ ފަރާތުގެ ވިޔަފާރީގެ ޢާންމު އުސޫލުން ކުރެވިފައިވާ މުޢާމަލާތެއްކަން މީރާއަށް ސާބިތުކޮށްދޭން ވާނެއެވެ.

101. ޤާނޫނު ތަޞްދީޤުކުރެވުނު ދުވަހާއި ޤާނޫނަށް ޢަމަލުކުރަން ފަށާ ދުވަހާ ދެމެދުގެ މުއްދަތުގައި ހިންގޭ މުޢާމަލާތްތައް

(ހ) ޤާނޫނު ތަޞްދީޤުކުރެވުނު ދުވަހާއި ޤާނޫނަށް ޢަމަލުކުރަން ފަށާ ދުވަހާ ދެމެދުގެ މުއްދަތުގައި، ޖީ.އެސް.ޓީ ދެއްކުމުގެ ޒިންމާއިން އެއްކިބާވުމުގެ ނިޔަތުގައި، ރަޖިސްޓަރީކޮށްފައިވާ ފަރާތުން އެއްވެސް މުޢާމަލާތެއް ހިންގުމަކީ ކުށެކެވެ.

(ށ) މީރާއިން އެދިއްޖެ ޙާލަތެއްގައި، މީރާއިން އަންގާ މުއްދަތެއްގެ ތެރޭގައި، ރަޖިސްޓަރީކޮށްފައިވާ ފަރާތުން އަންނަނިވި ތަފުސީލުތައް މީރާއަށް ހުށަހަޅަންވާނެއެވެ.

(1) ޤާނޫނު ފާސްކުރެވުނު ދުވަހާއި ޤާނޫނަށް ޢަމަލުކުރަން ފަށާ ދުވަހާ ދެމެދުގެ މުއްދަތުގައި ލިބިފައިވާ އެޑްވާންސް ޕޭމަންޓް ނުވަތަ ޑިޕޮސިޓް ނުވަތަ އެ މުއްދަތުގައި ސޮއިކޮށްފައިވާ ކޮންޓްރެކްޓް ނުވަތަ ތައްޔާރުކޮށްފައިވާ ޓެކްސް އިންވޮއިސް ނިސްބަތްވަނީ ޤާނޫނަށް ޢަމަލުކުރަން ފަށާ ތާރީޚުގެ ފަހުން ފޯރުވައިދެވޭ މުދަލަކަށް ނުވަތަ ޚިދުމަތަކަށް ކަމުގައިވާނަމަ، އެފަދަ އެޑްވާންސް ޕޭމަންޓްތަކާއި ޑިޕޮސިޓްތަކާއި ކޮންޓްރެކްޓްތަކާއި ޓެކްސް އިންވޮއިސްތަކުގެ ތަފުސީލު؛

(2) ޤާނޫނު ފާސްކުރެވުނު ދުވަހާއި ޤާނޫނަށް ޢަމަލުކުރަން ފަށާ ދުވަހާ ދެމެދުގެ މުއްދަތު ދިމާވާ 2010 ވަނަ އަހަރުގެ ހަމަ އެ މުއްދަތުގައި ލިބިފައިވާ އެޑްވާންސް ޕޭމަންޓް ނުވަތަ ޑިޕޮސިޓް ނުވަތަ އެ މުއްދަތުގައި ސޮއިކޮށްފައިވާ ކޮންޓްރެކްޓް ނުވަތަ ތައްޔާރުކޮށްފައިވާ އިންވޮއިސް ނިސްބަތްވަނީ 2 އޮކްޓޯބަރ 2010 ގެ ފަހުން ފޯރުވައިދެވޭ މުދަލަކަށް ނުވަތަ ޚިދުމަތަކަށް ކަމުގައިވާނަމަ، އެފަދަ އެޑްވާންސް ޕޭމަންޓްތަކާއި ޑިޕޮސިޓްތަކާއި ކޮންޓްރެކްޓްތަކާއި ޓެކްސް އިންވޮއިސްތަކުގެ ތަފުސީލު.

(ނ) ރަޖިސްޓަރީކޮށްފައިވާ ފަރާތަކުން، ޤާނޫނު ތަޞްދީޤު ކުރެވުނު ދުވަހު ނުވަތަ އޭގެ ފަހުން މުދަލެއް ނުވަތަ ޚިދުމަތެއް ފޯރުވައިދީފިނަމަ، އަދި ޤާނޫނަށް ޢަމަލުކުރަން ފަށާއިރު އެ މުޢާމަލާތުގެ ޖުމުލަ އަގަށް ޓެކްސް އިންވޮއިސް ތައްޔާރުކޮށްފައި ނުވާނަމަ ނުވަތަ އެ މުޢާމަލާތުގެ ޖުމުލަ އަގު ލިބިފައިނުވާނަމަ، ޓެކްސް އިންވޮއިސް ތައްޔާރުކޮށްފައިނުވާ އަދަދު ނުވަތަ އަގު ނުލިބިވާ ނިސްބަތުން އެ މުޢާމަލާތަކަށް ޖީ.އެސް.ޓީ ދައްކަންވާނެއެވެ.

102. ޓީ.ޖީ.އެސް.ޓީ އަށް ރަޖިސްޓަރީކޮށްފައިވާ ފަރާތްތަކުގެ ސެޕްޓެމްބަރ 2011 ގެ ޓެކްސް ބަޔާން

(ހ) ޤާނޫނު ނަންބަރު 19/2010 (ޓޫރިސްޓް ޚިދުމަތްދޭ ތަންތަނުން ވިއްކާ ތަކެއްޗާއި ދޭ ޚިދުމަތުގެ އަގުން ޓެކްސް ނެގުމުގެ ޤާނޫނު) ގެ ދަށުން ރަޖިސްޓަރީކޮށްފައިވާ ފަރާތަކުން އެ ޤާނޫނުގެ 13 ވަނަ މާއްދާގެ ދަށުން 2011 ވަނަ އަހަރުގެ ސެޕްޓެމްބަރ މަހަށް ހުށަހަޅަންޖެހޭ ޓެކްސް ބަޔާން ހުށަހަޅަންވާނީ، އެ ޓެކްސް ނެގޭ މުއްދަތު ފެށޭ ތާރީޚަކީ 1 ސެޕްޓެމްބަރ 2011 ކަމަށް އަދި ނިމޭ ތާރީޚަކީ 1 އޮކްޓޯބަރ 2011 ކަމަށް ބަލައި، 28 އޮކްޓޯބަރ 2011 ގެ ނިޔަލަށެވެ.

(ށ) މި މާއްދާގެ (ހ) ގެ ދަށުން ޓެކްސް ބަޔާން ހުށަހެޅުމުގެ ނަތީޖާއަކީ ޤާނޫނު ނަންބަރު 19/2010 ގެ ދަށުން ރަޖިސްޓަރީކޮށްފައިވާ ފަރާތުން 2011 ވަނަ އަހަރުގެ އޮކްޓޯބަރ މަހަށް އެ ޤާނޫނުގެ ދަށުން ވަކިން ޓެކްސް ބަޔާނެއް ހުށަހަޅަން ނުޖެހުމެވެ.

103. ސޮފްޓްވެއަރ ބޭނުން ނުކޮށް ރިކޯޑުތައް ބަލަހައްޓާ ފަރާތްތަކަށް ދެވޭ ލުއި

މި ގަވާއިދުގައި އެހެން ގޮތަކަށް ބަޔާންކޮށްފައިވީނަމަވެސް، ރަޖިސްޓަރީކޮށްފައިވާ ފަރާތެއްގެ ރިކޯޑުތައް ބަލަހައްޓަނީ ސޮފްޓްވެއަރ ބޭނުންކޮށްގެން ކަމުގައި ނުވާނަމަ، އެ ފަރާތެއްގެ ރިކޯޑުތައް ބަލަހައްޓަންވާނީ މީރާއިން ކަނޑައަޅާ ނަމޫނާއަކާ އެއްގޮތަށެވެ.

104. ދިވެހިރާއްޖޭގައި ފޯރުވައިދޭ މުދަލާއި ޚިދުމަތް

ޤާނޫނުގެ ބޭނުމަށް، މުދަލެއް ނުވަތަ ޚިދުމަތެއް ފޯރުވައިދެވެނީ ދިވެހިރާއްޖޭގައި ކަމަށް ބެލެވޭނީ އަންނަނިވި އުސޫލުތަކަށް ރިޢާޔަތްކޮށެވެ.

(ހ) މުދާ ވިއްކާ ވަގުތު، އެ މުދާ ފޯރުވައިދޭ ފަރާތާއި އެ މުދާ ލިބިގަންނަ ފަރާތް ހުރީ ދިވެހިރާއްޖޭގައިނަމަ، އެ މުދާ ފޯރުވައިދެވެނީ ދިވެހިރާއްޖޭގައި ކަމުގައި ބެލެވޭނެއެވެ.

(ށ) ޚިދުމަތް ދޭ ވަގުތު، އެ ޚިދުމަތް ދޭ ފަރާތް ހުރީ ދިވެހިރާއްޖޭގައިނަމަ، އެ ޚިދުމަތް ފޯރުވައިދެވެނީ ދިވެހިރާއްޖޭގައި ކަމުގައި ބެލެވޭނެއެވެ.

(ނ) މި މާއްދާގެ (ހ) އާއި (ށ) ގައި އެހެން ބަޔާންކޮށްފައި އޮތް ނަމަވެސް، އަންނަނިވި ހާލަތްތަކުގައި މުދާ ނުވަތަ ޚިދުމަތް ފޯރުވައިދެވެނީ ދިވެހިރާއްޖޭގައި ކަމުގައި ބެލެވޭނެއެވެ.

(1) މުދާ ވިއްކާ ވަގުތު އެ މުދާ ދިވެހިރާއްޖޭގައި ހުރުން؛ ނުވަތަ

(2) ޚިދުމަތެއް ނުވަތަ އެއިން ބައެއް ދިނީ އެ ޚިދުމަތް ދެވުނުއިރު ދިވެހިރާއްޖޭގައި ހުރި ފަރާތެއް މެދުވެރިކޮށް ކަމުގައި ވުން؛ ނުވަތަ

(3) މުދާ ނުވަތަ ޚިދުމަތް ނުވަތަ އެއިން ބައެއް ފޯރުވައިދިނީ އެ ފަރާތުން ދިވެހިރާއްޖޭގައި ހިންގާ ޓެކްސް ނެގޭ ހަރަކާތުން ނުވަތަ ޓެކްސް ނެގޭ ހަރަކާތް މެދުވެރިކޮށް ކަމުގައިވުން؛ ނުވަތަ

(4) މުދާ ނުވަތަ ޚިދުމަތް ފޯރުވައިދޭ ފަރާތުގެ މުވައްޒަފަކު ނުވަތަ އެ ފަރާތް ތަމްސީލުކުރާ އެހެން ފަރާތެއް، އެ ޚިދުމަތް ފޯރުވައިދިނުމުގެ މަސައްކަތުގައި ދިވެހިރާއްޖޭގައި ހުރުން.

104-1. ދިވެހިރާއްޖޭގައި ހުރި ފަރާތެއްކަން ބަލާނެގޮތް

(ހ)

(1) ކުންފުންޏެއް ނުވަތަ އެހެން އިންކޯޕަރޭޓެޑް ބޮޑީއެއް އިންކޯޕަރޭޓްކޮށްފައިވަނީ ދިވެހިރާއްޖޭގައިނަމަ، ނުވަތަ އެ ކުންފުނީގެ ހެޑް އޮފީސް ހުރީ ދިވެހިރާއްޖޭގައިނަމަ، ނުވަތަ އެ ކުންފުނީގެ ހިންގުމާއި ކޮންޓްރޯލް އޮތީ ދިވެހިރާއްޖޭގައިނަމަ، ޤާނޫނުގެ ބޭނުމަށް އެއީ ދިވެހިރާއްޖޭގައި ހުރި ފަރާތެއް ކަމުގައި ބެލެވޭނެއެވެ.

(2) ޕާޓްނަރޝިޕެއް ނުވަތަ އެހެން އަންއިންކޯޕަރޭޓެޑް ބޮޑީއެއް ޤާއިމުކޮށްފައިވަނީ ދިވެހިރާއްޖޭގައިނަމަ، ނުވަތަ އެ ޕާޓްނަރޝިޕް ނުވަތަ އަންއިންކޯޕަރޭޓެޑް ބޮޑީ އުފައްދައިފައިވަނީ ދިވެހިރާއްޖޭގައިނަމަ، ނުވަތަ އެ ޕާޓްނަރޝިޕްގެ ނުވަތަ އަންއިންކޯޕަރޭޓެޑް ބޮޑީގެ ހިންގުމާއި ކޮންޓްރޯލް އޮތީ ދިވެހިރާއްޖޭގައިނަމަ، ޤާނޫނުގެ ބޭނުމަށް އެއީ ދިވެހިރާއްޖޭގައި ހުރި ފަރާތެއް ކަމުގައި ބެލެވޭނެއެވެ.

(3) ދާއިމީކޮށް ދިރިއުޅޭ ތަން ދިވެހިރާއްޖޭގައި ހުރި ފަރުދެއްނަމަ، ނުވަތަ މީލާދީ ކަލަންޑަރު އަހަރެއްގެ ތެރޭގައި ފެށޭ ނުވަތަ ނިމޭ 12 (ބާރަ) މަސްދުވަހުގެ ތެރޭގައި 183 (އެއްސަތޭކަ އައްޑިހަ ތިނެއް) ދުވަހު ދިވެހިރާއްޖޭގައި ހުރެފައިވާ ނުވަތަ ހުންނަން ގަސްތުކުރާ ފަރުދެއްނަމަ، ޤާނޫނުގެ ބޭނުމަށް އެއީ ދިވެހިރާއްޖޭގައި ހުރި ފަރާތެއް ކަމުގައި ބެލެވޭނެއެވެ.

(3-1) މި މާއްދާގެ (ހ) ގެ (3) ވަނަ ނަންބަރުގައި އެހެން ބަޔާންކޮށްފައި އޮތް ނަމަވެސް، މުދާ ނުވަތަ ޚިދުމަތް ފޯރުވައިދޭ ވަގުތު ދިވެހިރާއްޖޭގައި ފިޒިކަލީ ހުރި ފަރުދެއްނަމަ، ޤާނޫނުގެ ބޭނުމަށް އެއީ ދިވެހިރާއްޖޭގައި ހުރި ފަރާތެއް ކަމުގައި ބެލެވޭނެއެވެ.

(4) ދިވެހި ދައުލަތުގެ އޮފީހެއްނަމަ، ޤާނޫނުގެ ބޭނުމަށް އެއީ ދިވެހިރާއްޖޭގައި ހުރި ފަރާތެއް ކަމުގައި ބެލެވޭނެއެވެ.

(ށ) (އުނިކޮށްފައި). 

105. ޓެކްސް ނެގޭ ޙަރަކާތް

ޤާނޫނުގެ ބޭނުމަށް، ޓެކްސް ނެގޭ ޙަރަކާތުގެ ތެރޭގައި، ވިޔަފާރި ވިއްކާލުމާއި ވިޔަފާރި ގާއިމުވުމުގެ ކުރިން ހުއްޓާލުންވެސް ހިމެނޭނޭހެން، ވިޔަފާރިއެއް ފެށުމާ ގުޅޭގޮތުން ނުވަތަ ހުއްޓާލުމާ ގުޅޭގޮތުން ހިންގޭ އެންމެހައި ކަންކަން ހިމެނެއެވެ.          

105-1. މެދުކެނޑުމެއްނެތި ނުވަތަ ދާއިމީ ސިފައެއްގައި ހިންގާ ވިޔަފާރި

(ހ) ޤާނޫނުގެ 13 ވަނަ މާއްދާގެ (ހ) ގެ ބޭނުމަށް، މެދުކެނޑުމެއްނެތި ނުވަތަ ދާއިމީ ސިފައެއްގައި މުދަލެއް ނުވަތަ ޚިދުމަތެއް  ފޯރުކޮށްދިނުމަށް ޓަކައި ހިންގާ ވިޔަފާރީގެ ތެރޭގައި އަންނަނިވި ކަންކަން ހިމެނެއެވެ.

(1) ޤާނޫނު ނަންބަރު 18/2014 (ވިޔަފާރި ރަޖިސްޓަރީކުރުމުގެ ޤާނޫނު) ގެ ދަށުން ރަޖިސްޓަރީކުރަންޖެހޭ ނުވަތަ ރަޖިސްޓަރީކޮށްފައިވާ ފަރާތަކުން މުދަލެއް ނުވަތަ ޚިދުމަތެއް ފޯރުކޮށްދިނުން؛ 

(2) ޤާނޫނު ނަންބަރު 10/96 (ދިވެހިރާއްޖޭގެ ކުންފުންޏާބެހޭ ޤާނޫނު) ގެ ދަށުން ރަޖިސްޓަރީކޮށްފައިވާ ކުންފުންޏަކުން މުދަލެއް ނުވަތަ ޚިދުމަތެއް ފޯރުކޮށްދިނުން؛

(3) ޤާނޫނު ނަންބަރު 13/2011 (ޕާޓްނަރޝިޕްގެ ޤާނޫނު) ގެ ދަށުން ރަޖިސްޓަރީކޮށްފައިވާ ޕާޓްނަރޝިޕަކުން މުދަލެއް ނުވަތަ ޚިދުމަތެއް ފޯރުކޮށްދިނުން؛

(4) ޤާނޫނު ނަންބަރު 3/2007 (ކޯޕަރޭޓިވް ސޮސައިޓީގެ ޤާނޫނު) ގެ ދަށުން ރަޖިސްޓަރީކޮށްފައިވާ ކޯޕަރޭޓިވް ސޮސައިޓީއަކުން މުދަލެއް ނުވަތަ ޚިދުމަތެއް ފޯރުކޮށްދިނުން؛

(5) ޤާނޫނު ނަންބަރު 25/2019 (އާމްދަނީން ޓެކްސް ނެގުމުގެ ޤާނޫނު) ގެ 79 ވަނަ މާއްދާގެ (ހވ) ގައި މާނަކޮށްދީފައިވާ ފަދަ ދާއިމީ މަރުކަޒެއް މެދުވެރިކޮށް މުދަލެއް ނުވަތަ ޚިދުމަތެއް ފޯރުކޮށްދިނުން؛

(6) ޤާނޫނު ނަންބަރު 25/2019 (އާމްދަނީން ޓެކްސް ނެގުމުގެ ޤާނޫނު) ގެ 79 ވަނަ މާއްދާގެ (ށނ) ގެ (2) ވަނަ ނަންބަރުގައި މާނަކޮށްދީފައިވާ ފަދަ ޕާޓްނަރޝިޕަކުން މުދަލެއް ނުވަތަ ޚިދުމަތެއް ފޯރުކޮށްދިނުން؛

(7) ޓޫރިޒަމާބެހޭ މިނިސްޓްރީން ހިންގުމުގެ ހުއްދައެއް ލިބިގެން ހިންގާ ތަނަކުން ނުވަތަ އުޅަނދަކުން، ނުވަތަ ހިންގުމުގެ ހުއްދައެއް ނަގައިގެން ހިންގަންޖެހޭ ތަނަކުން ނުވަތަ އުޅަނދަކުން، ނުވަތަ ޗާޓަރ ލައިސަންސް ލިބިގެން ދުއްވައި ބަނދަރުކުރާ އުޅަނދަކުން، ނުވަތަ ދުއްވައި ބަނދަރުކުރުމަށް ޗާޓަރ ލައިސަންސް ނަގަންޖެހޭ އުޅަނދަކުން، މުދަލެއް ނުވަތަ ޚިދުމަތެއް ފޯރުކޮށްދިނުން.

(ށ) މި މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، އަންނަނިވި ހާލަތްތަކުގައި އެއީ ޤާނޫނުގެ 13 ވަނަ މާއްދާގެ (ހ) ގެ ބޭނުމަށް، މެދުކެނޑުމެއްނެތި ނުވަތަ ދާއިމީ ސިފައެއްގައި މުދަލެއް ނުވަތަ ޚިދުމަތެއް ފޯރުކޮށްދިނުމަށް ޓަކައި ވިޔަފާރިއެއް ހިންގުންކަމުގައި ބެލެވޭނެއެވެ.

(1) 12 (ބާރަ) މަސްދުވަހުގެ މުއްދަތެއްގައި، 90 (ނުވަދިހަ) ދުވަހުގެ މުއްދަތަކަށް ނުވަތަ އެއަށްވުރެ ދިގު މުއްދަތަކަށް، ދިވެހިރާއްޖޭގައި މުދަލެއް ނުވަތަ ޚިދުމަތެއް ފޯރުކޮށްދިނުން؛

(2) ދިވެހިރާއްޖޭގައި ފޯރުކޮށްދެމުންދާ މުދަލެއް ނުވަތަ ޚިދުމަތެއް، 12 (ބާރަ) މަސްދުވަހުގެ މުއްދަތެއްގައި، 90 (ނުވަދިހަ) ދުވަހުގެ މުއްދަތަކަށް ނުވަތަ އެއަށްވުރެ ދިގު މުއްދަތަކަށް ފޯރުކޮށްދޭނެކަމަށް އަންދާޒާކުރެވުން.

(ނ) މި މާއްދާގެ (ހ) އާއި (ށ) ގައި އެހެން ބަޔާންކޮށްފައި އޮތް ނަމަވެސް، އަންނަނިވި ހުރިހާ ޝަރުޠެއް ފުރިހަމަވާ ބޭރުގެ ޓޫރިސްޓު އުޅަނދަކުން މުދަލެއް ނުވަތަ ޚިދުމަތެއް ފޯރުކޮށްދިނުމަކީ ޤާނޫނުގެ 13 ވަނަ މާއްދާގެ (ހ) ގެ ބޭނުމަށް، މެދުކެނޑުމެއްނެތި ނުވަތަ ދާއިމީ ސިފައެއްގައި މުދަލެއް ނުވަތަ ޚިދުމަތެއް ފޯރުކޮށްދިނުމަށް ޓަކައި ވިޔަފާރިއެއް ހިންގުންކަމުގައެއް ނުބެލެވޭނެއެވެ.

(1) ބޭރުގެ ޓޫރިސްޓް އުޅަނދުފަހަރު ދުއްވުމާއި ބަނދަރުކުރުމުގެ ހުއްދަ، ޓޫރިޒަމާބެހޭ މިނިސްޓްރީން ލިބިފައިވުން؛

(2) ޓޫރިޒަމާބެހޭ މިނިސްޓްރީން ޗާޓަރ ލައިސަންސް ނަގަންޖެހޭ އުޅަނދަކަށް ނުވުން އަދި އެފަދަ ލައިސަންސެއް ނަގައިފައި ނުވުން؛

(3) މި މާއްދާގެ (ނ) ގެ (1) ވަނަ ނަންބަރުގައި ބަޔާންކޮށްފައިވާ ހުއްދައިގެ މުއްދަތުގެ ތެރޭގައި ފަސިންޖަރުން ބަދަލުވާ އުޅަނދެއް ކަމުގައި ނުވުން؛

(4) މި މާއްދާގެ (ނ) ގެ (1) ވަނަ ނަންބަރުގައި ބަޔާންކޮށްފައިވާ ހުއްދަ ނެގުމަށްފަހު ހިނގާ 12 (ބާރަ) މަސްދުވަހުގެ މުއްދަތުގެ ތެރޭގައި، އެ އުޅަނދު ދިވެހިރާއްޖޭގެ އިޤްތިޞާދީ ސަރަޙައްދުގައި 180 (އެއްސަތޭކަ އައްޑިހަ) ދުވަހަށްވުރެ ގިނަ ދުވަސް ހޭދަކޮށްފައި ނުވުން. 

105-2. ޓޫރިޒަމް ދާއިރާގެ މުދަލާއި ޚިދުމަތް ދޭ ތަންތަނުގައި މުވައްޒަފުންނަށް ޚާއްޞަކުރެވިގެން ހިންގާ ފިހާރަތަކާއި ކެފޭތައް

ޤާނޫނުގެ 15 ވަނަ މާއްދާގެ (ށ) ގައި ބަޔާންކޮށްފައިވާ ރޭޓުގައި ޓެކްސް ދައްކަންޖެހޭ މުޢާމަލާތްތަކުން ޓެކްސް ދެއްކުމުން އެއްކިބާވުމަށް، ޓޫރިޒަމް ދާއިރާގެ މުދަލާއި ޚިދުމަތް ދޭ ތަންތަނުގެ މުވައްޒަފުންނަށް ޚާއްޞަކުރެވިގެން ހިންގާ ފިހާރަތައް ނުވަތަ ކެފޭތައް ބޭނުންކުރާކަމަށް މީރާއަށް ގަބޫލުކުރެވޭ ނަމަ، އެ ފަދަ މުޢާމަލާތްތަކުން ޖީ.އެސް.ޓީ ނަގަންޖެހޭ ރޭޓަކީ ޤާނޫނުގެ 15 ވަނަ މާއްދާގެ (ށ) ގައި ބަޔާންކޮށްފައިވާ ރޭޓެވެ.   

106. ގުޅުންހުރި ފަރާތްތައް

ޤާނޫނާއި މި ގަވާއިދުގެ ބޭނުމަށް، "ގުޅުންހުރި ފަރާތްތައް" ކަމަށް ބުނެފައި އެވަނީ، އަންނަނިވި ފަރާތްތަކަށެވެ.

(ހ) ގްރޫޕެއްގައި ހިމެނޭ އެންމެހައި ކުންފުނިތައް؛

(ށ) ހިއްސާދާރަކާއި، އެ ހިއްސާދާރެއްގެ %5 (ފަހެއް އިންސައްތަ) ނުވަތަ އެއަށްވުރެ ގިނަ ހިއްސާ އޮންނަ ކުންފުނި؛

(ނ) ޕާޓްނަރޝިޕަކާއި، އެ ޕާޓްނަރޝިޕެއްގެ އެންމެހައި ޕާޓްނަރުން؛

(ރ) މީހަކާއި،

(1) އޭނާގެ ފިރިމީހާ ނުވަތަ އަނބިމީހާ؛ ނުވަތަ

(2) އޭނާގެ މައިންބަފައިން، މާމަ، ކާފަ، ދަރި (ދޮންދަރިންވެސް ހިމެނޭގޮތުން)، ބޭބެ، ދައްތަ، ކޮއްކޮ؛ ނުވަތަ

(3) މި މާއްދާގެ (ރ) ގެ (2) ގައި ބަޔާންކޮށްފައިވާ މީހެއްގެ އަނބިމީހާ ނުވަތަ ފިރިމީހާ؛

(ބ) މި މާއްދާގެ (ހ) އިން ފެށިގެން (ރ) ގެ ނިޔަލަށްހުރި އަކުރުތަކުގައި ބަޔާންކޮށްފައިވާ މީހަކާ ގުޅުންހުރި ފަރާތަކާ ގުޅުންހުރި އެހެން ފަރާތެއް.

107. ޗާޓަރުގެ އަގު

(ހ) ޤާނޫނުގެ 15 ވަނަ މާއްދާގެ (ނ) ގެ ބޭނުމަށް، ޗާޓަރުގެ އަގު ކަމަށް ބުނެފައި އެވަނީ، ޓޫރިސްޓް އުޅަނދެއް ޗާޓަރުކުރުމުގެ މުޢާމަލާތެއްގެ މުޤާބިލުގެ ގޮތުގައި، އެ އުޅަނދު ޗާޓަރުކުރުމުގެ ޚިދުމަތަށް، ޗާޓަރުކުރާ ފަރާތުން ފައިސާއިންނާއި އެނޫންވެސް ގޮތްގޮތުން ދައްކާ ޖުމުލަ އަގަށެވެ.

(ށ) ޤާނޫނުގެ 15 ވަނަ މާއްދާގެ (ނ) ގެ ބޭނުމަށް، ޗާޓަރު ކަމަށް ބުނެފައި އެވަނީ:

(1) ވަކި ދަތުރަކަށް ނުވަތަ ދަތުރުތަކަކަށް، 15 (ފަނަރަ) ދުވަހަށްވުރެ ދިގު ނޫން މުއްދަތަކަށް ޓޫރިސްޓް އުޅަނދެއް ކުއްޔަށް ދޫކުރުމަށް؛ ނުވަތަ

(2) ކުއްޔަށް ހިފާ ފަރާތުގެ އަމިއްލަ ބޭނުމަށް ޓޫރިސްޓް އުޅަނދެއް ކުއްޔަށް ދޫކުރުމަށެވެ.

(ނ) ޓޫރިސްޓް އުޅަނދެއް ކުއްޔަށް ދޫކުރާ ހާލަތުގައި މި މާއްދާގެ (ށ) ގައި ބަޔާންކޮށްފައިވާ ޝަރުޠުތައް ފުރިހަމަނުވާނަމަ، ކުއްޔަށް ދޫކުރާ ފަރާތާއި ކުއްޔަށް ހިފާ ފަރާތާ ދެމެދު ވެފައިވާ އެއްބަސްވުމުގައި އެހެން ގޮތަކަށް ބަޔާންކޮށްފައި އޮތް ނަމަވެސް، އެ އުޅަނދުން ފޯރުވައިދޭ މުދަލާއި ޚިދުމަތުގެ އަގުން، އެ އުޅަނދުގެ އޮޕަރޭޓިންގ ލައިސަންސް އޮންނަ ފަރާތުން ޖީ.އެސް.ޓީ ދައްކަންޖެހޭނެއެވެ.

(ރ) މި މާއްދާގެ (ށ) ގެ (1) ގައި ބަޔާންކޮށްފައިވާ ކުއްޔަށް ދޫކޮށްފައިވާ މުއްދަތު 15 (ފަނަރަ) ދުވަހަށްވުރެ އިތުރުވެފައިވޭތޯ ބެލުމުގައި، ކުއްޔަށް ހިފާ ފަރާތާ ނުވަތަ ކުއްޔަށް ހިފާ ފަރާތާ ގުޅުންހުރި ފަރާތްތަކާއެކު، 60 (ފަސްދޮޅަސް) ދުވަހުގެ މުއްދަތެއްގެ ތެރޭގައި ވެފައިވާ ކުއްޔަށް ދޫކުރުމުގެ އެންމެހައި އެއްބަސްވުންތަކުގައި ހިމެނޭ ދުވަސްތައް ގުނަންވާނެއެވެ.

(ބ) ޓޫރިޒަމާބެހޭ މިނިސްޓްރީން ދޫކުރާ ޗާޓަރ ލައިސަންސްގައި ވަކި މުއްދަތެއް ކަނޑައަޅައިފައި އޮތް ނަމަވެސް، ދިވެހިރާއްޖެއަށް އަންނަ ބޭރުގެ ޓޫރިސްޓް އުޅަނދުތަކަށް ނިސްބަތްކޮށް، ޤާނޫނުގެ 15 ވަނަ މާއްދާގެ (ނ) ގެ ބޭނުމަށް، ޗާޓަރު މާނަކޮށް ޗާޓަރުގެ އަގު ކަނޑައަޅާނީ، މި މާއްދާއާ އެއްގޮތްވާ ގޮތުގެ މަތީންނެވެ.

108. ޤާނޫނުގައިވާ ތްރެޝޯލްޑްތައް ބަލާނެ ގޮތް

(ހ) ޤާނޫނުގެ 24 ވަނަ މާއްދާގެ (ހ) އާއި، 34 ވަނަ މާއްދާގެ (ނ) އާއި، 51 ވަނަ މާއްދާއާއި، 55 ވަނަ މާއްދާގެ (ހ) ގައި ބަޔާންކޮށްފައިވާ ތްރެޝޯލްޑްތައް ބެލުމުގައި ރިޢާޔަތްކުރާނީ ރަޖިސްޓަރީކޮށްފައިވާ ފަރާތުން ފޯރުވައިދޭ ޓެކްސް ނެގޭ މުދަލާއި ޚިދުމަތުގެ ޖުމުލަ އަގަށެވެ.

(ށ) މި ގަވާއިދުގެ 7 ވަނަ މާއްދާގެ ދަށުން ޓެކްސް ނެގޭ އެއްވެސް ޙަރަކާތެއް ވަކިން ރަޖިސްޓަރީކުރިކަމުގައިވިޔަސް، ޤާނޫނުގެ 24 ވަނަ މާއްދާގެ (ހ) އާއި، 34 ވަނަ މާއްދާގެ (ނ) އާއި، 51 ވަނަ މާއްދާއާއި، 55 ވަނަ މާއްދާގެ (ހ) ގައި ބަޔާންކޮށްފައިވާ ތްރެޝޯލްޑްތައް ބެލުމުގައި އެ ޙަރަކާތް ރަޖިސްޓަރީކޮށްފައިވާ ފަރާތުން ހިންގާ ހުރިހާ ޓެކްސް ނެގޭ ޙަރަކާތްތައް ހިމެނޭނެއެވެ.

109. ޖީ.އެސް.ޓީ ހިމަނައިގެން އަގު ޖެހުން

(ހ) ރަޖިސްޓަރީކޮށްފައިވާ ފަރާތަކުން ފޯރުވައިދޭ މުދަލާއި ޚިދުމަތުގެ އަގު، މުދަލާއި ޚިދުމަތް ލިބިގަންނަ ފަރާތްތަކަށް ފެންނާނޭހެން ޖަހައިފައި ހުންނަންވާނެއެވެ. އަދި މި މާއްދާގެ (ށ) އަދި (ނ) ގައި ބަޔާންކޮށްފައިވާ ހާލަތުތައް ފިޔަވައި އެހެން ހާލަތުތަކުގައި އަގު ޖަހައިފައި ހުންނަންވާނީ އެ މުދަލުން ނުވަތަ ޚިދުމަތުން ޖީ.އެސް.ޓީ ގެ ގޮތުގައި ނެގޭ އަދަދު ހިމަނައިގެންނެވެ.

(ށ) ރަޖިސްޓަރީކޮށްފައިވާ ފަރާތަކުން ފޯރުވައިދޭ މުދަލާއި ޚިދުމަތް ފޯރުވައިދިނުމަށް ސަރވިސް ޗާޖެއް ނަގާނަމަ، ޖީ.އެސް.ޓީ ގެ ގޮތުގައި ނެގޭ އަދަދު ނުހިމަނައި މުދަލުގެ ނުވަތަ ޚިދުމަތުގެ އަގު ޖަހައިފައި ބެހެއްޓިދާނެއެވެ. އަދި މި ގޮތަށް އަގު ޖަހާނަމަ، އަގު ޖަހައިފައި ހުންނަންވާނީ މުދަލާއި ޚިދުމަތް ލިބިގަންނަ ފަރާތްތަކުން މުދާ ނުވަތަ ޚިދުމަތް ލިބިގަތުމަށް އެ ފަރާތަށް ދައްކަންޖެހޭ ފައިސާގެ ޖުމުލަ އަދަދު ހިސާބުކުރެވޭނެފަދަ ގޮތަކަށެވެ. މި އަކުރަށް ޢަމަލުކުރާނީ މި މާއްދާގެ (ނ) އާ ޚިލާފުނުވާނެ ގޮތުގެ މަތިންނެވެ.

(ނ) ޓެލެކޮމިއުނިކޭޝަން ޚިދުމަތްދޭ ފަރާތްތަކާއި، ޓެލެކޮމިއުނިކޭޝަން ޚިދުމަތްދޭ ފަރާތްތަކުގެ އޭޖެންޓުންނާއި، ޓެލެކޮމިއުނިކޭޝަން ޚިދުމަތްތައް ގަނެ ވިއްކާ ފަރާތްތަކުން ފޯރުވައިދޭ ޓެލެކޮމިއުނިކޭޝަން ޚިދުމަތުގެ އަގު ޖަހައިފައި ހުންނަންވާނީ ޖީ.އެސް.ޓީ ގެ ގޮތުގައި ނެގޭ އަދަދު ނުހިމަނައެވެ. އެ ފަދަ ފަރާތްތަކުން ފޯރުވައިދޭ ޓެލެކޮމިއުނިކޭޝަން ޚިދުމަތުގައި އަގު ޖަހައިފައި ހުންނަންވާނީ ޚިދުމަތް ލިބިގަންނަ ފަރާތްތަކުން ޚިދުމަތް ލިބިގަތުމަށް އެ ފަރާތަށް ދައްކަންޖެހޭ ފައިސާގެ ޖުމުލަ އަދަދު ހިސާބުކުރެވޭނެފަދަ ގޮތަކަށެވެ.

(ރ) މި މާއްދާގެ (ނ) ގައި ބަޔާންކޮށްފައިވާ ފަރާތްތަކުން ފޯރުވައިދޭ ޓެލެކޮމިއުނިކޭޝަން ޚިދުމަތުގައި އަގު ޖަހަނީ ޖީ.އެސް.ޓީ ގެ ގޮތުގައި ނެގޭ އަދަދު ނުހިމަނައި ކަން ބަޔާންކުރާ ނޯޓިސްއެއް، އެ ފަރާތްތަކުގެ ޓެކްސް ނެގޭ ޙަރަކާތްތައް ހިންގާ ތަންތަނުގައި ބަހައްޓަންވާނެއެވެ.

(ބ) (އުވައިލެވިފައި).

110. ރީފަންޑު ދިނުން

ޤާނޫނުގެ 32 ވަނަ މާއްދާގެ (ށ) ގެ ބޭނުމަށް، ރަޖިސްޓަރީކޮށްފައިވާ ފަރާތަކުން ޤާނޫނުގެ ދަށުން ދައްކަންޖެހޭ މިންވަރަށްވުރެ އިތުރަށް މީރާއަށް ފައިސާ ދައްކައިފައިވާނަމަ އެ ފައިސާއާމެދު ޢަމަލުކުރާނީ ގަވާއިދު ނަންބަރު 2013/R-45 (ޓެކްސް ނެގުމާބެހޭ އިދާރީ ގަވާއިދު) ގެ 69 ވަނަ މާއްދާގައިވާ ގޮތުގެ މަތިންނެވެ.    

111. ހުއްދަދެވޭ ސޮފްޓްވެއަރ

ރަޖިސްޓަރީކޮށްފައިވާ ފަރާތަކުން އަހަރެއްގެ ތެރޭގައި ފޯރުވައިދޭ މުދަލާއި ޚިދުމަތުގެ ޖުމުލަ އަގު، މީރާއިން ކަނޑައަޅާ ވަކި އަދަދަކަށްވުރެ އިތުރުވާނަމަ، ޓެކުހާގުޅޭ ލިޔެކިޔުންތައް ތައްޔާރުކުރަންވާނީ މީރާއިން ހުއްދަދީފައިވާ ސޮފްޓްވެއަރއެއް ބޭނުންކޮށްގެންނެވެ. ނަމަވެސް، މިފަދައިން ޢަމަލުކުރުމަށް، ހުއްދަދެވޭ ސޮފްޓްވެއަރ ތަކުގެ ލިސްޓް މީރާއިން ޢާންމުކުރާ ތާރީޚުން ފެށިގެން 2 (ދޭއް) އަހަރުދުވަހުގެ މުއްދަތެއް ރަޖިސްޓަރީކޮށްފައިވާ ފަރާތްތަކަށް ލިބޭނެއެވެ.

112. ބައެއް ހާލަތު މެދުވެރިވުމުން އަންގަންޖެހޭ ފަރާތް

ޤާނޫނުގެ 26 ވަނަ މާއްދާގެ (ނ) ގެ ބޭނުމަށް، އެ މާއްދާގެ (ހ) ގައި ބަޔާންކޮށްފައިވާފަދަ ޙާލަތެއް މެދުވެރިވެއްޖެ ހިނދެއްގައި އެ ހާލަތު މެދުވެރިވެއްޖެކަން މީރާއަށް އަންގާނީ ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) އާއި އެ ޤާނޫނުގެ ދަށުން ހެދޭ ގަވާއިދުގައި އެކަން ކުރުމަށް ކަނޑައަޅާފައިވާ ފަރާތަކުންނެވެ.

113. ޖީ.އެސް.ޓީ ނެގޭ މިންވަރު ބަދަލުވުމާއި ގުޅިގެން ޢަމަލުކުރާނެ ގޮތް

ރަޖިސްޓަރީކޮށްފައިވާ ފަރާތަކުން ފޯރުވައިދޭ މުދަލަކަށް ނުވަތަ ޚިދުމަތަކަށް ޓެކްސް އިންވޮއިސް ތައްޔާރުކުރަނީ ނުވަތަ އެ މުޢާމަލާތުގެ އަގު ނުވަތަ އެއިން ބައެއް އަދާކުރަނީ ޤާނޫނުގެ 15 ވަނަ މާއްދާ އަދި 16 ވަނަ މާއްދާގެ ދަށުން ޖީ.އެސް.ޓީ ނެގޭ މިންވަރު ބަދަލުވުމުގެ ކުރިން ކަމުގައިވާނަމަ، އެ މުޢާމަލާތަކަށް ޖީ.އެސް.ޓީ ނަގަންވާނީ ޤާނޫނުގެ 17 ވަނަ މާއްދާގައި ބަޔާންކޮށްފައިވާ ގޮތުގެމަތިން އެ މުޢާމަލާތަކަށް ޖީ.އެސް.ޓީ ލާޒިމުވާ ވަގުތުގައި ޖީ.އެސް.ޓީ ނެގޭ މިންވަރުންނެވެ.

113-1. ޓެކްސް ރޫލިންގ TR-2015/G23 އިޞްލާޙުކުރުން

ގަވާއިދު ނަންބަރު 2011/R-43 (މުދަލާއި ޚިދުމަތުގެ އަގުން ޓެކްސް ނެގުމުގެ ގަވާއިދު) އަށް 25 ވަނަ އިޞްލާޙު ގެނައުމުގެ ގަވާއިދަށް ޢަމަލުކުރަން ފަށާ ތާރީޚުން ފެށިގެން، ޓެކްސް ރޫލިންގ ނަންބަރު TR-2015/G23 (ޖީ.އެސް.ޓީ ބަޔާނާއެކު ހުށަހަޅަންޖެހޭ ލިޔެކިޔުންތައް) ގެ 15 ވަނަ ޕެރެގްރާފުގެ (ޅ) އުވުނީއެވެ.

113-2. ދިވެހިރާއްޖެއަށް އެތެރެކުރާ މުދާ ބޭނުންކުރުމާއި ބަދަލުކުރުމާއި ވިއްކުން

(ހ) ރަޖިސްޓަރީކޮށްފައިވާ ފަރުދަކު އެ ފަރާތުގެ އަމިއްލަ ބޭނުމަށް މުދާ އެތެރެކުރުމަށްފަހު، އެއިން މުދަލެއް އެހެން ފަރާތަކަށް ވިއްކައިފިނަމަ، ނުވަތަ ބަދަލުކޮށްފިނަމަ، އެ މުޢާމަލާތުން ޖީ.އެސް.ޓީ ދައްކަންވާނެއެވެ.

(ށ) ރަޖިސްޓަރީކޮށްފައިވާ ފަރުދަކު އެ ފަރާތުގެ އަމިއްލަ ބޭނުމަށް ފިޔަވައި އެހެން ބޭނުމަކަށް މުދާ އެތެރެކުރުމަށްފަހު، އެއިން މުދަލެއް އެހެން ފަރާތަކަށް ވިއްކައިފިނަމަ، ނުވަތަ ބަދަލުކޮށްފިނަމަ، ނުވަތަ އަމިއްލަ ބޭނުމަކަށް ބޭނުންކޮށްފިނަމަ، އެ މުޢާމަލާތުން ޖީ.އެސް.ޓީ ދައްކަންވާނެއެވެ.

(ނ) ފަރުދަކު ފިޔަވައި، ރަޖިސްޓަރީކޮށްފައިވާ ފަރާތަކުން މުދާ އެތެރެކުރުމަށްފަހު، އެއިން މުދަލެއް އެހެން ފަރާތަކަށް ވިއްކައިފިނަމަ، ނުވަތަ ބަދަލުކޮށްފިނަމަ، އެ މުޢާމަލާތުން ޖީ.އެސް.ޓީ ދައްކަންވާނެއެވެ.

(ރ) ގަވާއިދު ނަންބަރު 2011/R-43 (މުދަލާއި ޚިދުމަތުގެ އަގުން ޓެކްސް ނެގުމުގެ ގަވާއިދު) އަށް 26 ވަނަ އިޞްލާޙު ގެނައުމުގެ ގަވާއިދަށް ޢަމަލުކުރަން ފަށާ ތާރީޚުން ފެށިގެން، ޓެކްސް ރޫލިންގ ނަންބަރު TR-2016/G36 (އިމްޕޯޓްކުރާ މުދާ އެހެން ފަރާތަކަށް ބަދަލުކުރުން) އުވުނީއެވެ.

113-3. އުވައިލެވޭ ޓެކްސް ރޫލިންގ

(ހ) ގަވާއިދު ނަންބަރު 2011/R-43 (މުދަލާއި ޚިދުމަތުގެ އަގުން ޓެކްސް ނެގުމުގެ ގަވާއިދު) އަށް 29 ވަނަ އިޞްލާޙު ގެނައުމުގެ ގަވާއިދަށް ޢަމަލުކުރަން ފަށާ ތާރީޚުން ފެށިގެން، ޓެކްސް ރޫލިންގ ނަންބަރު TR-2015/G23 (ޖީ.އެސް.ޓީ ބަޔާނާއެކު ހުށަހަޅަންޖެހޭ ލިޔެކިޔުންތައް) އުވުނީއެވެ.

(ށ) މި ގަވާއިދުގެ 2-78 ވަނަ މާއްދާގެ (ހ) އާއި (ށ) އަށް ޢަމަލުކުރަން ފަށާ ތާރީޚުން ފެށިގެން، ޓެކްސް ރޫލިންގ ނަންބަރު TR-2019/A18 (އޮންލައިންކޮށް ޓެކްސް ދެއްކުން ލާޒިމުކުރުން) ގެ 3 ވަނަ ޕެރެގްރާފުގެ (ހ) އުވުނީއެވެ.

(ނ) ގަވާއިދު ނަންބަރު 2011/R-43 (މުދަލާއި ޚިދުމަތުގެ އަގުން ޓެކްސް ނެގުމުގެ ގަވާއިދު) އަށް 29 ވަނަ އިޞްލާޙު ގެނައުމުގެ ގަވާއިދަށް ޢަމަލުކުރަން ފަށާ ތާރީޚުން ފެށިގެން، ޓެކްސް ރޫލިންގ ނަންބަރު TR-2015/G26 (ޖީ.އެސް.ޓީ ބަޔާން އިޞްލާޙުކުރުން) އުވުނީއެވެ.

(ރ) ގަވާއިދު ނަންބަރު 2011/R-43 (މުދަލާއި ޚިދުމަތުގެ އަގުން ޓެކްސް ނެގުމުގެ ގަވާއިދު) އަށް 31 ވަނަ އިޞްލާޙު ގެނައުމުގެ ގަވާއިދަށް ޢަމަލުކުރަން ފަށާ ތާރީޚުން ފެށިގެން، ޓެކްސް ރޫލިންގ ނަންބަރު TR-2014/G22 (މުދަލާއި ޚިދުމަތުގެ އަގުން ނެގޭ ޓެކްސް: ދިވެހިރައްޔިތުންނަށް ފޯރުވައިދޭ ދިވެހިރާއްޖޭގެ އެތެރޭގެ ވައިގެ ދަތުރުފަތުރުގެ ޚިދުމަތްތަކާއި ޓޫރިޒަމް ދާއިރާގެ މުދަލާއި ޚިދުމަތް ދޭ ތަންތަނުގެ މުވައްޒަފުންނަށް ފޯރުވައިދޭ ޚިދުމަތްތައް) އުވުނީއެވެ.

114. ޤާނޫނާއި ގަވާއިދަށް ތަބާވުން

(ހ) ޤާނޫނާއި މި ގަވާއިދުގައި ކަނޑައެޅިފައިވާގޮތަށް ޓެކްސް ނެގުން އިދާރީގޮތުން ތަންފީޒުކުރުމުގެ ބޭނުމުގައި ކޮމިޝަނަރ ޖެނެރަލް އަންގާ އެންމެހައި އެންގުންތަކަށް ރަޖިސްޓަރީކޮށްފައިވާ ފަރާތްތަކުން ފުރިހަމައަށް ތަބާވާންޖެހޭނެއެވެ.

(ށ) ރަޖިސްޓަރީކޮށްފައިވާ ފަރާތަކުން މި ގަވާއިދުގައި ކަނޑައަޅައިފައިވާ އެއްވެސް ކަމަކާ ޚިލާފުވެއްޖެނަމަ، އަދި އެފަދަ ޚިލާފުވުމަކަށް ޓެކްސްއާބެހޭ ޤާނޫނެއްގައި އަދަބެއް ކަނޑައަޅައިފައި ނުވާނަމަ، -/2,000 (ދެހާސް) ރުފިޔާއަށްވުރެ ބޮޑު ނޫން އަދަދަކުން ޖޫރިމަނާވާނެއެވެ.

115. މި ގަވާއިދާއި ޓެކްސް ޤާނޫނުތަކާ އެކުގައި ކިޔުން

މި ގަވާއިދު ކިޔާނީ، ޤާނޫނު ނަންބަރު 10/2011 (މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނު) އާއި ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) އާއި އެ ޤާނޫނުތަކުން ބާރު ލިބިގެން ހަދާ ގަވާއިދުތަކާ އެކުގައެވެ. އަދި މި ގަވާއިދުގައި މާނަކޮށްފައި ނުވާ ކޮންމެ ލަފުޒެއް ނުވަތަ ޢިބާރާތެއް، ކަނޑައެޅިގެން އެހެން ގޮތަކަށް ދޭހަނުވާހާ ހިނދަކު މާނަކުރާނީ، އެ ޤާނޫނުތަކުގައި އެ ލަފުޒެއް ނުވަތަ ޢިބާރާތެއް މާނަކޮށްފައިވާ ގޮތަށެވެ.

116. ގަވާއިދަށް ޢަމަލުކުރަން ފެށުން

މި ގަވާއިދަށް ޢަމަލުކުރަން ފަށާނީ، ޤާނޫނު ނަންބަރު 10/2011 (މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނު) އަށް ޢަމަލުކުރަން ފަށާ ތާރީޚުން ފެށިގެންނެވެ.

117. ލަފުޒުތަކާއި ޢިބާރާތްތަކުގެ މާނަ

(ހ) މި ގަވާއިދުގައި ކަނޑައެޅިގެން އެހެން ގޮތަކަށް ބަޔާންކޮށްފައި ނުވާހާ ހިނދަކު:

"ހުއްދައެއް ލިބިގެން ހިންގާ ޚިދުމަތް" ނުވަތަ "ހުއްދައެއް ލިބިގެން ދޭ ޚިދުމަތް" ކަމަށް ބުނެފައި އެވަނީ، ޚިދުމަތެއް ދިނުމަށްޓަކައި ސަރުކާރުގެ ކަމާބެހޭ އިދާރާއަކުން ނުވަތަ ދައުލަތުގެ ކަމާބެހޭ މުއައްސަސާއަކުން ނަގަންޖެހޭ ހުއްދަ ނުވަތަ ލައިސަންސް ނުވަތަ ރެޖިސްޓްރޭޝަން ނަގައިގެން، ދިވެހިރާއްޖޭގައި ދެވޭ ޚިދުމަތްތަކަށެވެ.

"ހުއްދައެއް ލިބިގެން ހިންގާ ވިޔަފާރި" ކަމަށް ބުނެފައި އެވަނީ، ވިޔަފާރިއެއް ކުރުމަށްޓަކައި ސަރުކާރުގެ ކަމާބެހޭ އިދާރާއަކުން ނުވަތަ ދައުލަތުގެ ކަމާބެހޭ މުއައްސަސާއަކުން ނަގަންޖެހޭ ހުއްދަ ނުވަތަ ލައިސަންސް ނުވަތަ ރެޖިސްޓްރޭޝަން ނަގައިގެން، ދިވެހިރާއްޖޭގައި ހިންގާ ވިޔަފާރިތަކަށެވެ.

"ނުއުފުލޭ މުދާ" ކަމަށް ބުނެފައި އެވަނީ، ބިންބިމާއި ފަޅުރަށްރަށާއި ފަޅުތަކާއި ފަރުތަކާއި ގިރިފަދަ ތަންތަނާއި، ޢިމާރާތްތަކާއި ގުދަންތަކާއި ޕްލާންޓްތަކާއި ކާރުޚާނާތަކާއި ބިނާތަކާއި އަދި މިނޫންވެސް މިފަދަ މުދަލަށެވެ.

"ކުންފުނިތަކުގެ ގްރޫޕެއް" ކަމަށް ބުނެފައި އެވަނީ، ހޯލްޑިންގ ކުންފުންޏާއި އެ ހޯލްޑިންގ ކުންފުނިން ސީދާކޮށް ނުވަތަ ނުސީދާކޮށްވިޔަސް %50 (ފަންސާސް އިންސައްތަ) ނުވަތަ އެއަށްވުރެ ގިނަ ވޯޓިންގ ރައިޓްސް އޮންނަ ކުންފުނިތައް ނުވަތަ އެނޫންވެސް ގޮތަކުން ކޮންޓްރޯލްކުރާ އެންމެހައި ކުންފުނިތަކަށެވެ.

"ދަތުރު ރާވައި ހިންގުމުގެ ޚިދުމަތްދޭ ފަރާތްތައް" ކަމަށް ބުނެފައި އެވަނީ، ޓްރެވަލް އެޖެންޓުން، ޓުއަރ އޮޕަރޭޓަރުން އަދި ވިޔަފާރި އުސޫލުން ދިވެހިރާއްޖެއަށް ފަތުރުވެރިން ގެނައުމުގެ ޚިދުމަތްދޭ އެހެނިހެން ފަރާތްތަކަށެވެ.

"ލޯޔަލްޓީ ސްކީމް" ކަމަށް ބުނެފައި އެވަނީ، މުދާ ނުވަތަ ޚިދުމަތް ލިބިގަންނަ ފަރާތަށް ރެޑީމްކުރެވޭގޮތަށް ޕޮއިންޓް ލިބިދެވޭ ސްކީމަކަށެވެ.

"ޤާނޫނު" ކަމަށް ބުނެފައި އެވަނީ، ޤާނޫނު ނަންބަރު 10/2011 (މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނު) އަށެވެ.

"ޓެކްސް ނެގޭ މުދަލާއި ޚިދުމަތް" ކަމަށް ބުނެފައި އެވަނީ، ޤާނޫނުގެ 22 ވަނަ މާއްދާގެ ދަށުން ސުން-ރޭޓުގައި ޓެކްސް ނެގޭ މުދަލާއި ޚިދުމަތްވެސް ހިމެނޭ ގޮތުން، ޤާނޫނުގެ ދަށުން ޓެކްސް ނެގޭ މުދަލާއި ޚިދުމަތެވެ. އެބަހީ، ޓެކްސް ނެގޭ މުދަލާއި ޚިދުމަތުގެ ތެރޭގައި ޤާނޫނުގެ 20 ވަނަ މާއްދާގެ ދަށުން ޖީ.އެސް.ޓީ ނެގުމުން އިސްތިސްނާވާ މުދަލާއި ޚިދުމަތެއް ނުހިމެނޭނެއެވެ.

"ޓެކްސް އަހަރު" ކަމަށް ބުނެފައި އެވަނީ، މީލާދީ އަހަރުގެ 1 ޖަނަވަރީން ފެށިގެން 31 ޑިސެންބަރުގެ ނިޔަލަށެވެ.

(ށ) މި ގަވާއިދުގެ ބޭނުމަށް، ޢިބާރާތްކުރުމުގައި އެކަހެރި ނަން ގިނަނަމުގެ ތެރޭގައި އަދި ގިނަނަން އެކަހެރި ނަމުގެ ތެރޭގައި ހިމެނެއެވެ